Umkhonto ulolwe maqedane wagwaza ekhaya kithina boHlanga
Ngangithi sinamamga isalukazi engahlangana naso zizine kuMfumfu emva nje kancane kokhetho lowe-1994 sithi, “Mntanami ngiyakutshela niyozisola, inina enosho kuqala nithi kwakungcono eGibhithe”. Akekho owasinaka lesi salukazi emakhaya eMpendle nami engangizidlulela kodwa engathi uma sengilandela bathi abangakhona sasiyisangoma esasibhula siqanda ikhanda sibhula ngohlobo lwa‘balozi’. Awuphelanga lowo nyaka ngoba sashona, njengalokhu sasesiziphathelwe ngushukela.
Kuningi osekuvuka namhlanje esengithi uma kwenzeka kubuye lawaya mazwi esalukazi esesazihambela. Namhlanje sibhekene nengwadla yentsha engasebenzi kodwa efundile, sibhekene nokubhebhetheka kokubulawa kwabantu besifazane, izingane, ubhubhane lokuntshontsha nokukhwabanisa, kuwa wena bhizinisi elingaphansi kukaHulumeni waboHlanga, kukhonjwe amakhomishini kuthiwe awaphenye kugcinwe ngakho ukuphenya kodwa ekugcineni kungaboshwa muntu.
Uma ungumuntu ofunde ngaphansi kobandlululo waphinde wasebenza ngaphansi kwalo waba sezikhundleni wabaphatha abamhlophe akulula ungaboni konakalaphi, kodwa safika sathi sozolungisa. Kuningi namhlanje okufanele sikubheke ngeqiniso leqiniso, singaqambi amanga futhi singaphaphathani. Inkinga enkulu ungathi wayengcono uHulumeni wamaBhunu ngoba wawuthi uma ukhulume iqiniso bakuthathe bakuvalele uyovuka eRobben Island, namhlanje likhulume iqiniso, uthathwa njengehlongandlebe, ubhecwe ngokubi, kokunye uma uyincelebana yamathenda kuthiwe asimvaleni. Izona zikhali ezibusayo-ke lezi bese uthola bebaningi abancamela ukuncetheza nabo babemshungu munye emthonjeni wamanga nokwembathisa.
Ake sibheke emuva kancane
Ngesikhathi sobandlululo, ezikoleni kwakukhona izifundo zezenkolo nakuba kwakungeyona inkolo ethize kodwa lokhu ababethi iReligious Studies, kudlule lapho emakhaya izingane zifundiswa isintu namasiko kweluswa, imisakazo lena isembalwa kungekho thelevishini, isonto kusengambalwa kuphela okwakuphunywa njalo kuyiwe khona enkonzweni ngelanga langesonto, nokuyohlola enyangeni kungayi noma ngubani kuyiwa ngoba kuvele umshophi ekhaya. Esikoleni ingane isazisa uthisha, uma imbona igijime ijahe ukuyomphathela isikhwama. Lapha ekwaluseni abafana babefundiswa inhlonipho yokuhloniphana bebodwa, nokuhlonipha amantombazane esigodi njengodadewabo abebelusa nabo abanye babo.
Emveni kwenkululeko
Uma sithatha inkululeko ngonyaka we1994 kuyacaca aboHlanga bagijimisa amandla nezikhundla sakhohlwa ngumnotho nobusemqoka kwawo. Sesize sijahe ukuyongena ephalamende engingeke ngimangale uma kuthiwa kwazikhundla lezo base babelene bebodwa ngasese ababehola. Kuthe sesikhombene ngezikhundla sabuyela emuva sahliphiza konke sangabona ngisho nokuhle okwakwenziwe okungenani ngamaBhunu. Konke akwenzayo asibonanga buhle kodwa sahliphiza sathi sizoqala phansi kanti ekugcineni sizohluleka.
Thatha indaba yasezikoleni, kwavalwa izifundo zezenkolo, kwaguqulwa amagama ezifundo, oBiology kwathiwa oLife Sciences, ezomlando nakuba zazikhuluma amanga kunokuthi sizilungise zabizwa ngenye indlela kokunye kwavalwa. Kwasala amanyuvesi aqhubeka nokuthi angalokuthi athi athatha izindlela zokucabangela umuntu wase-Afrika. Kududulwe izingane ukuthi ziqhubekele phambili, namhlanje zingane lezo imisebenzi ayisekho. Kuvotwa owoHlanga wathenjiswa, amanzi, ugesi kwamahala, wathenjiswa izikhundla okufanele bazithathe kwabamhlophe, nebala abamhlophe babona ithuba lokuthatha imihlala phansi esheshayo, kanti bahamba nalo lonke ulwazi namhlanje esesisele singondinga sithebeni. Muva sesibona ukuthi sibhimbile sesigijime kuqala sababuyisa labo belungu esesibakhokhela enkulu imali sebezosiza njengabeluleki kuzona izindawo ebazishiya.
