Sihlola ngesineke iPolo GTI unyaka wonke
Ukuhlala nemoto entsha unyaka wonke kwenza umehluko ekwazini kabanzi ngokuhle nokungaekuhle kwayo. Abakwa VW eNingizimu Afrika basinike ithuba lokuhlola kabanzi iPolo GTI oywezi-2020. Igama elithi GTI livusa uthando olukhulu kubathandi bezimoto ezisesitayeleni emakethe yethu. Kulesi sikhathi sonyaka esizayo sizobona ukuthi kwenziwa yini ithandwe kangaka iGTI.
Uma ubheka isakhiwo sangaphandle uyabona ukuthi abakwaVW bayenze iPolo yalandela isakhiwo sikabhuti wayo omdala, iGolf GTI. Ngaphambili uthola umugqa ombala ubomvu osuka ngaphakathi kwamathoshi unqamule uzu ufike kugrille. Uphawu lakwaVW luthatha indawo phakathi nengaphambili bese kuthi eceleni kube khona uphawu lweGTI ukwazisa oyibonayo ukuthi iPolo esezingeni eliphezulu le. Esiyihlolayo ifakwe amathoshi ayiLED (R13 200 ngaphezulu) enza ikhanyise ebusuku kube sengathi kusemini.
Emaceleni sibona amathayi awu-18 Inch (R6 000 ngaphezulu) aweBrescia ayenza ibukeke kahle kakhulu. Ukhakhayi lweGTI esiyihlolayo lunengilazi evulekayo (R11 900 Panoramic Roof) ethandwa kakhulu abathengi jikelele bamaVW. Ngemumva kukhona amathoshi eLED kanye namapayipi amabili acwebezelayo akhiphe umsindo odume ngelika “Vrrr Phaaa”. Ispoiler siqedela ubuhle obusporty ngesakhiwo.
Isakhiwo sangaphakathi sikuheha ngezihlalo zeGTI kuphela ezikubamba kahle uma ijika emakhoneni ngejubane. Lezi zihlalo zesikhumba zifudumala ngokucindezela inkinobho (R9 950 ngaphezulu) okusiza kakhulu uma kubanda ungena kuyo ekuseni. Ihlala abantu abane ngokunethezeka. Isibuko somsakazo esilawulwa ngokuthinta kuso (Infotainment Touchscreen) sifika ne-Apple CarPlay kanye ne-Android CarPlay. Lokhu kwenza singabikhona isidingo seNavigation njengoba umakhalekhukhwini oneNavigation uyidlilisela kusona isibuko. Inkomba jubane ifika iyidijithali (R9 000 Active Info Display Speedometer) eyenza ibukeke inobuchwepheshe besimanje.
Ifika nenjini eyi 2.0 L eneTurbo enamasilinda amane enamandla angu147kW/320Nm okuyenza isuke ku-0 iye ku-100km/h ngemizuzwana eyisi-6.7 igcine ku-237km/h. Le njini ifaka amandla emasondweni angaphambili ihlangene neDSG enamagiya ayisithupha. Esiyihlolayo ifika neSports Select (R5 500) eyenza ushintshe isimo sokushayela phakathi kukaSport, Eco, Comfort noma Individual.
Kulo nyaka sizokwazisa kahle ngokuthi le moto kungani ihlanyise abagibeli kangaka. Inani layo liba izi-R411 900 okuyenza ibe iHatch yaseGermany enejubane enenani eliphansi. Ugcina ukhokha izi-R8 000 ngenyanga. Hlala nathi nyanga zonke lapho sizokwazisa ngokuthi isiphethe kanjani. Uphinde usivakashele kuYouTube yakwa “iMotoonTV” lapho uzoyibona yenza izimanga edume ngazo iPolo GTI.