I-ICC isika nxazonke
Kulokhu iNkantolo yamazwe ayikhethi phela emasini njengoba igadla nase-United States of America.
Ngesonto eledlule, kwenzeke okungasavamile emazweni ase-Afrika lapho bekuwuqhube manikiniki phakathi kweKenya neDjibouti kweyokuba yilungu lesikhashana le-United Nations Security Council (UNSC). Akujwayelekile ngoba sekwaphela iminyaka amazwe ase-Afrika, ngaphansi kwe-African Union (AU), ekwazi ukufakana imilomo ngasese bese evumelana ukuthi yiliphi izwe noma amazwe azomela izwekazi ku-UNSC uma kufika isikhathi sokuthi kunyulwe amalungu amasha esikhashana e-UNSC. Kungabe lokhu okwenziwe iKenya neDjibouti okungamazwe angomakhelwane ngoba abuya esifundazweni esisodwa kusho ukuthini? Ake siqale sichaze ukuthi lezi zihlalo ezi-3, nokukhuluma ngazwi linye ngaphambi kokhetho kubaluleke ngani kwawaseAfrika.
I-UNSC inamalungu ali-15, okubalwa ama-5 anezihlalo ezingunaphakade, okuyiChina, iFrance, i-United States of America (USA), i-United Kingdom (UK), kanye neRussia. Bese kuthi lawa ali-10, akhethwa njalo emveni kweminyaka emibili, nalapho i-Afrika inezihlalo ezi-3. Okhethweni obelubanjwe yi-UN General Assembly (UNGA) ngesonto eledlule, okuyiyo eqoka amalungu esikhashana e-UNSC, bekumele i-Afrika ikhethe izwe elilodwa elizongena esihlalweni esizoshiywa yiNingizumu Afrika ekupheleni kwalo nyaka okuhambisana nenqubomgomo ye-UN.
Noma lezi zihlalo ezi-3 zingezesikhashana zibaluleke ngendlela eyisimanga e-Afrika ngoba izingqinamba eziningi ezidingidwa yi-UNSC ngezibhekene nokwenzeka ezwenikazi. Lezi zihlalo ziphinde zibalulekele ngoba la mazwe ama5 agweve nalezi ezingunaphakade, kuba khona amahlandla lapho ake adinge ukusebenzisa lawo angezihlalo zesikhashana ukufeza izinjongo zawo kweyobudlelwano bamazwe omhlaba, nasezinqumweni ezithathwa yi-UNSC. Yingakho abaholi bamazwe ase-Afrika babona kungcono ukuthi, ukuze kuqiniswe ubumbano e-Afrika, kumele bavumelane ngamazwe azosekwa ngaphambi kokuba kushaye isikhathi. Phezu kwalokho, lesi sinyathelo siphinde sigcizelele ekutheni izwe eliba ku-UNSC kumele lizithathe njengelimele i-Afrika yonkana hhayi izifiso zalo kuphela. Kwenzeke kanjani-ke ukuthi la mazwe amabili, ehlukele ukulandela uhlelo olumiswe? Imibono nezizazathu ziyashayana ngokuthi kufinyelelwe kanjani kulesi simo.
KuNcwaba ngonyaka owedlule, isiGungu Samanxusa (Permanent Representatives Committee) amele amazwe ase-Afrika ku-AU, avotela iKenya ukuthi koba yiyo ezongena esihlalweni mhlazane iNingizimu Afrika ishenxa ekupheleni kwalo nyaka. Kule voti, iDjibouti kwabe kuyimbangi yeKenya. Emveni kwale voti kwacatshangwa ukuthi udaba seludlulile, kepha ekuqaleni kwalo nyaka, iDjibouti yakuveza ukuthi izoqhubeka nokukhankasela ukuthi ivotelwe ngamalungu e-UN uma sekufike isikhathi. Iveza lokhu iDjibouti yathi ngokwazi kwayo isinqumo sezwe okumele limele i-Afrika ku-UN, sithathwa iNgqungquthela Ye-AU ehanjelwa oMengameli, hhayi isiGungu Samanxusa. Lesi sikhalo seDjibouti noma sizwakala uma kulandelwa inqubomgomo kepha asinaso isisindo ebesingaze sidale ukuthi ubunye izwekazi ebeselidume ngabo uma kufika isikhathi sokuvotela amalungu amasha i-UNSC, buthintibezeke.
Ukungehleli ngezansi kweDjibouti kugcine sekuvula igebe amazwe aseNyakatho azame ukulisebenzisa ukuze eseke izwe alibona njengalelo elizohambisana noma kube lula ‘ukulilawula’ uma kuhlangenwe kuUNSC. Isibonelo, zikhona izinkomba zokuthi iChina, noma inobudlelwano neKenya, ibingenankinga ngokuthi kube yiDjibouti okuyiyo kuphela lapho iChina inenkambu yamasotsha ayo. Emkhankasweni wayo, iDjibouti iphinde yazama ukusebenzisa ubudlelwano enabo nenhlangano i-International Organisation of La Francophonie (OIF) eyilungu layo njengamanye amazwe ayengamaKoloni e-France. Zikhona nezinkomba zokuthi iFrance beyeseka iDjibouti ngoba isondelene kakhulu nayo, nokuphumelela kwaleli lizwe bekusho ukuthi womathathu ase-Afrika, kubalwa iNiger neTunisia abezoba ku-UNSC ngonyaka ozayo angamalungu ale OIF eyasungulwa yiFrance.
IDjibouti iphinde yazama ukunxexa amalungu e-Arab League, nayo okuyinhlangano eyilungu layo. Ngakolwayo uhlangothi, iKenya isebenzise ubudlelwano namazwe ayingxenye yeCommonwealth, okuyinhlangano yamazwe ayengamakoloni e-UK, kodwa yase isabalala yaxhumana namazwe aseLatin America nezinye izifunda emhlabeni. Emkhakasweni wayo, iKenya ibigxile ekutheni yiyo eyathwalwa ngeqoma yi-AU, yingakho kumele yesekwe ngamanye amazwe omhlaba. Njengoba ibingekho efuna ukugoba uphondo, kugcine sekufinyelele ekutheni i-UNGA ikhethe phakathi kwala mazwe amabili, nalapho kugcine kuphumelele iKenya, nethole amanani ali-129, iDjibouti yona yathola angama-62.
Lo mcintiswano phakathi kweKenya neDjibouti ubungenasidingo. Kumele i-AU ithathe isifundo kulokhu sokuthi kubalulekile ukwenza izinto ngendlela okulindeleke wonke amalungu ayo alindele ngayo. Kodwa ngoba isidlullile, asethembe ukuthi iKenya izokwenza ngakho konke ukuthi yeseke ngokugcwele izinhlelo nezinqumo ze-AU ngokumele kwenzeke ku-UN, iphinde isebenzisane ngokubambisana nalamalungu amabili avela e-Afrika. - nguSenzo Ngubane