Kunokuthi sibheke ukuthi umuntu omnyama ikuphi lokhu aphucwa nalahlekelwa khona nkathi yobandlululo okufana namasiko nesintu, akuzange kunakwe. Kunalokho kungene amasonto egeleza njengomfula ezophundla lona leli elaseliphundlekile. Mangaki namhlanje amasonto esiwabona evumbuka njengamakhowe, eshumayelela imali kuphela? Amabandla avalwa axoshwa emazweni akubo agcwele kuleli bakha ebovu imali ngokuduka kwabantu bakithi, nathi sakhekhezela nabo abaholi bethu ngokufua inhlanhla esingazi yalahlekaphi.
Kuvumbuke imisakazo, neziteshi zemisakazo, kodwa okuningi kusesezandleni zabamhlophe. Namhlanje ukuzwa emsakazweni kukhulunywa izinto zesintu ingoba kusuke kuphoqe leso siteshi futhi into engavalwa noma inini. Uma ubheka imidlalo edlalwa komathelevishini idicilela phansi konke okumuntu omnyama, athule uHulumeni awuhlabe inhlali ngoba uyazi ukuthi kuyadliwa kukhona konke lokhu.
Namhlanje sibona intsha engasebenzi, eyathenjswa imisebenzi, kunokuthi bafundiswe bakhuthazwe ukuthi babe ngabaqashi uqobo. Ingane yomuntu omnyama esikhathini sanamhlanje isakhuthwazwa ukufuna umsebenzi kunokuthi ikhuthazwe ukuba ngumqashi bese inikezwa izinsiza zokuthi iqale ibhizinisi layo ukuze ibe nesandla ekuthuthukiseni uMnotho. Namhlanje ihlazo elikhulu uma ubheka izibalo zabomdabu baseNdiya bangaphansi kwezigidi ezimbili kuleli kodwa alikho idolobha bangaphethe umnotho kulona eKwa-Zulu Natal nje kuphela. Akukhona ukwahluleka lokho?
Namhlanje sikhala ezimathonsi kubulawa abesifazane, izingane ezincane kudlwengulwa izalukazi, kuthi kutshontshwe imfuyo okuvezayo lokho abulawe, umbuzo uthi ikhambi lalokhu liphi na? Impendulo ilula ayikho kude, ngabe kusetshenziswa zona lezi zizinda ezikhona imisakazo nomathelevishini, ezikoleni nasemasontweni ekufundiseni umuntu omnyama ngokwakubo. Kungani isifundo sezenkolo, isifundo sezamasiko nesintu komuntu omnyama kungabuyiswa kufundiswe ezikoleni ngokwesikhathi sanamhlanje? Sinomnyango wezaMasiko uBuciko namaGugu nonGqongqoshe wakhona okuyinhlekisa ngisho uthi ukhuluma ngakho.
Namhlanje siqeda inyanga esathi ngeyabantu abasha, kodwa uma lolusuku lwabo lugujwa uthola ezitediyami kukhuluma osopolitiki bekhankasela ukhetho oluzayo besebenzisa ithuba engabe linikezwa intsha. Selokhu kwaqalwa ngonyaka we-1994, usuyazi ukuthi ngalolu suku kuzokhuluma uNdunankulu wesifundazwe, uMengameli bakutshele ngezinto asebenzenzele intsha, kodwa ekugcineni uma ubuza intsha ukuthi lezo izinto abazidingayo yini, uthole bethi abazi lutho ngalezo zinto.
Sesifikile isikhathi sokuthi ake sinikeze intsha yona qobo lwayo ukuthi izikhulumele ngalolusuku lwayo, kube yibona ababeka abakudingayo nezikhalo abafuna ukuthi zilalelwe naye uhulumeni azamukele lezo zidingo.
Izwe lethu lisaqalekiswe ngabaholi abangonontandakubukwa, uba thola bezichwaneke ezingqwembeni zokukhangisa (billboards), ibona phambili ezikhangisweni, zemisakazo engabe leyomali yenzela isizwe okungcono. Ukuzigqaja, kungafuni kutshelwa, nokusebenzisa abantu abangovuma zonke ngoba belambile befuna namathenda ikhona kanye lokhu okona izinto. Kungakho nje kungaboshwa muntu osuke ekhwabanisile, kuphela kuchithwe imali ngamakhomishane ngobe kwenzelwa ukuthi sivaleke amehlo.
Ngikholwa ukuthi sekufike ekugcineni manje, ukhuvethe lukhulu ezoluveza, lukhulu oluzokwenzeka phakathi kwabo bebodwa, bawabhixile ngodaka amathongo oHlanga, isetshenzisiwe imali ukuvala abathile imilomo nokubasa kwaGoqanyawo, kodwa kuyovela, ekugcineni kuyokuba ngesiMhlangana bevukela umfowabo Ilembe, Umkhonto ugwaze ekhaya. Iqiniso ukuthi sizembule thina izinqa nokuthi sinqunu kangakanani njengesizwe soHlanga uma kuyiwa ngasekuphatheni, nasekwengameleni, izinto nezwe imbala.