Banikela enkantolo bekhala ngesondlo esingaphumi
Sebevukela ukuyogqigqa eNtuzuma Regional Court onina bezingane abangaphansi kweINK eThekwini beyobuza ngemali yesondlo okumele bayithole.
I-INK yakhiwe amalokishi iNtuzuma, Inanda noKwaMashu kanti amacala athuthelwa kule nkantolo eseduze kwenxanxathela yezitolo iBridge City.
IBAYEDE ithintwe onina bezingane bekhathazekile becela ingenelele ngoba sebekhathele ukuhambela amahhala beyothola ukuthi isibhajwephi imali ebingena kahle esikhathini esiphambilini.
Babalelwa emashumini amabili abesifazane abathi bahlukumezekile ngoba izisebenzi zophiko lwezondlo zakule Nkantolo eseduze zibanika izimpendulo eziningi esezibadide amakhanda.
Abanye abasebenzi kanti abanye baqoma ukulova ematohweni banikele eNkantolo ngethemba lokuthi bazogoduka nempendulo ezobajabulisa.
Kodwa bathi sebevamise ukubuyela emakhaya bebhalwe usizi ebusweni.
Omunye wesifazane, ocele lingadalulwa igama lakhe ngoba evikela umntwana wakhe womfana, uthe usezogugelwa izicathulo egqigqa eNkantolo.
“Esikutholile ukuthi obaba bezingane zethu bayabanjelwa imali yesondlo emisebenzini yabo kodwa iNkantolo ayiyidluliseli kithina.
Sikhuluma nje abanye bethu bagcine ukuyithola ngoMasingana. Uma uya eCash Hall kwesinye isikhathi kuthiwa imali ikhona uzoyithola kulelo sonto, lutho ukuyithola bathi abayitholanga emsebenzini kababa wengane.
Sibona ukuthi abayisweli into abazoyisho nje ukuze ucikeke uze uhambe,” kusho lona owesifazane ngokukhathazeka.
Omunye wesifazane okulaba abakhalayo uthe ubona izisebenzi zakule Nkantolo zidlala ngabo. Lona wesifazane ubuye wakhala ngokwedelela kwamaphoyisa asebenza kulolu phiko lwesondlo athi ababuza ukuthi kungani behlukumeza amadoda.
Omunye uthe: “Le nto iyasilimaza kakhulu ngoba usuke usuhlele yonke into wenza nesabelomali senyanga kanti nezingane aziqondi ukuthi kungani ekupheleni kwenyanga uthi ayinayo imali yomphako isiya esikoleni,” kusho lona wesifazane ekhombisa ukukhathazeka okukhulu.
Abanye bathi ngale mali akusikhona ukuthi basuke befuna ukuyoyihlaphaza ngokuthenga utshwala kepha basuke benzela izingane zabo ngempela.
Imali ebebeyithola ngokwehlukana ibiqala ema-R500 kuya ema-R750.
Kuthintwa iHhovisi leZobulungiswa Nokuhlumeleliswa Kwezimilo eliholwa uMphathiswa uRonald Lamola, umkhulumeli walo uMnu uChrispin Phiri ucele ukubuyela ephephandabeni ngoLwesihlanu ngehora leshumi.
Etshelwa ukuthi udaba luyaphuthuma, leli phephandaba lishayelwe uNkk uMahlatse Rantji oseHhovisi loPhiko Lwezondlo eMnyangweni Wezobulungiswa Nokuthuthukiswa KoMthethosisekelo.
Ucele ukuthunyelelwa iminingwane yabesifazane ababili noma abathathu ukuze udaba balusebenze. Bethintwa abesifazane bathe bayasaba okwamanje ukudedela iminingwane yabo.
Sezijwayelekile eNingizimu Afrika izikhalo ezimayelana nezinkinga zokuthola imali yesondlo ezinkantolo.
Abanye bakhala ngokuthi abakutholi ukusizakala uma beya khona futhi nezisebenzi zakula mahhovisi zikhombisa ukungabi nalo uzwelo kulabo abasuke beyolanda imali yesondlo.
Okwenzeka lapha cishe kuwumkhuba ojwayelekile ezikhungweni zikaHulumeni ezifana naso lesi, amahhovisi oMnyango Wezasekhaya nalezo zikaMasipala amalungu omphakathi athola kuzona ukusizakala.
Kwezinye izikhathi abantu babuyela emakhaya bengalutholanga usizo ngenxa yokungabi nesineke kwezisebenzi zezikhungo zikaHulumeni.
Nenkohlakalo inomthelela kulezi zinkinga abantu abahlangabezana nazo ezikhungweni zikaHulumeni.