Kusinda kwehlela kuvulwa amahhotela nezindawo zokudla
Umuntu ongakaze abe nebhizinisi angase akuthathe kancane ukuthi kunabantu abavale iminyango yamabhizinisi abo bengazelele, bahlala emakhaya, kwabola ukudla okunye kwadlulelwa yisikhathi kuhlezi emafrijini nasemakhabetheni, kube kuthengwe ngemali. Imvamisa yosomabhizinisi bathenga okuningi ukuze bangalokhu bephindelela beya ezitolo. Izimpahla eziwukudla okuphekwayo zinqunyelwa isikhathi emva kokukhiqizwa ukuthi kumele zibe sezisebenzile ngasiphi isikhathi. Lesi yisimo amahhotela nezindawo zokudla ezizithole zikuso ngesikhathi semvalelwakhaya.
Ukufika kokhuvethe kwenze kwavalwa izindawo ezidayisa ukudla osekuphekiwe nalapho abantu befika bahlale phansi bathamunde izindaba, baphume kumnandi konke. Phela lezi zindawo yizindawo lapho imindeni nezithandani zithola khona ithuba lokudla zingaphekanga, zixoxe indaba ziyiqede kungasukumanga muntu waya kopheka. Imihlangano eminingi seyibanjelwa kulezi zindawo, kuxoxwe kuphuzwa itiye noma isikhathi somhlangano siqondaniswe nesikhathi sokudla ehhotela. Abanye uyaye uzwe bethi bazohlangana kuphuzwe ikhofi, okuchaza ukuthi kuzokube kumnandi. Ukuvalwa kwalezi zindawo kuqede ubumnandi, abantu baphelelwa nayizindawo abangachitha kuzo isikhathi.
Ukusebenza kwezindawo zokudla kusondelene nalokho kwamahhotela. Njengoba kuvulwa ukusebenza kwamahhotela akukavulwa ukudayiswa kweziphuzo ezidakayo. Izinguquko ezilethwe wukhuvethe embonini yamahhotela zenza kube nesidingo esikhulu sokuguqula izindlela obekusetshenzwa ngazo emahhotela. Iningi lamahhotela linabanikazi abakwamanye amazwe, abazibona beshayeka ebhizinisini elisezweni abangekho kulo.
Inkampani yakwaMarriott ezinze kwelase-USA, engabanikazi bamahhotela eProtea imemezele ukuthi izokwehlukana namahhotela amathathu aseNingizimu Afrika, phakathi kwawo okukhona nehhotela iThe Edward eliseThekwini. Amanye amabili ngeliseMagaliesburg, iMount Grace nelinye elisesifundazweni iMpumalanga elibizwa ngeHazeyview. AbakwaMarriott bebewasebenza la mahhotela ngokwesivumelwano nabanikazi bawo iTsogo Sun. Lesi sinqumo basenze ngenxa yengcindezi yokhuvethe nemvalelwakhaya emise ukusebenza kwamahhotela. AbakwaTsogo Sun, abangabanikazi bamahhotela amaningi kuleli lizwe bathembise ukuwavula kabusha la mahhotela ezinyangeni eziyishumi nesishiyagalombili ezizayo.
Abanikazi bala mabhizinisi bese besukumile bethatha izinyathelo zenkantolo ngenhloso yokuphoqa uMengameli uRamaphosa ukuba avule izindawo zokudla kuhleziwe. Phakathi kwalezi zindawo ezivaliwe kukhona ezizimele, lapho abanikazi bazo bengazinqumela ukuguqula indlela okuzolungiswa ngayo ukudla. Abanye babo bese bevele sebenze izinguquko Ngenkathi kuvulelwa ukudayisa ukudla osekuphekiwe. Abantu bese bekwazi ukuthenga bathathe ukudla kwabo bahambe.
Oyisikhulu esiphezulu seRestaurant Association of South Africa, uWendy Alberts, ukubeke kwacaca ukuthi imboni yabo isebenza ngaphansi kwenkulu ingcindezi. Noma sekuvuliwe ukuthenga ukudla ukuthathe uhambe nako, akulibeki ezingeni elifanele ibhizinisi. Ubuchazile ubuhlungu ababhekene nabo osomabhizinisi bokuzibona bengena shi ezikweletini, okungekuhle kule mboni yabo. Engibabona bethanda ukuthwala kanzima yilabo abasemabhizinisini afukanyelwe (franchise) ngoba abazenzeli bona izinqumo kodwa zenziwa zithinte zonke izitolo ezihweba ngalelo gama. Kulezi zitolo umuntu ngeke aguqule ngisho ucezu lwesinkwa asidayisayo ngoba kungalimaza zonke ezinye izitolo ezihweba ngalelo gama. Ngamanye amazwi abanikazi balezi zitolo abanalo izwi eliwujuqu esitolo abasengamele, futhi abakwazi ukwenza noma yiziphi izinguquko abazibona zingavuna indawo abakuyo nesimo sokhuvethe.
Kusobala ukuthi miningi imisebenzi ezolahleka yenze isimo sibe sibi kakhulu ezakhamuzini zaleli lizwe. Ngiyacabanga ukuthi njengoba kuvulwa izindawo zokudla kumele abanikazi babenayo imali yokuthenga ukudla okusha. Njengoba bebekade bengasebenzi izinyanga ezingaphezu kwezimbili, ayikho imali ebeyingena ebhizinisini. Ukusebenza esimweni sokhuvethe kubiza ukulandela imigomo ebekiwe, okudinga abanikazi bamabhizinisi bayigcine. Ukuncishiswa kwesibalo sabantu abavunyelwe ukuhlala badle ngesikhathi esisodwa kunomthelela omkhulu ekuncipheni kwemali ezongena ebhizinisini. Ngokunjalo, ukuncipha kwesibalo sabantu abavunyelwe ukuhlala nokulala ehhotela ngesikhathi esisodwa kuzokwenza umehluko omkhulu emalini engenayo ebhizinisini.
Kunesidingo sokuhlanza izimpahla zokusebenza ngaphezu kokuba bekwenzeka lungakafiki ukhuvethe. Lokhu kusho izindleko ezithe xaxa kunalezo ebezikhona ebhizinisini ngaphambi kokhuvethe. Uma ucabanga amathawula asetshenziswa emahhotela, kuzodingeka ahlanzwe ngokwedlulele manje kunakuqala, okwengeza ezindlekweni zebhizinisi. Kwamanye ala mabhizinisi kuzodingeka kuncishiswe isibalo sabantu abasemsebenzini ngesikhathi esisodwa. Lezi zinguquko zisho lukhulu enzuzweni okulindeleke ukuba yenziwe yibhizinisi.
Isikhathi okuvulwe ngaso amahhotela nezindawo zokudla uhlezi siyisikhathi esibi kuleli lizwe, lapho kwenyuka izibalo zabangenwe yigciwane lokhuvethe kanye nesalabo abadlula emhlabeni ngenxa yokhuvethe. UNgqongqoshe Wezempilo, uDkt uZwelini Mkhize, ukugcizelela cishe nsuku zonke enkulumweni yakhe ukuthi iNingizimu Afrika seyifinyelela kuvuthondaba, lapho bebaningi abazongenwa yileli gciwane.