Izisebenzi zasesibhedlela zihlalele ovalweni
Zinetwetwe izisebenzi zaseIsipingo Hospital ngokutheleleka ngokukhuvethe.
Umhlengikazi wakulesi sibhedlela wathinta leli phephandaba ngesonto eledlule waveza ukuthi abaphathi balesi sibhedlela esizimele babafihlele ukuthi abanye ozakwabo abali-14 batholwe benalesi sifo.
Lo mhlengikazi wathi nodokotela ababili batholwa ukuthi bathelelekile kodwa kwaqhutshekwa nokusebenza sengathi akonakele lutho.
“Le nto iqale ewadini laseTheatre nelaseTrauma lapho abahlengikazi betholwe ukuthi sebethelelekile. Okusicasulayo ukuthi abaphathi bethu bathule sengathi akonakele lutho. Ukusebenza ngaphansi kwalesi simo kubeka impilo yethu engcupheni ngoba nathi phela singatheleleka,” kusho lo mhlengikazi.
Omunye umsebenzi uthe ukufihla kwezikhulu kungabancikiselela ngomsebenzi.
“Siyasaba ukuthi lesi sibhedlela sizovalwa siyohlala emakhaya njengoba kwenzekile ezibhedlela ezinjengeSt Augustine, iKingsway neStanger. Ngendlela esiphethwe ngayo lesi sibhedlela asazi sizohola imali ephelele yini uma sivala noma sisebenza izinsuku ezincane. Mhlawumbe kuzoba ngcono uma lolu daba lungavela ukuze abaphathi babone ukuthi le nto yabo isiyaziwa yizwe lonke,” kusho umthombo.
Ngesonto eledlule leli phephandaba lathumela imibuzo emnyangweni wezokuxhumana walesi sibhedlela mayelana nalezi zinsolo kodwa kwacweba iziziba.
Kodwa ngoLwesibili uMnu uVishnu Rampartab, oyiGroup General Manager kulesi sibhedlela, ukhiphe isitatimende ekhasini likaFacebook lesibhedlela esithi: “Abaphathi be-Isipingo Hospital sebeyazi ngemibiko yabezindaba engelona iqiniso esisabalele mayelana nokutheleleka kwezisebenzi lapho zisebenza khona. Sifisa ukukucacisa ukuthi silandele imigudu efanele sazisa uMnyango Wezempilo neNational Institute of Communicable Diseases (NICD) mayelana nokutheleleka. Esikwenzile ukuthi labo abathelelekile baceliwe ukuthi bahlale ngabodwana kanti abaphathi balokhu besiqaphe njalo isimo sabo. Kuyasithokozisa ukuveza ukuthi isimo sabo sesingcono kunasekuqaleni njengoba belulama. Akulona iqiniso ukuthi labo abahaqekile baphuthunyiswa egunjini labagula kakhulu njengoba besekubikwe kanjalo kweminye imithombo yezindaba. Izindawo ebekusebenza labo abathelelekile sezihlanziwe zahlonzwa njengoba nezikhulu zoMnyango Wezempilo nabeNICD babikelwa. Singakuqinisekisa ukuthi isibhedlela siyaqhubeka nokuhlolwa kwezisebenzi nsuku zonke.”
Lesi sikhulu sibuye saveza ukuthi njengoba bekuvaliwe ngenxa yemvalelwakhaya, asikho isisebenzi esingaholanga yize ezinye zingalubhadanga futhi ezinye zisebenze izinsuku ezimfushane. Siqhuba sithe bayilandelile imigudu yoMnyango Wezezisebenzi ngokusiza izisebenzi ukufaka izicelo zemali ye-Unemployment Insurance Fund (UIF) ngaphansi kweTemporary Employer / Employee Relief Scheme (TEERS).
Kunxuswe isisebenzi esifuna ukucaciseleka ngokuthile ukuba sixhumane ngqo nehhovisi lesibhedlela ngezikhathi zomsebenzi.
Owayeyisikhulu soMnyango WezoLimo NokuThuthukiswa Kwezindawo Zasemakhaya, uDkt uSiphiwe Felix Mkhize, useboshwe ngoKlebe ngenxa yenkohlakalo.
UCapt uSimphiwe Mhlongo, okhulumela Oklebe uthe uMkhize kanye nozakwabo uMnu u-Erick Zondi, baboshwe bavela eNkantolo yeMantshi yaseThekwini ngamacala enkohlakalo izolo ngoLwesine.
Ngokusho kukaMhlongo, kusolwa ukuthi kusuka ngoLwezi wangonyaka wezi-2016 kuya kuMasingana wangonyaka wezi2017, laba bobabili kade baqala ukwenza inkohlakalo ngaphansi kwenkampani kaZondi ebizwa nge-Ikhwezi Protection Services, eyathengela uMkhize imoto yohlobo lweFord ebiza izi-R541 800.
UMhlongo uthe abasolwa bavele kafushane enkantolo badedelwa ngebheyili. Kulindeleke ukuthi baphindele enkantolo mhla zingama-28 kuNtulikazi nonyaka.