Intsha yanamuhla ayibhekane nezinselelo zamanje
Sekuphele iminyaka engama-44 kwenzeka isigameko esaduma umhlaba wonke eSoweto, eGoli, lapho intsha eyayibhikishela ukufundiswa ngesiBhunu ezikoleni, okwakuyinto eyayiyifunzwa ngenkani nguHulumeni wobandlululo, elinganiselwa kwengama-176 (kodwa okuhlawumbiselwa ukuthi lesi sibalo safinyelela kuma-700) yadutshulwa yabulawa ngamaphoyisa kwathi ebalelwa ezi-4 000 yalimala.
Kulo mbhikisho wabafundi okwagqama ukuthi intsha yangaleso sikhathi yasukuma ibumbene eyesilisa neyesifazane yalwela ilungelo layo. Leli gazi elaphalala laholela ekutheni umhlaba wonke ubone isihluku sikaHulumeni wobandlululo owawuphethe ngaso aboHlanga.
Akuzange kube khona ukwahlukaniswa kwentsha ngokobulili kanjalo nawo amaphoyisa obandlululo ngesikhathi evulela inhlamvu kawazange akhethe bulili.
Kule nyanga uNhlangulana ephethwa ngesonto elizayo iNingizimu Afrika ibibungaza intsha kusukela kulesi sigameko samhla zili-16 kuNhlangulana we-1976.
Intsha yakuleli, eyesilisa neyesifazane, bekufanele ukuba igubha le nyanga ebaluleke kakhulu kuyo ngokuthi ibambisane ukulwa nezinselelo ebhekene nazo okuwukungasebenzi, ububha nezifo ezinhlobonhlobo.
Lesi sikhathi sifike lapho umhlaba wonke ugubuzelwe wubhubhane ukhuvethe. Ngakho-ke bekulindeleke futhi ukuthi intsha isebenzise leli thuba ukufakana imilomo ukuze iqhamuke nezindlela zokugwema ukuthi leli gciwane lingabhebhetheki.
Kunalokho kubonakale okunye, kubulawa abantu besifazane ngesihluku esimangalisayo.
Okuqaphelekile ukuthi iningi lababulewe kube yintsha ebulelwe kanti abasolwa ngokwenza lokhu yiyo futhi intsha.
Noma kungacaci ukuthi lezi yizenzo zobugebengu noma okunye, kepha okuvelile ukuthi abenzi bokubi ngabantu abasondelene nezisulu okungaba ngabantu abebebambisene nazo kwezothando.
Kuyo le nyanga umzimba owawunamanxeba okugwazwa kaTshegofatso Pule owayenezinyanga eziyisi-8 ekhulelwe watholwa ulenga esihlahleni esisehlathini eRoodepoort eGoli. Esinye isidumbu sowesifazane sitholwe silahlwe ngaphansi kwesihlahla eDobsonville khona eGoli. KwaZuluNatal nase-Eastern Cape nakhona kutholwe izidumbu zabesifazane zilahlwe esigangeni.
Izigameko ezifuze lezi singazibala kuze kushone ilanga. Kungani intsha yanamuhla yehluleka ukuhloniphana njengoba kwenza eyaseSoweto eyabhikisha ihuba ihubo elilodwa?
UMama uBusisiwe Shabangu waseSoweto owayeyingxenye yalo mbhikisho phambilini uke wakuveza ukuthi babebaningi abesifazane ababamba iqhaza kulo mbhikisho.
Uthi abesifazane ababe khona baklama indima enkulu empumelelweni yawo kangangokuthi kwezinye izikhathi babevikela ozakwabo besilisa ngezikhathi zemihlangano kulungiselelwa lolu suku. Uveza ukuthi abesilisa babeba ngaphakathi emhlanganweni kuthi abanye besifazane bahlale ngaphandle okuyothi uma kukhona okwenzekayo okungaphazamisa babaqwashise ngokushesha.
Ukhumbula kahle ukuthi kwakungekho ukwahlukana phakathi kwabafana namantombazane futhi babehloniphana.
Uma ubuka isithombe esaduma umhlaba wonke esathathwa umthwebuli, uMnu uSam Nzima, kusona okubonakala uMbuyisa Makhubo ethwele umzimba kaHector Pieterson owayedutshulwe ngamaphoyisa ngosuku lombhikisho waseSoweto, eceleni kukaMbuyisa kuvela owesifazane u-Antionnette Sithole owayekhala naye owayeyingxenye yombhikisho. Okucaca ngalona wesifazane ukuthi ukuba wayenawo amandla wayezozifikela mathupha emaphoyiseni ayedubule uPieterson ngenxa yokuthi owesilisa nowesifazane kwakuyinto eyodwa nehloniphanayo kubona.
Pho-ke kuvelaphi lokhu kungahlonishwa kwentsha yabesifazane ngalolu hlobo okwenziwa ngeyesilisa okufanele engabe iyabavikela?
Njengokubaluleka kwabesifazane emzabalazweni wangowe-1976, namanje basabalulekile emzabalazweni wokulwa nezinselelo ezibhekene nentsha yanamuhla.
Imvamisa yezisulu zalokhu ngabesifazane abasezikhungweni zemfundo ephakeme okulindeleke ukuba imfundo yabo iklame indima enkulu ekuthuthukiseni iNingizimu Afrika. Yibo laba besifazane okubhekwe ukuthi babambe iqhaza ekubuyiseleni umnotho wezwe esimweni esihle, yibo okubhekwe ukuthi ngemfundo yabo baqhamuke namakhambi okulwa nezifo ezifana nengculaza nalo ukhuvethe. Mancane amathemba okuthi lokhu kusengenzeka njengoba kuhlasele isihlava sokungahlonishwa kwelungelo lomuntu wesifazane lokuphila.
Engabe lona ikhwelo elihlatshwe nguMengameli wezwe, uMnu uCyril Ramaphosa, ukuba izakhamuzi zaseNingizimu Afrika ziliqede leli siko lokuthula uma kunezigameko zodlame olubhekiswe kwabesifazane nokubikwa kwezigilamkhuba emaphoyiseni liyezwakala yini?
Ngaphezu kwale nkinga okukhalwa ngayo ebekene nentsha yanamuhla, kusekhona enkulu okubukeka isho ukuyisobozela okuwutshwala nezidakamizwa. Intsha eningi yanamhlanje ihlaselwe yilesi sihlava esibi okuthi noma kuneminyakazo yokulwela amalungelo ayo singene siyidunge. Umthelela ongemuhle wophuzo oludakayo uhlezi ubonakala uma kunemibhikisho ezikhungweni zemfundo ephakeme lapho kuye kube nezigameko ezifana nokushiswa kwezakhiwo nezimoto okungaqondakali ukuthi kusuke sekwenziwelani ngoba indlela enhle neyamukelekile yokwedlulisa izikhalo ukuxoxisana kuboniswane.
Omunye wabaholi bombhikisho waseSoweto ngowe-1976, uTsietsi Mashinini, kwathi sebebheke lapho okwakuzosukela khona umbhikisho amaphoyisa ebavimba wema phambi kwabafundi wabaluleka ukuba bamashe ngokuthula futhi bangawachukuluzi amaphoyisa, nangempela bamlalela.
Ukuziphatha kwentsha yangalesiya sikhathi kukhombisa ukuthi yayingeke ihlukumeze iphinde ibulale ozwakabo besifazane ngesihluku esesisibona kulesi sikhathi sethu.