Lugadle nasemithini emikhulu ukhuvethe eLatin America
UKhuvethe luqhubekile nokubeka isithombe sokuthi alukhethi bala noma izinga lempilo. Lokhu kugqame ngesikhathi kuvela izindaba zokuthi uMengameli uJuan Orlando Hernández waseHonduras usehlabekile. Akugcinanga lapho ngoba kuvele nokuthi nomkakhe u-Ana García de Hernández kanye nabasizi bakhe ababili bahlabekile. Ngenxa yempilo uHernández udluliselwe esibhedlela ngesonto eledlule. Usengene ohlwini lwabaholi bamazwe okwatholwa ukuthi banokhuvethe nokho belashwa, kubo okubalwa uNdunankulu waseBritain uMnu uBoris Johnson, uNdunankulu waseRussia uMnu uMikail Mishustin kanye noNdunankulu wase-Armenia, uMnu uNikol Pashiyan.
Isifunda iLatin America singaphansi kwengcindezi njengoba iWorld Health Organization, ithi lesi sifunda sesinesibalo esikhulu njengoba abantu abayizi-1 500 000 sebehlabekile nabangaphezu kwezi-70 000 bebhubhile. EHonduras abantu abayizi- 10 000 kuqinisekisiwe ukuthi bahlabekile kanti abangama-330 babhubhile.
Kwenzeka lokhu nje izwe beliqala ukuvula kusuka mhla ziyisi-8 kuNhlangulana emuva kwezinyanga livaliwe ngenxa yokuzama nokunqanda ukusabalala kokhuvethe. Kusesekuseni ukusho ukuthi ngabe abantu bakuleliya lizwe bazoguqula yini umbono abanawo ngoMengameli njengoba egula emva kombono kwenye ingxenye yezwe ukuthi akehle esikhundleni kulandela ukutholakala komfowabo uMnu uJuan Antonio Hernández enecala lokuhola ukushushumbiswa kwesidakamizwa iCocaine.
Lo mfo waphinde wasolwa ngokusebenzisa imali yezidakamizwa ukulawula ukhetho lwesobumengameli ngeminyaka yezi-2009, owezi-2013 nowezi-2017. Kodwa uMengameli uHernández osebuse leliya lizwe kusuka ngowezi-2014 uyaziphika zonke izinsolo zobugebengu ngasohlangothi lwakhe. Nakubashayimthetho bamazwe ukhuvethe alushalazi ngoba e-Iran nje kuphela lugadle kwabangama-24, ababili bashabalala.
Ngonyaka wezi-2017 unqobe ukhetho ngaphansi kwezinkulumo ezithi ulwebile. Lapha zombili izimbangi zathi zinqobile kepha i-United States of America enokuzwelana nepolitiki yakuleliya lizwe yamukela uHernández’s njengonqobile yize izinkulungwane zabantu zabe zikhala. Izwe eliwumakhelwane iBrazil nalo libhekene notavatava njengoba kuyilo kulesiya sifunda elizihola phambili ngesibalo sabahlabekile.