Abaxhumanisi emaqenjini banomsebenzi omkhulu
Emabhizinisini amakhulu, emaqenjini ezepolitiki, naseminyangweni yohulumeni imbala kuba nabantu abanikwa umsebenzi wokuxhumanisa lezi zikhungo nomphakathi okungaba amakhasimende noma abalandeli.
Okusuke kubhekwe kakhulu kulaba ukwakha isithombe esihle salezi zikhungo nokuzwa uvo lwamalungu omphakathi ngazo lezi zikhungo noma amaqembu ezepolitiki.
Imvamisa yalaba bantu abaqashelwa lo msebenzi aseke basebenza ezindaweni ezifana nasemaphephandabeni emsakazweni nakumathelevishini ukukwazi ukukhuluma nabantu.
Nakuyona yonke iminxa yezemidlalo bakhona laba bantu abangabaxhumanisi bamaqembu ngokuhlukana kwawo.
IBAYEDE ikhulume noMnu uZolani Msobo onguMxhumanisi weqembu likanobhutshuzwayo iMaritzburg United, eligijima kuligi enkulu lapha eNingizimu Afrika i-Absa Premiership.
Le nsizwa eneminyaka yobudala engama-27 ithe ikhula ibifisa ukuba yintatheli.
“Iqiniso ngikhule nginothando lokuba yintatheli, ikakhulukazi ukubhalela iphephandaba. Isifiso sami asenzekanga kunalokho ngathola ithuba lokwethula ezemidlalo emsakazweni i-Inanda FM. Umsakazo ngaphandle kokungabaza iwona engisho ngithi ungenze lo muntu engiwuyena namhlanje. Ngibonga uMdali ngokuthi ngithole umsebenzi kuMaritzburg United, engizizwa ngisekhaya khona,” kusho uMsobo.
UMsobo odabuka eNanda uqashwe nyakenye, emva kokuthi leli qembu elizinze eMgungundlovu lenyusele uMnu uNigel Naicker esikhundleni sokuba yiMeneja yeqembu.
Ukufika kwale nsizwa kulethe izinhlanhla kuMaritzburg United, eteketiswa ngokuthi iTeam of Choice, njengoba kumiswe imidlalo ngenxa yokhuvethe yenza kahle. UHulumeni ememezela ukuvalwa kwezemidlalo ngenxa yokhuvethe, leli qembu lalilele endaweni yesihlanu kulogi futhi likwaze ukuthi lidlale lize lifike kowamanqamu weTelkom Knockout nalapho lahlulwa khona iMamelodi Sundowns.
Kunoma yimuphi umsebenzi kunezinselelo zakhona, iBAYEDE ibuza ukuthi yiziphi iabhekana nazo uMsobo
Uthe: “Wonke umsebenzi unezinselelo zakhona, okwami nami ukuthi kumele ngiqine ngingazifakeli ingcindezi kakhulu. Njengoba ngisebenza eqenjini elidlala esigabeni esikhulu futhi elikhulu, kumele ngenze isiqiniseko sokuthi okwenzeka ngaphakathi eqenjini okumele kwaziwe abantu bayakwazi ngesikhathi. Okunye kuhlezi kuzoba khona izindaba ezingamahlebezi ngakhoke kuwumsebenzi wethu siyiqembu ukuthi sikugweme sitshele abantu okuyikhona. Ingakho wonke umdlali ngaphambi kokuthi akhulume nezintatheli kuqale kube yithina esimvumelayo ngoba kunemibuzo okumele ayiphendule nokumele angayiphenduli”. Ekuqaleni kwesonto kuke kwavela ukuthi iTeam of Choice ifuna izigidi ezili-R15 ku-Orlando Pirates ngonozinti wayo uRichard Ofori.
Kodwa lawo bekungamahebezi njengoba uMnu uFarook Kadodia onguSihlalo waleli qembu ethe amanga aluhlaza lawo. Ebuzwa uMsobo umehluko phakathi kokusebenza emsakazweni nokuba umxhumanisi weqmbu uthe: “Emsakazweni bengifana nomuntu osebenzela umphakathi njengamanje umsebenzi wami ugxile eqenjini.”
IBAYEDE iphinde yakhuluma noNhlanhla “Brilliant” Mkhathini okhulumela AmaZulu FC ithe: “Izingqinamba nokuhle kukhona kuwona wonke umsebenzi. Kulona saziwa njengabantu ababhekelele abezindaba kodwa umsebenzi wethu ugcina usudlulele ekukhangiseni iqembu nokuba umlomo weqembu. Yize kunjalo, amaqembu anendlela ethize ehlukile enza ngayo izinto”.
Uqhube wathi: “Sisebenza nabadlali bebhola abahlukene, iziphathimandla, abaxhasi nabalandeli. Kuningi okumele ubhekane nakho kanye nabezindaba futhi uqikelele ukuthi konke kuhamba ngendlela. Kuvamile ukuthi kube khona abangaqondisisi kahle ukuthi lo msebenzi uneminxa eminingi kanti wonke umuntu uneqhaza okumele alibambe. Akekho obaluleke ukwedlula omunye, siyalingana. Uma uthinta eyabadlali kumele uqikelele ngaso sonke isikhathi ukuthi kukhona ukwethembena phakathi kwenu nokuthi wonke umuntu udlala indima yakhe.”
UMkhathini uthe baye bazame ukubaqeqesha abadlali ngalokhu kanye nokuziphatha nje uma bebhekene nabezindaba.
“Siphinde sibafundise nangesiko leqembu njalo uma kuqala isizini.”