ABaqulusi isigcawu sempi
Imisinga ngaphandle nangaphakathi eMkhandlwini idunga isimo kuthiwa isifunda iZululand yilona bhedu olubangwayo
UMasipala aBaqulusi kulezi zinsuku ubhekene nolunye uhlobo lombango nothinta amaqembu epolitiki ngaphakathi nangaphandle koMkhandlu.
UMasipala aBaqulusi njengabo bonke abesizandaweni zasemakhaya uyazabalaza ukuqinisekisa ukuthi imiphakathi eyakhele iyazithola izidingo. Lona umzabalazo wansuku zonke. Nokho kulezi zinsuku lo Masipala ubhekene nolunye uhlobo lombango nothinta amaqembu epolitiki ngaphakathi nangaphandle koMkhandlu. Leli phephandaba like labika kabanzi ngomdonsiswano weqembu elibusayo okuyi-Inkatha Freedom Party (IFP) nokwaphoqa ukuthi kuze kube nezinguquko ebuholini njengoba kwahoshwa izimeya ezimbili okuwumufi uMnu uMartin Mtshali noMnu uJerry Sibiya. Osesikhundleni manje yilowo owayelisekela likaSibiya, uMnu uMncedisi Maphisa.
Akugcinanga lapho ngoba ubundlelwano beIFP neDemocratic Alliance (DA) bubhidlikile kanti ngokomthombo yelaboHlanga lokhu kwadalwa yisivumelwano ne-African National Congress (ANC) esabe sithinta bona aBaqulusi. Ngokombiko welaboHlanga ngonyaka owedlule kwavela ukuthi abe-IFP baba nesivumelwano ne-ANC ngoMasipala iJohannesburg nayilapho amalungu e-IFP ayezoqokwa esigungwini esiphezulu salo Masipala, bese abe-IFP bebuyisa isipheko ngokudedela imikhandlu ethize KwaZulu-Natal okubalwa naBaqulusi. Yize le nkulumo yaqala yaphikwa ngabeIFP kuhambe kwahamba kwanjengoba ElaboHlanga labe libikile nokwathukuthelisa abeDA.
Ekhuluma naleli phephandaba ngaleso sikhathi umholi weDA KwaZulu-Natal, uMnu uZwakele Mncwango wathi: “Thina ngeke siyivimbe i-IFP ukuthi isebenzisane neANC ngoba lelo yilungelo labo, kodwa angeke ube nesithembu kupolitiki. Kuyacaca ukuthi sekunesivumelwano i-IFP esisenze ne-ANC thina esingasazi. Yiyona eyeza kithi ngowezi-2016, emuva kwemiphumela yokhetho loHulumeni Bendawo. Ngaleso sikhathi yathi ifisa sibambisane komasipala ngoba ngeke yona yasebenza ne-ANC ekhohlakele,” kusho uMncwango. Nowaqhubeka wathi: “Ngimangele uma abaholi bayo sebevuma ukuthi bavote ne-ANC eGoli. Nakomasipala esibambisene nabo eKZN asisayethembi i-IFP, nokho sizothula nje siyibuke ukuthi yenzani.”
Kusuka ngaleso sikhathi ubudlelwano be-IFP neDA baba muncu, Inkatha yazithola isibhekene nezimbangi ezimbili, okuyi-ANC neDA nokuyinto eyenza ngokusho komthombo kungasebenzeki ngoba “leli qembu (IFP) lihamba lijeqeza uma lithathe izinqumo”.
Khona lapho kuke kwasuka esinamathambo lapho abeANC babefuna uSomlomo walo Mkhandlu uMnu uMkhonyovu Khumalo aphenywe ngalokho abakubiza ngokuthi wukugcina impahla yoMkhandlu kwakhe. Lokhu abe-IFP bakubiza njengetulo likaKhongolose lokubakheqa kwazise ukuphuma kukaKhumalo njengoSomlomo kungenza kube lula ukuthathela kubo uMkhandlu ngenxa yezinombolo.
Yabe isiba magwalamabili
Akugcinanga lapho kepha kuthinteke nezisebenzi kulo mbango. ElaboHlanga labika ngempi eyabe iwumshoshaphansi neyabe ithinta uSibiya amalungu athile e-IFP nanamuhla uma ekhuluma nelaboHlanga asamnuka ekutheni walingeka wabe esethatha izindaba zeqembu wayozithi fu kuKhongolose. Kuthiwa konke lokhu wabe ekwenza ngoba kwabe sekukhona ukungahoshelani nomhlobo wakhe uKhumalo ababekade belwa izimpi ndawonye.
Azisalanga ngaphandle nezisebenzi kule mibango.
