Yangakha iChiefs sengakha intsha
Usezinze e-United States of America (USA) owayedlalela iKaizer Chiefs neMamelodi Sundowns lapho esebenza ehhovisi ekolishi abuye abe ngumqeqeshi kanobhutshuzwayo.
UMarco Mthembu, owagijima kula maqembu eminyakeni eyeqile kwengamashumi amabili eyedlule, udwebe isithombe sokuthi unethezekile nomndeni wakhe. Babusiswe ngamadodakazi amathathu.
ETexas College uqashwe njengeHead of Administration abuye aqeqeshe abafana namantombazane bakuleli kolishi.
Ugabe ngeziqu zeBachelor of Business Administration azithole eWilliam Carey University.
UMthembu, owayedlala ngenxele esuka emuva eshoshela phambili, uthi ngemuva kokugcina ukudlalela i-Ajax Cape Town ngowezi-2002 waqoqa imithwalo yakhe wafudukela kwelikaDonald Trump.
Uthi akubanga lukhuni ukuyoqala impilo entsha kwelinye izwe kwazise wayevele eseqalile ukufunda khona.
“Nginobuzwe obubili empeleni. Unkosikazi wami ungowase-USA. Mina ngidabuka eClermont eThekwini omunye umndeni wami usakhona eNingizimu Afrika kodwa sengizinze kakhulu phesheya kwezilwandle ngenxa yomsebenzi,” kusho uMthembu othi usindisiwe ngokwenkolo.
Uthi yize engasekho emehlweni abantu njengoba ayedumile esadlala ibhola kuleli, ukusebenza ekolishi kuyamjabulisa. “Ngiphokophele ekuguquleni impilo yabanye abantu nami ngibe semlandweni ngokuthi kukhona engakuphosayo esivivaneni entsheni yethu. Iyangijabulisa indlela abafundi abangilalela ngayo nokuyinto enginika ithemba ukuthi bazoba wutho ngelinye ilanga,” kusho yena.
Echaza ukuthi wasayina kanjani kuChiefs, uthe: “Ngiyohlale ngimbonga njalo uMdali ngokungipha leliya thuba. Akwandele bani ukudlalela iqembu elinjengeChiefs futhi ungumfana omncane oziqhamukela elokishini elingatheni laseThekwini. Ubaba wami u-Excellent owayedume ngelikaBra Ex nguye owangihlanganisela ukuyozama inhlanhla. USihlalo uKaizer Motaung wanginika ithuba lokuziveza. Kwakuqeqesha uPhilippe Trouiser ngowe-1994. Kuthe sekufike uMuhsin Ertugral ngowe-1999 naye futhi ngamhlaba umxhwele. Yize ngagcina sengidlalela iSundowns lapho ngafika ngahola imali ethe xaxa kodwa kuChiefs yilapho engathola khona ukujabula ikakhulukazi ngezikhathi ze-Operation Vat Alles sishaya kwasani okwakuseduze kwethu. Isicoco seligi kuphela esasiphunyuka ekugcineni.”
Uthi impilo kuChiefs ayibanga lula njengoba hleze abanye bengacabanga. “Kwakunabadlali ababefuna uzizwe ungamukelekile laphaya. Babekukhombisa ukuthi awudingeki eqenjini, bekunyokoloza benze nemigilingwane ongeke uyikholwe. Okubuhlungu ukuthi babengabahlukumezi abelungu kodwa igenge yokufika ezweni yayiphathwa kabi. Kodwa ngenkani yami nanokwazi ukuthi ngangiyeleni laphaya, ngafika ngadlala zangithanda izihlwele nabaqeqeshi. Eqenjini likaTrousier sasinoWedson Nyirenda, uJacob Tshisevhe, uLucas Radebe, uMike Maringa, uDick Amukola, uDavid Modise, uDoctor Khumalo, uBotende Eshele, uFrank Makua, uDavid Nyathi, uShakes Kungoane, uTshepo Molatedi noPollen Ndlanya. Sekufike uMuhsin sinqoba ngisho iMandela’s Cup esekuyiConfederations Cup manje sasiphethe omunye ukhilimu wabadlali. KwakunoJabu Pule, u-Ace Mbuthu, uBrian Baloyi, uNhlanhla Kubheka, uStanton Fredericks, uTenashe Nengomashe, uCyril Nzama, uThabo Mooki no-Arthur Zwane.”