Impikiswano ngokhuvethe ixoshise uNgqongqoshe
UMengameli waseChile, uMnu uSebastian Pinera, ngesonto eledlule ukhiphe esikhundleni uNgqongqoshe Wezempilo uJaime Manalich emuva kokuphikisana okuqubukile kuleliya lizwe ngezibalo zabantu abashona ngenxa yokhuvethe. UPinera usole uManalich ngokungenzi mizamo yokwenza umsebenzi wakhe onzima futhi omuhle wokuvikela impilo yabantu baseChile. Kukhona lokhu uMengameli uPinera uphinde waveza ukuthi lesi sikhundla sesizobanjwa nguMnu u-Oscar Enrique Paris oyisifundiswa futhi ongudokotela.
Lokhu kushintsha kwezikhundla kuqhamuke lapho leliya zwe lisenyangeni enzima kakhulu ngenxa yokwanda kwezibalo zabantu abanokhuvethe nasebebulewe yilelisi sifo. Kuqala isonto izibalo bezikhomba ukuthi abantu abayizi-250,767 banalesi sifo kuthi abayizi-4 505 sesiba bulele okubeke leliya zwe njengelinye elihamba phambili eLatin America kwabantu abanalesi sifo.
UManalich, onguchwepheshe wezinso owake wahola esinye sezibhedlela eziphambili eChile, ukukhishwa kwakhe kulesi sikhundla kushiye imibuzo kwabathile ngenxa yokuthi usanda kuthola udumo ngomkhankaso wakhe wokugcina izibhedlela zihlinzekwa ngama-ventilator, izinto zokuzivikela nokuhola izithangami zabezindaba ezazibalulekile nsuku zonke. Kepha kuke kwaba nemibiko eqhubekayo mayelana nokuxabana kwaboMnyango Wezempilo naye uManalich uke wathola ukugxekwa kakhulu ngabezepolitiki , izimeya, ochwepheshe bezokwelapha nezinhlangano zomphakathi ngokwenqaba ukukhipha imininingwane ethe xaxa yokutheleleka kwabantu ngokhuvethe, ukufaka imvalelwakhaya nangezinguquko ezilandelanayo zokuqoshwa kwabashonayo nase bethe lele k i le.
Emasontweni adlule iwebhusayithi ephenyayo yakuleliya zwe iCiper, ibike ukuthi Umnyango Wezempilo waleliya zwe utshele iWorld Health Organisation(WHO) ukuthi leliya zwe linabantu abayizi-5 000 asebebulawe ukhuvethe. UMnyango ubike lezi zibalo kule nhlangano kanti kuzo kukhona nabantu ababesolwa ukuthi babulawe ukhuvethe ubufakazi bungakatholwa.
UNgqongqoshe omusha uParis wayengumholi we-Chilean College of Doctors (Colmed). UMnu uJosé Miguel Bernucci onguNobhala kazwelonke weColmed ukwamukelile ukuqokwa kukaParis athe kuzoshintsha indlela leliya zwe elibhekene ngayo nalolu bhubhane.