Loyo oyiMeneja, uMnu uBonga Ntanzi, wazithola esenqwamana phezulu naloyo owabe ejutshwe uMnyango uCogta , uMnu uHlula Dladla. Abe-IFP okhwakhulunywa nabo nabacela ukuba bangadalulwa basola uMlawuli ngokuthi ungene wagamanxa ezindabeni zeqembu, nokuba nesandla ekumisweni kukaNtanzi ngaleso sikhathi. Udaba lokumiswa kukaNtanzi luze lwalanyulwa yinkantolo muva nje emuva kokukhipha izinqumo ezimbili nezikhishwe nguMehluleli uSeegobin weNkantolo ePhakeme eMgungundlovu. Esokuqala esaphuma mhla zili-11 kuNdasa ngowezi-2020 sichithe amandla okuthiwa uDladla wazinika wona okumisa uNtanzi. UHulumeni kaneliswanga yisinqumo wabe eseledlulisa kepha yona futhi iNkantolo yachitha isicelo sokwedlulisa icala. Kuzo zombili izinqumo inkantolo ithi amandla oMlawuli kumele asebenze ngokubambisana noMkhandlu ajutshwe kuwo nokuvele ukuthi esinqumweni sakhe uDladla egameni likaHulumeni akenzanga kahle.
“NgokweSigaba 51(1) soHulumeni Bendawo: uMthetho Wezinhlelo Zomasipala, ugunyaza uMlawuli ojutshwe uMnyango ngaphansi kweSigaba 139(1) (b) kuMthethosisekelo ukuba asebenze ngokubambisana nomkhandlu wamakhansela ukuthathela izinyathelo izimeneja eziqashwe ngaphansi kweSigaba sowezi-2010,” kufundeka isinqumo. UNtanzi kulotshwe esebuyelile emsebenzini nokho ElaboHlanga lithole ukuthi kukhona okungahle kumbuyisele enkantolo ngoba sengathi lo mdonsiswano kawuphelile.
Okuvuka muva nje
Leli phephandaba selingakuqinisekisa ukuthi omunye umbango ungahle usuke ngombiko okhishwe ngoLwezi wezi-2019 nosola uNtanzi ngokuningi. Emaqenjini kanjalo nabathintekayo kukhona ukukhuluma okuthi awukethulwa eMkhandlwini nokho ElaboHlanga linawo.
Lo mbiko wabaphenyi bakwaNMK Forensic Investigators ongamakhasi angama-47, wajutshwa mhla zinhlanu ngoMandulo wezi-2019 owayenguMlawuli kamasipala okwabe kunguMnu uHlula Dladla, ngemuva kwezikhalo eziningana ezazikhomba ukuthi kunuka umsanka wenkohlakalo eHhovisi lakwaNdabazabantu elingaphakathi eBaqulusini ngokuqashwa kwezikhulu ezithile nokuphendlelwa kwazo izikhundla kungalandelwanga imigudu efanele.
Amaqembu ehlukene akhala eseNdlovukazi uNandi ngalo mbiko ngoba edalula ukuthi awawazi futhi awukaze unekelwe ngisho umkhandlu wesigungu samakhansela. ElaboHlanga likhulume namanye amaqembu. UMnu u-Andre Vanderwald wenhlangano i-AfriForum eBaqulusini uthe abawazi lo mbiko babona nokuthi ufihliwe ngoba abakaze bezwe lutho ngawo.
“Empeleni miningi imibiko egodliwe kulo Masipala enganekelwa umphakathi ukuba sazi ukuthi yayithini nokuthi ngabe abathintekayo sebethathelwe ziphi izinyathelo.
Nawo lo mbiko asazi lutho ngawo futhi asikaze sizwe nokuthi usuphumile sikuqala ngawe nje. Thina njenge-AfriForum sesinqume nokuthi okuba sihlanganise owethu umbiko ngezinto ezenzeka eBaqulusini ngoba kade sasibabhalela ngezinto esifuna incazelo ngazo kodwa bengaphenduli,” kubalisa uVanderwald.
Uthe kumanje abayitholi incazelo ngentombazane eyatshontsha imali okwakumele iyekwa-Eskom eyizigidi ezine ukuthi kungani ingathatheliwe izinyathelo ngoba isaqhubeka iyahola ngokujwayelekile emsebenzini kamasipala.
UNobhala we-ANC eBaqulusini, uDkt uZakhele Buthelezi, uthe lo mbiko ufihliwe ngoba kuze kube manje abakaze bawunikezwe noma unekelwe umphakathi.
Uqhube wathi bagcina kusenziwa uphenyo kodwa abakaze batshelwe ukuthi umbiko usukhona. IKhansela uMagda Vikter weDemocratic Alliance, uthe yize umbiko bengakawuboni kodwa izinto ezikhulunywa kuwo babevele bekhala ngazo.
Uthe abakufunayo manje ukuba uMkhandlu uqale olwawo uphenyo ngalokho okutholwe abaphenyi bakwaNMK Forensic Investigators.
Umlawuli kamasipala ojutshwe uMnyango Wezokubusa Ngokubambisana Nezindaba ZoMdabu KwaZulu-Natal, uMnu uSibusiso Mkhize okhona eBaqulusini uqale wabuza ukuthi intatheli iwuthathephi lo mbiko ekhuluma ngawo, wathi uma iqhubeka ibhala ngawo, udaba selosingathwa ummeli wakhe ukuze iveze ukuthi iwunikwe ubani.
