Inhlangano yesibhakela yandisa imingenelo
Sekufakwe umunxa omusha kumaBoxing South Africa (BSA) Awards okusazomenyezelwa usuku lwawo.
Sekuzoba neNewcomer of the Year kanti iChief Operations Officer yeBSA, uNks uCindy Nkomo, ithe lo munxa awufani neProspect of the Year njengoba abanye kungenzeka baqale ukudideka.
“KuNewcomer siqonde ukuhlomulisa osomankomane abaqale ukwenza kahle besakuma-amesha ngaphambi kokungena esigabeni esikhokhelayo. Abazokwazi ukuwungenela lo mbango yilabo abanezimpi ezintathu kuya kwezinhlanu. Kuzobhekwa izimpi abazilwile maphakathi noLwezi mhla lulunye kowezi-2018 nomhla zili-16 kuNdasa kulo nyaka.
Emunxeni weProspect sisuke sibheka labo abangenazo izimpi ezeqile eshumini futhi akudingi ukuthi babe ompetha bezifundazwe noma bakazwelonke ukuze bawungenele lo mklomelo. Nakubona kuzobhekwa izimpi abazilwile ngesikhathi esibekiwe ngaphambi kokuhanjiswa kwamagama emajajini,” kusho uNks uNkomo.
Uphinde waveza ukuthi sebewukhiphile umunxa iMatchmaker of the Year bafaka iRing Announcer engena emnxeni iRadio and Television Personality. Kulo mkhakha kuzoqhudelana uCarol Tshabalala (osesithombeni), uSipho Mashego, uDuncan Pollock, uDevon Currer noShepherd Dyan.
“Abethuli bosomankomane nemiphumela balima enkulu indima ekudonseni ababukeli nabalaleli emakhaya. Okunye esikuhlosile ukuthi sifuna ukwandisa isibalo sabethuli bosomankomane ezweni. AmaMatchmaker awalahliwe kepha angazithola esehlomula ngeChairperson’s Award uma kunomsebenzi omuhle abawenzile.”
ULuyanda Kana nguye ogcine ukugoduka nomklomelo weMatchmaker ngesikhathi umcimbi wenzelwe ePort Elizabeth ngowezi-2018.
Ukuvalwa kokuthunyelwa kwamagama abantu abaphakanyisiwe kungomhla zingama-20 kuNtulikazi kophezulu. Umphakathi, izimeneja, abaqeqeshi nabo osomankomane imbala avumelekile ukuphakamisa amagama eminxeni eli-18 okuzobe kuncintiswana kuyo. IChairperson’s Award iqokwa uSihlalo weBSA uDkt Peter Ngatane yedwa.
Nguye futhi uNgatane namalungu ebhodi abaqhamuka namagama alabo abafanelwe iLifetime neSpecial Achievement.
Emcimbini wokugcina owawuseSandton eGoli, uThulani “Tulz” Mbenge wakhala wemuka nomklomelo wokuba “Honey Bee” Miller wagoduka nofanayo kwabesifazane. U-Ayabonga “Jay Jay” Sonjica wanqoba oweProspect kanti ukhombisile ukuthi akwenziwanga iphutha njengoba ngonyaka odlule eqede esungumpetha kazwelonke kuJunior Featherweight. Umklomelo weKnockout of the Year wanikwa uZolani Tete owangqimuza uSiboniso Gonya kusahanjwe amanenjana empini yeWBO Bantamweight e-UK ngowezi-2015. UColin “Nomakanjani” Nathan wanqoba owomqeqeshi ovelele, uTeris Ntutu weRumble Africa Promotions waklonyeliswa ngowokuba umgqugquzeli ohambe phambili. UTete, uHekkie Budler‚ uMoruti Mthalane neXaba Boxing Promotions ka-Ayanda Matiti baklonyeliswa ngokukhethekile benikwa amaSpecial Awards. Ngokunjalo noThemba Zulu‚ uLes Andreasen‚ uGladys Tsenene‚ uJeff Ellis noMzoli Madyaka banikwa oweLifetime Achievement.