Izakhamuzi azishaye isixaxa
UNgqongqoshe uMboweni ucela ukubambisana ukuze kufukulwe umnotho obonakala untenga kakhulu. Ukhuvethe lubuye lwafaka uvoyizane kwesibhibhayo isilonda somnotho.
INingizimu Afrika iba nosuku lwesabelomali sikazwelonke njalo ngenyanga kaNhlolanja lapho uHulumeni etshela izwe lonke ukuthi kuzofakwa imali engakanani kulowo nalowo mnyango, izifundazwe nakomasipala abahlukahlukene. Lokho kwenzekile njengenjwayelo nakuwo lo nyaka.
Kusabelomali sangalo nyaka uNgqongqoshe Wezezimali uMnu uTito Mboweni wagcizelela ukuthi isimo sezezimali asisihle nokuthi imali efakwa eminyangweni ehlukahlukene kumele iphathiswe okwezikhali zamaNtungwa. Waphinda washo ukuthi uma singanciphisi imali esiyibolekayo nokusetshenziswa kwemali budedengu, kukhulu okusina kusijeqeza ngoba izinhlangano ezikelisa iminotho yamazwe zisibheke ngehlo lokhozi ngoba neMoodys Credit Rating Agency nayo izosifika kuvobe.
Gubhubhu saqala sezwa ngesifo ukhuvethe esibulala kwasani emazweni aphesheya kwezilwandle ekuqaleni kukaNdasa nonyaka kwabe sekuzwakala ukuthi sesifikile lesi sifo nalapha ezweni lakithi eNingizimu Afrika. Kwaba sekubakhona isidingo esikhulu sokuthi kwengezwe izimali eningi ukulwa nalesi sifo.
UMengameli uMnu uCyril Ramaphosa wabe esememezela ukuthi leli zwe selifakwe ngaphansi kweState of National Disaster lapho kwaqalwa kwashaywa imithetho yokuthi singabi wuvanzi futhi kungabikho ukucinana kwabantu ezindaweni ezithize. Kuthe uma kwanda abantu abaphathwa yilesi sifo futhi sekushona abanye, uHulumeni wabe esememezela ukuthi akume konke, ihlale phansi ibambe umthetho ngemvalelwakhaya.
Ngosoku okwaqala ngalo imvalelwakhaya zingama-27 kuNdasa wezi-202o iMoodys yamemezela ukuthi isifake iNingizimu Afrika kuvobe, okusho ukuthi yayizoncipha imali etshalwa kuleli zwe ngabatshalimali bangaphandle. Kwalahleka amandla eRandi konakala nokuningi kwezomnotho.
Ukuvalwa kwemikhakha ehlukene yezomnotho, owokuzithokozisa nezemidlalo sekubulele kakhulu umnotho waseNingizimu Afrika kanti ngasoleso sikhathi uHulumeni kumele ufake imali eningi ekulweni nokhuvethe.
UNgqongqoshe uMboweni uthi izwe lingene ntshi ezikweletini kangangokuba kulelo nalelo Randi uHulumeni alikhokhayo amasenti angama-21 asetshenziselwa ukukhokha inzuzo kuphela ezikweletini kungakakhokhwa izikweletu ngokwazo. Kuthiwa izikweletu zezwe zibalelwa ngaphezu kwezigidintathu ezi-R4. Kuthiwa kuzigidintathu ezi-R2 esizozisebenzisa kulo nyaka sizozithola sisebenzisa imali engaphezu kwemali esinayo ngezigidigidi eziyisi-R761.7.
Umqoqi wemali yentela uthi lezi zinkinga zezomnotho nokhuvethe sekulimaze kakhulu ukuqoqwa kwentela kangangoba kusolakala ukuthi bazoqoqa imali engaphansi kwalokho ebebegome ukukuqoqa ngemali engaphansi ngezigidigidi ezingama-R300.
Kuthiwa kuzosetshenziwa imali engangezigidigidi ezingama-R500 ezosiza ukuxhasa abantu namabhizinisi okuzohlukumezeka wukhuvethe. UHulumeni usandise ngezigidigidi ezi-R21.5 imali ezosetshenziselwa labo abahamba phambili ekulwiseni ukhuvethe.
UHulumeni ujabulela ukuthi imali engangezigidigidi ezingama-R41 isisetshenziselwe ukusiza ngama-R350 ngenyanga abantu abangaphezu kwesigidi nesigamu abahlukumezwe yilokhu kuvalwa kwezamabhizinisi amaningi nezomnotho imvalelwakhaya.
UHulumeni ubonge abamabhange amaningi, ababolekisi ngemali, abemishwalense, abamamedical aid schemes kanye nomasitende abaningi ngokuzwelana nabashayekile kakhulu yilesi simo esintengayo sezomnotho kanye nemiphumela emibi yokhuvethe kwezomnotho. UNgqongqoshe ubonge la mabhizinisi ngokuvuma ukuhlela ngendlela elekelelayo ukuthi labo abasezinkingeni ukuthi bangakhokha kanjani ngendlela enciphisa imali ekhokhwayo manje,noma bake bame ukukhokha okwamanje njengoba besezinkingeni kuze kube ngconywana isimo sezomnotho.
Lezi zimo ezimbi kwezomnotho sezibulele kakhulu imisebenzi emhlabeni wonke njengoba izigidi ngezigidi sezitshelwe ukuthi imisebenzi yazo seyiphelile. Lokhu kwenzeka kakhulu nalapha eNingizimu Afrika njengoba sesizwile ukuthi kulezi zinyanga ezintathu kulo nyaka wezi-2020, isibalo salabo abangasebenzi sesinyukele kumaphesenti angama-30.1.
Okunyusa amaphaphu ukuthi lezi zibalo zezinyanga zokuqala zonyaka azifaki lezi zinyanga ezintathu ezandela esikuzo manje, uMbasa, uNhlaba, noNhlangulana, solukhu sangena kumvalelwakhaya. Okunyusa amaphaphu ukuthi miningi kakhulu imisebenzi, izinkulungwane zemisebenzi, esilahlekile kulesi sikhathi sezinyanga ezintathu selokhu savalelwa emakhaya. Sesizwile ukuthi izinkulungwane ngezinkulungwane zizolahlekelwa yimisebenzi e-Edcon, kwaSAA, kwaSABC, eSA Express, emahhotela amaningi angeke asavula ngemuva kwemvalelwakhaya.
UNgqongqoshe uMboweni uphethe ngokuthi kumele sisebenzize lesi sikhathi sezinkinga zokhuvethe ukuthi sishaye isixaxambiji ukwakha kabusha umnotho waseNingizimu Afrika.