Wagadla nangale kweringi uNdou
Kuhlukene imibono ngesinqumo seBoxing South Africa (BSA) sokwenza umcimbi wokuklomelisa abenze kahle onyakeni wezi-2019.
Labo abaphila isibhakela bebelubheke ngabomvu usuku lwengqungquthela (iBoxing Indaba) kodwa badumele uma iBSA imemezela ukuthi isihlehliselwe unyaka ozayo.
IBSA, eholwa uTsholofelo Lejaka, izeseke ngokuthi ilandela umthetho kaHulumeni osavimbela ukuthi abantu abaningi bengahlali gunjini linye.
Ngasekupheleni kwesonto eledlule le nhlangano engamele ezamankomane ezweni ikhiphe isitatimende esithi sekungaqalwa ukukhankaselwa labo okubonwa ukuthi kubafanele ukuthweswa uphaphe lwegwalagwala emcimbini.
Kulesi sitatimende esibhalwe nguSihlalo webhodi, uDkt uPeter Ngatane, kuthiwe kumele abazovotelwa kube ngabantu abenze umsebenzi kusukela mhla lulunye kuLwezi wezi2018 kuya kumhla zili-16 kuNdasa wezi-2019. Ukuthathwa kwamagama abaphakanyiswayo kuvala ngomhla zingama-20 kuNtulikazi.
Ophromotha, abaqeqeshi nosomankomane abakhulume neBAYEDE bakubeke bangananaza ukuthi iBSA ishaye isikhala ngokuhlehlisa ingqungquthela kepha yaphasisa umcimbi wokuklomelisa.
Bathi ukubanjwa kwengqungquthela kumqoka kakhulu kwazise kunezinto eziningi okumele bacaciseleke ngazo.
Bathi kunezinto abafuna ukuziphakamisa ngenhloso yokuhlomisa iBSA ngamacebo okuhola kahle lo mdlalo owake waba ngowesibili ezweni othandwa kakhulu kuneminye eminyakeni eyedlule.
Umphathi weXaba Promotions u-Ayanda Matiti uthe: “Angisizwa kahle isizathu sokuhlehliswa kwengqungquthela ngokwami emqoka kunomcimbi wokuklomelisa. Kule ngqungquthela besifuna ukwazi ukuthi yiliphi igxathu elithathwayo njengoba kuhlasele ukhuvethe kwama yonke into ezweni.”
Eqhuba uMatiti uthe: “Bengilindele ukuthi uMnu uLejaka akubeke eqhulwini ukwenza ingqungquthela kwazise selokhu anikwa lesi sikhundla ngowezi-2016 akakaze ayenze. Hleze nje ukuyenza kahle ibizokwenza nalabo abangabuzwa kahle ubuholi bakhe baqale bambheke ngenye indlela.”
UThembalethu Ntuthu weRumble Africa uthi bekumele okungenani ingqungquthela yenziwe ngoLwezi. Uthe ngokwakhe akanankinga nomcimbi womklomelo kwazise ubefisa ukuphinde akhale emuke nomklomelo wokuba iPromoter of the Year.
U-Elias Tshabalala ophethe iFanstastic 2 Promotions nomfowabo uFanakhe, uthe: “Ingqungquthela ibizosiza kakhulu abantu abanjengoLejaka noNgqongqoshe Wezemidlalo, uMhlonishwa uNathi
Mthethwa, ukuzizwela ngezabo izindlebe izikhalo nezimfuno zethu.”
UThulani Smith, olwa esigabeni seJunior Bantamweight nokleliswe endaweni yesihlanu kuzwelonke, uthe: “Uma ubhekisisa kahle azikho izimpi ezihlabahlosile ezingafakwa ngaphansi kwalesi sikhathi esikhishiwe. Ngifuna ukubona kahle ukuthi obani labo abazoklonyeliswa.”
Ngesikhathi kugcinwa ukubanjwa kwengqungquthela eGoli ngowezi-2010, lapho leli phephandaba laliyingxenye yayo, kwashuba kakhulu. UPhillip “Time Bomb” Ndou washiya izethameli ngisho nowayenguNgqongqoshe Wezemidlalo ngaleso sikhathi uMakhenkesi Stofile bebambe ongenzansi.
Ekhulumela ozakwabo uNdou, okwakucaca ukuthi wayelilangazelele leliya thuba lokuphefumula, wathi osomankomane bakhathele ukuxhashazwa abaqeqeshi, ophromotha nezimeneja bese bebalahlisa okwamakhondomu.
Phakathi kwezinto akhala ngazo uNdou waphakamisa ukuthi kubuyekezwe izinkontileka abazisayina nophromotha azichaza njengezobugqila. Waphakamisa ukuthi iBSA ayisebenzisane ngendlela eqondile noSA Revenue Services futhi nabo babe ingxenye yezingxoxo uma kukhulunywa nabasakazi bezimpi.
OkaNdou, owayedinwe egane unwabu ethola nokwesekwa ozakwabo ababenanela ngamazwi ezihlalweni, wabuye waphakamisa ukuthi imali engama-25% ethathwa ngabaqoqi bentela uma beqhathwa, kumele yehliswe ngoba inkulu. Ngesikhathi ebhodla nomlilo, ngalowo mzuzu kwabonakala labo ayebasola bevungama ngabodwana. UNick “Mthakathi” Durandt owayesanda kuhlukana naye uNdou nophromotha uBranco Milenkovic babonakala beshintsha beba bomvu ebusweni, kucaca ukuthi ziyabacika lezi zinsolo.