UJose ufuna ukunqoba kanti u-Ole unwaya ikhanda
Umdlalo wanamuhla yize uzobe ungenabo abalandeli kodwa kulindeleke ukuthi kuguge utshani kuwona. Lo mdlalo ozoba phakathi kweTottenham Hotspurs neManchester United, uzobanjelwa eTottenham Hotspur Stadium ngele-21:15 kusihlwa.
Okuzoshubisa kakhulu lo mdlalo ukuthi la maqembu womabili azodlala izethenjwa zawo sezibuyile.
Ngasohlangithini lweSpur kuzobe kukhona uHarry Kane okumiswe imidlalo ye-English Premier League (EPL) elimele. Lo mgadli wase-England, amagalelo akhe ayaziwa kakhulu njengoba kuhlezi kunguye osiza leli qembu eliqeqeshwa uJose “The Special One” Mourinho.
UKane kule sizini udlale imidlalo engama-20 useshaye amagoli ali-11. Omunye umdlali ozobe ekhona kulo mdlalo uSon Heung-Min, obenyamalele kuleli qembu eqeqeshelwa ezempi ezweni lakhe iSouth Korea.
Ngasohlangothini lweMan United kuzoyiwa kulo mdlalo sekubuye injini yayo uPaul Pogba, obesekunesikhathi engabonakali ngenxa yokulimala kanzima. Ukubuya kwakhe kuzofezeka isifiso sabaningi abebefisa ukumbona edlala noBruno Fernandes ofike kwezwakala.
IRed Devils eqeqeshwa u-Ole Gunnar Solskjaer izofuna ukuthi iwunqobe noma ikanjani lo mdlalo khona izolingana neChelsea FC enamaphuzu angama-48 endaweni yesine kulogi.
Njengoba vele sekubona ngisho ingane encane ukuthi iLiverpool FC iyona esingompetha bakule sizini, kusho ukuthi amanye amaqembu aselwela ukubalwa namane aphezulu ukuze azokwazi ukudlala umqhudelwano omkhulu emhlabeni i-UEFA Champions League ngesizini ezayo.
ISpurs isendaweni yesi-8 kulogi ngamaphuzu angama-41, kuyona kubukeka kunzima ukuthi isengakwazi ukuthi idlale i-UEFA Champions League.
UMourinho ekhuluma nabezindaba emva komdlalo wobungani neNorwich ngoLwesihanu olwedlule uthe bayawazi umqansa ababhekene nawo.
“Uma sifuna ukuzibona sidlala i-UEFA Champions League kumele sinqobe yonke imidlalo yethu. Asidingi ukuthi silwele amanye amaqembu kodwa kumele sizilwele thina. Asidlalanga kahle njengoba sihlulwe iNorwich ngamagoli amabili kwelilodwa, kodwa ngikholwa ukuthi ngiwabonile amaphutha esizowalungisa ngaphambi komdlalo weMan United. Kuzobanzima ukudlala ngaphandle kwabalandeli kodwa nakanjani kuzomele siwunqobe lo mdlalo njengoba sidlalela ekhaya,” kusho uMourinho.
USolskjaer yena uthe udidekile ukuthi uzobophela kanjani njengoba abadlali bekhona bonke ikakhulukazi esiswini.
“Konke kumi ngomumo ngomdlalo, abadlali kade bagcina ukuthi babe senkundleni bakubheke ngabovu ukubuyela. Siwudlalile umdlalo wobungani ngeledlule sawunqoba, okusho bakhombisile abadlali ukuthi bakulambele ukudlala. Inkinga izoba sekutheni sibophela kanjani ikakhulukazi maphakathi esiswini. SinoPogba obhekwe kakhulu, uFernandez owenza kahle, uMatic (Nemanja), uFred okumiswe imidlalo esefomini noScott McTominay. Sizoba nzima isinqumo kodwa ngiyakholwa abadlali engizobabophela bazosinqobela umdlalo,” kusho uSolskjaer.
Emdlalweni wokuqala la maqembu etholene phezulu e-Old Trafford Stadium kwanqoba iMan United ngamagoli amabili kwelilodwa. Amagoli avalelwa phakathi uMarcus Rashford eleSpur lashawa uDele Alli.