Abe-Afriforum nePAC enkantolo: Kubangwa u-One Settler One Bullet
AmaBhunu athi kugovuzwa impi, akushushiswe UPoqo uthi izimpawu zobandlululo azidilizwe
Udaba lokucwasa lusematheni kulezi zinsuku kulandela ukubulawa kowoHlanga e-United State of America (USA) uMnu uGeorge Floyd ngamaphoyisa. Kuleli sonto kuqale enye impi yamazwi nephelezelwa ngamaphepha enkantolo. Lona ngumbango ophakathi kwe-AfriForum kanye nePan Africanist Congress of Azania (PAC). Okubangwayo yiziqubulo zomzabalazo.
Olunye uhlangothi, lweAfriForum, luthi iyacwasa futhi inenhlese yokugovuza umphakathi nokungaholela odlameni. Kulandela ukwenza umbukiso kwePAC nobekunemibhalo ethi: “One Settler One Bullet” nothi “Each Bullet Takes Us Forward”. Zombili lezi ziqubulo ngezikhathi zombangazwe zabe zisetshenziwa yi-Azanian People’s Liberation Army (APLA) nokwabe kuluphiko lwezempi lwePAC.
NgokukaMnu u-Ernst van Zyl we-AfriForum uPoqo ngokuvusa lo mlando ukhomoza impi ebhekiswe kwabathile.
“Imvubelo yodlame enje ebhekiswe kwabayingcosana ayivumelekile. Ngeke sivumele inkulumo enobungozi ukuba isebenze ukusho izinto ezehlukile. I-AfriForum izothatha izinyathelo ezifanelekile ukuqinisekisa ukuthi ubulungiswa buyenzeka ngokusebenzisa imigudu yomthetho efanele,” kusho uVan Zyl.
Ngakolunye uhlangothi abePAC bamile ekutheni lo uma kungesikho ukuzenzisa kwabantu abasavikela amaflegi obandlululo, iculo lesizwe elibandlululayo, ubugebengu obubhekiswe kubantu futhi abasabambelele emhlabeni wamaAfrika abawuntshontsha ukuthi bangaklewulisa okwezimpisi izikhuni zibuya ngomkhwezeli ngokucindezelwa ngokobukoloni baqhubeke bathi amaculo ethu omzabalazo agovuza udlame,” kusho uPooe.
Udaba luqalwe yizingqwembe zabePAC ezabe zimema abantu ukuthi babuthane ukuyokhumbula isibhicongo saseSoweto ngonyaka we-1976.
Umholi wePAC KwaZuluNatal, uMnu uLinda Ndebele, naye uhambe emagameli kaPooe wathi uma kuwukuthi kususwa konke ngomzabalazo kanjalo nezimpawu zobandlululo nazo azisuwe kusuka ezakhiweni, izithombe kanye namagama ezindawo nathe kuwubufakazi bonya olwabe lubhekiswe kwaboHlanga.
“NjengePAC KwaZulu-Natal sithi akungabe kusaphoiliswa maseko akuguqulwe amagama abacindezeli okwethiwa ngawo izindawo. Kuqalwe ngoNatal kuqhutshekwe namadolobha nezindawo ezifana neDurban, iPort Shepstone, iLadysmith nezinye,” kusho uNdebele.
Abe-Afriforum basebenzise isigaba somthetho owashaywa ngalo ubandlululo iSigaba 18 soMthetho Wemihlangano Enobudlame uNombolo 17 we1956, ukuyisa iPAC enkantolo.
Akukhona okokuqala ukuthi lo Mthetho wangowe-1956 udale ukwehlukana kwemibono njengoba nomholi we-Economc Freedom Party (EFF), uMnu uMalema, egqigqa izinkantolo ngenxa yokwephula lo Mthetho ngokusho kwalaba abamsolayo.
Eminyakeni eyedlule kuke kwanenkulumo mpikiswano ngezimpawu zobandlululo nokwaholela ekutheni abanye bathi aziwiswe kantu abanye bathi lokho kungaba wukwesulwa komlando wezwe omqoka.
Lokhu kudonsisana kweAfriforum emilwe kuzingxabo zobuBhunu kanye nePAC eqhakambisa izingxabo zobuAfrika bungase bufake nabanye.
Okusobala yikuthi uma sekunjalo bona laba abazoyingena bangahle bahlukane ngokwezinhlanga nokungacijisa imikhonto ezweni.