Ibhokisa likhala ngelakwenza kusomankomane
Usomankomane u-Isaac “Angel” Hlatshwayo uthi ukube kwakuya ngaye ngabe akalwanga noJoseph “Smokin’ Joe” Makaringe eminyakeni eli-12 edlule.
Lezi zinsizwa zingomkhaya baseLimpopo. UHlatshwayo udabuka eMalamulele kanti uMakaringe ungowaseGiyani.
Ubuhlobo babo buqiniswa ukuthi babejima ndawonye besalwa esigabeni sama-amesha beqeqeshwa u-Eric Baloyi, owakhiqiza uPhilip “Time Bomb” Ndou noCassius Baloyi abahamba elide ibanga kwezamankomane.
Okwenza uHlatshwayo akhulume kanjena ukuthi waqeda nya ngekusasa likaMakaringe kwezamankomane.
Lokhu kungemuva kokuthi amdida ngesibhaxu wakhala wemuka nesicoco esasingaphethwe muntu se-International Boxing Organisation (IBO) Welterweight e-Emperors Palace eKempton Park, eGoli, ngowezi-2005.
UHlatshwayo uthe: “UMakaringe ungomunye wosomankomane engikhule ngibukela kuye. Ngesikhathi eba umpetha kazwelonke, exebula kwasani okwakuzama ukumhlwitha isicoco, ngangithola ukukhuthazeka kwazise sisuka kude naye. Ngaphambi kwempi yethu eyayiqhathwe uBranco Milenkovic, ngamtshela ukuthi ukube kuya ngami ngabe angiyithathi impi ngoba ngiyamhlonipha. Ngangisefomini enhle kakhulu kanti yena wayesanda kubuya endukwini eGermany. Kwaba buhlungu ukuthi ngaba nesandla ekuqedeni ngaye esibhakeleni.”
UMakaringe, owayeqeqeshwa uNick “Mthakathi” Durandt, wayesesivikele amahlandla alishumi isicoco. Wayegabe ngokuba nesibindi kanti izibhakela zakhe zazifaniswa nesando ngenxa yokusinda.
Ngemuva kwempi yakhe noHlatshwayo wahlolwa kwatholakala ukuthi ulimale kabi esweni lakwesokudla. Wayeka esegingqe amadoda angama-25 kwangama-30 kanti wahlulwa kane.
UHlatshwayo uthi wagcina ukubona uMakaringe ngemuva kokuhlangana eringini. Leli phephandaba lithole ukuthi uMakaringe uphezu kwemizamo yokuvula indawo yokuqeqesha abafana abancane. Ugabe ngeziqu zeBCom azithola esadlala isibhakela eGoli.
UHlatshwayo yena owaphoqeleka ukusiyeka isibhakela ngenxa yokulimala esandleni ngowezi-2013, zike zamunetha ngaphandle kweringi. Wehlukanisa nenkosikazi yakhe ngowezi-2015 kanti wake waveza komunye umsakazo waseGoli ukuthi ukwehlukanisa kwamlahlekisela ngezinto eziningi.
Ngesikhathi esasemgangathweni wawola izicoco eziningi. Waqala ngesikazwelonke kuLightweight ehlwitha uMartin Jacobs eWembley Indoor Arena eGoli ngowezi-2002.
Wasivikela amahlandla amahlanu ngaphambi kokulamanisa ngese-IBO Lightweight exebula umkhaya wakhe uCassius Baloyi eCarnival City, eBrakpan, ngowezi-2005.
Lesi sicoco waqala ukusivikela kuAldo Nazareno Rios wase-Argentina eGoli wadlulela kuNate Campbell eFlorida State Fairgrounds Hall, e-USA, ngowezi-2006.
Ngawo lo nyaka wake wazama ukuphatha eseWorld Boxing Organisation (WBO) NABO kodwa amajaji ayinika uKendall Holt impi kuhlangenwe eHotel Casino, e-Atlantic City, e-USA.
Njengenqama ehlehlayo ukuze ithole amandla, wabuya ngesivinini kwamangala abaningi ngesikhathi eseba umpetha we-International Boxing Federation (IBF) Welterweight ehlula ngamaphuzu uDelvin Rodriguez waseDominican Republic eMohegan Sun Casino, e-USA, ngowezi-2009.
Leyo njabulo yasheshe yaphela njengoba leli bhande lakhala lemuka noJan Zaveck waseSlovenia empini eyayiseWembley Indoor Arena. UHlatshwayo, owayesanda kuxebuka kuDurandt esejoyine uManny Fernandez, wadidwa kwaphela ngaye ngomzuliswano wesithathu. Kusukela ngowezi-2011 uHlatshwayo wehlelwa izinga nokwenza abaningi bathi kumele awagaxe emgibeni amagilavu. Ngemuva komzukuzuku engafuni ukuthatha isinqumo lwagcina lugobile uphondo. Wayeka enerekhodi lokunqoba izimpi ezingama-30 kwezingama-38.