Ubekhuluma njengomuntu ongawazi lo mbiko kodwa abuye awuvume nalapho asabise ngokuthi udaba uzolufaka enkantolo ukuze intatheli idalule abayinikeze lo mbiko ngoba webiwe.
“Uyabonake komele wazi ukuthi njengoba ukhuluma nami ukhuluma nobani. Kuzomele wazi ukuthi usuyocacisela abameli bethu mayelana nokuthi ngabe ubani okunikeze lo mbiko. Mina ngilapha ngokujutshwa uMnyango Wezokubusa Nokubambisana Nezindaba ZoMdabu ngakho angazi ukuthi ukhuluma ngani. Lalela lapha ngikutshele, umbiko awufihliwe ngoba ngiyabona ukuthi ubheke lapho ekutheni siwufihlile. Uyabona ezinye izinto eziphakanyiswe umbiko sesizenzile ngoba ngikhuluma nje bekunecala ebelihleli eNkantolo Enkulu yaseMgungundlovu nokungezinye zezinto esizenzile ngokuyalelwa umbiko. Wona ngizowukhipha kodwa ngendlela yami engingeke ngikutshele yona,” kusho uMkhize.
IMeya ebambile eBaqulusini, uMnu uMncedisi Maphisa, iphike yama ngentaba yathi lo mbiko ayiwazi futhi ayikaze izwe ngisho kukhulunywa ngawo emkhandlwini.
USomlomo waseBaqulusini uthe awukafiki ezandleni zakhe lo mbiko kodwa usekuMlawuli uMkhize.
“Awukafiki kwezami izandla lowo mbiko kodwa ngizoke ngikhulume noMlawuli uMkhize ukuze ngithole imininingwane egcwele ngawo,” kusho uKhumalo.
Okhulumela uMnyango WezokuBusa NgokuBambisana Nezindaba ZoMdabu KwaZuluNatal, uMnu uSenzelwe Mzila, uthe bayazi ngalo mbiko kodwa abakwazi ukuphawula ngawo ngoba udaba lwawo selusenkantolo.
“Udaba lwalo mbiko lusenkantolo njengamanje ngakho ithimba lethu lezomthetho liseluleke ukuba singaphawuli ngawo okwamanje kuze kube inkantolo iyaluphothula udaba,” kuchaza uMzila.
OwayeyiMeya yaseBaqulusini, uMnu uJerry Sibiya uthe yize ebengakezwa lutho ngalo mbiko kodwa usekwazile ukuwufunda awupotshuzelwe.
“Okuhle ngawo ukuthi udalula konke okungalungile engangizama ukulwa nakho ngiseyiMeya yaBaqulusi. Ngeshwa ngakhishwa kwachenywa nenye indoda okuyiyo enukwayo kulo mbiko. Uyabona nje Abaqulusi bashayekile kwezokuvakasha ngenxa yokuthi kwathathwa umuntu ongenaso neze isipiliyoni salo mkhakha wafakwa kulo Mnyango kungalandelwanga ngisho imigudu. Akugcinanga lapho bathatha umuntu owayeyiPA bamenza umeluleki wezomthetho ngaphandle kokubheka isipiliyoni sakhe nanokulandela imigudu efanele. Kumanje uMasipala uhlulwa ingcaca emacaleni osuke uboshwa kuwo ezinkantolo. Ngendlela isimo esibi ngayo sebeze baqashe izinkampani ezizimele ukuba zifake isandla kwezomthetho ngoba lo muntu owafakwa ebhekelelwa akazi lutho. Ngiyadumala uma uthi ibamba leMeya uMaphisa uyaluphika udaba lwalo mbiko ngoba nguye owayephambili evimba abaphenyi ukuba benze umsebenzi wabo. Waze wabavalela ehhovisi kodwa namhlanje useyaphika. Babelwa baze bavimba ngisho uphenyo olungaphansi kukasection 106,” kuchaza uSibiya.
Uqhube wathi sekulele emaqenjini ahola uMkhandlu okuyi-IFP, iDA ne-EFF ukuba akhombise ubuholi ngokuba athathele izinyathelo labo abathintekayo kule nkohlakalo .
“Okubuhlungu ukuthi uMntwana waKwaPhindangene akakaze anukeke ngisho kweyodwa inkohlakalo esaphethe uHulumeni waKwaZulu kodwa kubukeka kukhona abadicilela phansi umlando wakhe omuhle kangaka ngokubayingxenye yenkohlakalo eyenzeka eBaqulusini. Ngiyathuka nje uma noSomlomo ethi akakaze awubone lo mbiko ekubeni bona kuyibo abayise udaba enkantolo,” kusho uSibiya.
Awukafiki kwezami izandla lowo mbiko kodwa ngizoke ngikhulume noMlawuli uMkhize ukuze ngithole imininingwane egcwele ngawo