Inkantolo ngabokufika
INkantolo Enkulu iyalele uNgqongqoshe uLindiwe Zulu ukuba akahlelele nabokufika imali yesibonelelo ezoqala ukubalwa ngosuku lwesinqumo. Bayithole isikhathi esanqunywa nguMengameli.
NgoLwesine zili-19 kuNhlangulana wezi-2020 uMehluleli waseNkantolo Enkulu ePitoli, uSelby Baqwa, ukhiphe isinqumo esiqubule imibono eyahlukene ezakhamuzini zaseNingizimu Afrika esiphoqa uHulumeni ukuba anike abantu bokufika ababhace kuleli nalabo abanezimvume eziyisipesheli isibonelelo esisiza labo abakhahlanyezwe ukhuvethe.
INkantolo iyalele uHulumeni ukuba ufake laba bokufika abasuka eLesotho, e-Angola naseZimbabwe kulabo abazohlomula kulesi sibonelelo sama-R350.
Emyalelweni wakhe uMehluleli uBaqwa uthe umthetho owenziwe uNgqongqoshe Wezokuthuthukiswa Komphakathi uLindiwe Zulu awuhambisani noMthethosisekelo wezwe njengoba ushiya ngaphandle ababhaci nalabo abanezimvume zokuba kuleli.
Ube esebekela uNgqongqoshe uZulu izinsuku ezinhlanu ukuba abale izindleko zokufaka laba kulesi sibonelelo nezinye izinsuku ezinhlanu ukuba ashicilele izichibiyelo kulo mthetho. NgokoMnyango ilinganiselwa ezigidini ezingama-R700 imali ezosetshenziswa uma sekufakwe laba bokufika kulesi sibonelelo.
UMehluleli uBaqwa uyalele ukuthi izicelo zalabo okubafanele ukuba bathole lesi sibonelelo zithathwe ngokuthi ziphasiswe ngomhla zili-18 kuNhlangulana wezi-2020.
Kuze kufikwe eNkontolo nje inhlangano engenzinzuzo, iScalabrini Centre of Cape Town, emele abokufika kuleli, ngomhla zingama-22 kuNhlaba wezi-2020 yafaka isicelo eNkantolo ikhulekela ukuthi iphoqe uHulumeni ukuba ubandakanye laba bokufika esibonelelweni esisiza abakhahlanyezwe ukhuvethe. UMehluleli uBaqwa ube esekhipha lo myalelo emuva kokulalela lesi sicelo ngalo uLwesine lomhla zili-18 kuNhlangulana wezi-2020.
Uthe labo izicelo zabo eziphumelele kuyomele bakhokhelwe futhi kuthahwe njengokuthi izicelo zabo ziphasiswe ngalo lolu suku lwesinqumo.
Laba bokufika nabo bakhahlamezeka kakhulu emuva kokuthi uMengameli wezwe uMnu uCyril Ramaphosa ememezele umvalelwakhaya ngenxa yokhuvethe. Iningi labantu abangabokufika kuleli lisebenza ezindaweni ezifana namahhotela nezindawo zokucwala kwezinwele okungamabhizinisi ashayeke kakhulu.
Isibonelelo sama-R350 samenyezelwa nguMengameli uRamaphosa mhla zingama-21 kuMbasa wezi-2020 njengenye yezindlela zokwelekelela esimweni esiphuthumayo. Le mali izokwamukelwa izinyanga eziyisithupha.
Ngaphambi kokuba iNkantolo ikhiphe lo myalelo, ngokokugunyazwe uMnyango Wezokuthuthukiswa Komphakathi lesi sibonelelo besitholwa kuphela ngabantu abangumsinsi wokuzimilela eNingizimu Afrika, abahlala kuleli ngokugcwele nababhaci.
Emaphepheni abefakwe eNkantolo yiScalabrini Centre uMqondisi omkhulu wayo uMarinda Madikane, uthe akuwenzi umqondo ukuthi labo abeze ngokubhaca kuleli nabanezimvume eziyisipesheli abaphuma eLesotho, eZimbabwe naseAngola bebeshiywe ngaphandle kulesi sibonelelo wengeza ngokuthi bebeshaywe ngesithende nasekutholeni olunye usizo olufana nezijumbana zokudla futhi bengenazo izinombolo zomazisi baseNingizimu Afrika.
Uqhube wathi njengoba izinkampani zivaliwe ngenxa yokhuvethe, laba bokufika bebengasebenzi futhi bevalelekile bengakwazi ukuya emazweni abo njengoba nemingcele ivaliwe.
Le nhlangano ithi ukubandlulwa kwalaba bekwenziwe ngaphandle kwezizathu ezifanele futhi kungawenzi umqondo ngoba bebevele bekhona kuleli ngokusemthethweni.
Emasontweni ayisithupha okuqala izwe livaliwe, le nhlangano ithole izingcingo eziyi-1400 zivela kubantu ebamele abebecela ukusizwa ngokudla, ngemali yerenti nogesi.
Emuva kwalesi sinqumo seNkantolo esitatimendeni iScalabrini Centre ebimelwe uNorton Rose Fulbright, ithe bonke abafaka izicelo, njengoba kulindeleke kwabanye, bazocutshungulwa yiSouth African Social Security Agency (SASSA) ukuqinisekisa ukuthi bayahlangabezana nemigomo efanele okuwukuthi akufanele kube nenye imali abayitholayo, isibonelelo noma olunye usizo kwaUnemployment Insurance
Fund
(UIF).
Abantu abanelungelo lokuba kuleli abangababhaci nabanezimvumo eziyisipesheli amaphepha abo ayengakaphelelwa yisikhathi ngesikhathi kuqala iNational State of Disaster bangakwazi ukubhalisela lesi sibonelelo.
Kumele baveze amaphepha abo abawanikwe uHulumeni wakuleli.
Okhulumela iSASSA uPaseka Letsatsi ukuvumile ukuthi bezingena zilakanyana izingcingo emahhovisi abo zivela kubantu abakhala ngokuchithwa kwezicelozabo
Uthe indlela esemthethweni yabalungele ukuthola lesi sibonelelo yafakwa emabhukwini kaHulumeni mhla ziyisi-9 kuNhlaba wezi-2020. Abantu abafanelwe ukusithola kumele kungabi ngabamukela esiqondene nabo, esezingane abazinakekelayo, abangatholi uxhaso lwemali yokufunda evela kuHulumeni, abamukeli imali kwa-UIF noma imali yolunye uhlobo. UMnyango Wezasekhaya yiwo ozobe ucubungula izicelo.
Kubalulekile ukukugcizelela ukuthi lesi sinqumo kasisho ukuthi uHulumeni akafake ababaleke emazweni abo ngenxa yezimpi nezinhlekelele zemvelo ngoba bebevele besithola lesi sibonelelo. Kunalokho sithinta ababhaci nabanezimvume eziyisiphesheli abasuka eLesotho, e-Angola naseZimbabwe.
Lokhu kuphoqa uMnyango ukuba uchibiyele umthetho ukuba ufake igama elithi “Holders of Special Permits Under the Special Angolan Dispensation, Lesotho Exemption Permit Dispensation, Zimbabwe Exemption Permit Dispensatio ne-Asylumseekers” ozimvume zabo kuSigaba 22 ebezingakaphelelwa yisikhathi mhla zili-15 kuNdasa wezi-2020.
Ongoti bezomnotho bathi lesi sinqumo sizofaka ingcindezi kwezezimali eNingizimu.
- nguSabelo
Mbatha