Amasu okubhaka umbhako ongenasici
Sekukaningana abantu bengibuza imibuzo efana nokuthi kungani ngihlale ngigcizelela ukuthi inhlama ingahlanganiswa ngokweqile noma izithako zingasetshenziswa emva nje kokukhishwa efrijini. Nginesiqinisekiso sokuthi ekubhakeni kwakho kuke kwenzeka umkhiqizo wakho wangaphuma ngendlela obufisa uphume ngayo. Impumelelo ekubhakeni incike ezintweni eziningana ezifana nalezi:
1. Izinga lokushisa lezithako
2. Izikalo okuyizona zezithako ezisetshenziswayo
3. Izingaqho (ikhwalithi) lezithako ozisebenzisayo
4. Ukuthi izithako ozisebenzisa azikadlulelwa yisikhathi na, nokunye okuningi
Kulesi siqephu sanamuhla, sizobheka kafushane ezinye zezizathu ezingenza umbhako wakho ungaphumi ngendlela okungaba ikhekhe liyafadabala phezulu, libukeka livuthiwe ngaphandle kodwa limanzi ngaphakathi okanye livele liqine libe yitshe.
Uma ikhekhe likhukhumala bese liqhekeka noma lifadabala phezulu, nakhu okungenzeka ukuthi konakele: Kungenzeka ukuthi inhlama ihlanganiswe kwaze kweqa. Uketshezi olufakwe ekhekheni belungenele (kungaba amanzi okanye ubisi).
Kubalulekile ukuqinisekisa ukuthi zonke izithako zihlangene ngokuphelele. Qiniseka ukuthi azikho izithako ezizikile zagcina zingahlangene nezinye ngokuphelele.
Uhhavini ubushisa ngokweqile. Uhhavini kufanene useviswe ngokufanele ukuqinisekisa ukuthi usasebenza ngendlela. Uma unganakekelwa uhhavini ungonakala ngendlela yokuthi ungathi uwubeke ku-180°C kanti uzoshisa ngokweqile okanye ngaphansi.
Ipani obhaka ngalo belijule ngokweqile, kanti inani lenhlama lincane.
Izithako kufanele zibekwe ngaphandle kwefriji isikhashana ngaphambi kokusetshenziswa, ukuze ziphole (ikakhulu amaqanda nobisi)
Inhlama ibimanzi ngokweqile. Kuvamile ukuthi abantu babone ngathi inhlama ayimanzi ngokwanele bese bengeza izithako ezingamanzi. Lokhu kuyalona ikhekhe. Kubalulekile ukulandela indlelakwenza ngendlela.
Kungenzeka ukuthi ushukela, amafutha okanye isithako esikhukhumalisayo (njengo baking powder okanye imvubelo) bekukuningi ngokweqile.
Isizathu esivame kakhulu ilapho kuvulwa khona uhhavini ngenkathi ikhekhe lisabhakwa. Ngokwenza lokhu, uhhavini ungenwa umoya ophuma ngaphandle bese udambisa izinga lokushisa kuhhavini, nokuphazamisa ikhekhe.
Uma ingaphandle lekhekhe liba namabala angemahle emehlweni:
Kungenzeka ukuthi ushukela ubuqine kakhulu, ngaleyo ndlela awangahlangana kahle nezinye izithako. Lokhu kuvamise ukwenzeka uma indlelakwenza idinga iCastor Sugar kodwa wena usebenzise ushukela omhlophe.
Inhlama ihlanganiswe ngokweqile. Lokhu kungaholela ekutheni inhlama ibe namagwebu nabe esoma onqenqemeni lwepani lokubhaka.
Ngokuqinisekisa ukuthi konke lokhu onkungenhla akwenzeki, amakhekhe akho ayohlale ephuma ngendlela okuyiyona, ahehe nasemehlweni.
Namuhla sizocobelana ngelinye lamakhekhe engiwathokozela kakhulu (ukuwenza nokuwadla) – ikhekhe elinamaqebelengu kashokoledi.