Bahlukene phakathi ngokugcwalisa ematekisini
Ngenkathi kuqala ukuvalwa kwezwe uNgqongqoshe Wezokuthutha uMnu uFikile Mbalula wamemezela ukuthi amatekisi kulindeleke ukuthi alayishe ama-70%, okusho ukuthi ngabagibeli abali-10. Udweshu phakathi kukaHulumeni nemboni yamatekisi luqale lapho imboni icela uxhaso njenganawo wonke amabhizinisi alahlekelwe, uNgqongqoshe wathi benguMnyango bazonikeza itekisi ngalinye izi-R5 000. ENingizimu Afrika kunamatekisi ayizi-230 000, lokhu okwenza ukuthi uHulumeni akhiphe R1.1 billion, ukuxhasa amatekisi wonke.
Ngesonto eledlule uSihlalo kaSANTACO esifundazweni iKwaZulu Natal uMnu uBoy Zondi emsakazweni Ukhozi FM wathi; “NgoMsombuluko zingama-29 kuNhlangulana sazisa bonke abagibeli kanye nabo bonke abafowethu bemboni yamatekisi eKZN sesibikile naKomkhulu kanjalo nakwezinye izifundazwe ukuthi siyiKwaZulu-Natal ilesi isinqumo esisithathile, okunye esikuthathile ukuthi la matekisi ahamba amabanga amade amaphoyisa abafuna izimvume, azingafunwa.
Sithi kusuka ngoMsombuluko akukho nelilodwa itekisi okumele lilivimbe lifune imvume kubagibeli. Sithi sibuyela endleleni esisebenza ngayo kusuka ngoMasingana kuya le emuva kungenankinga, futhi sicela kungabi bikho amaphoyisa azosiphazamisa ngoba sesizame ngayo yonke indlela ukuba sikhulumisane noHulumeni kepha akabambisani nemboni yamatekisi.”
Uqhube ngokuthi uma kuzosetshenziswa amaphoyisa ukuthi abahlukumeze ilapho bezothatha khona isinqumo sokuthi bawamise, ayokuma kuze kube uHulumeni uyasho ukuthi benzeni kuyena.
“UNgqongqoshe Wezokuthutha wazise izwe lonke ukuthi ibhanoyi lizolayisha ngokuphelele (100%) ngakho akakwazi ukuthi abanye abalayishe ama-100% abanye bangalayishi ama-100% ngoba le nto azisa yona izwe ukuthi kukhona into esebhanoyini ethatha zonke izifo uma ungena kulona thina sibuza ukuthi kusuka eChina lapho kuthiwa lesi sifo sisuka khona babegibela amatekisi yini beza lapha eNingizimu Afrika? Bagibela ibhanoyi. Ayengasikhiphi ngani lesi sifo? Lapho uNgqongqoshe wayeduduza nje, uma ethi siyawuphula umthetho ngokulayisha ngokugcwele. Kusho ukuthi nabo bayawuphula lowo mthetho wokuqhelelana emabhanoyini.”
Abagibeli labo okuyibo abagibela amatekisi bahlukene phakathi. UNkk uNtombenhle Qwabe uthe; “Vele amatekisi angakithi abeselayisha agcwale, akukho okusha kulokhu okuqale ngoMsombuluko. Inhloso ukuthi kutheleleke thina nje ngoba phela thina esisebenzisa amatekisi asingakwazi ukuba nezinto zethu la esizozizwa khona siphephile.”
UMnu uLinda Ziqubu uthe; “Kuyefana mfowethu kungcono basilayishe sigcwale khona kuzoqashwa nabasizi babashayeli laba ebesebemile ngenxa yokungagcwaliswa kwamatekisi. Kepha kumele baqinisekise ukuthi itekisi linesibulali magciwane kanjalo singena sizifakile izimfonyo, ngoba vele ayisahlonishwa le mithetho eyayibekiwe manje. Lokho ngikushiswo ukuthi uma ungena esitolo kade kuseyizinga lesi-5 sasibamba umugqa, manje sesiyazingenela nje sigcwale ezitolo. Lokhu kungukuxhaphasa imboni yamatekisi.”
Umshayeli wetekisi uMnu uThabani Buthelezi uthe; “Ukugcwalisa amatekisi kuthina kuyasikhulula njengoba nophethroli unyukile nje besizoyithathaphi leyo mali thina yokuphesha izidingo zetekisi, ngoba ekugcineni obasi bethu bafuna imali, ngendlela yokuthi akanandaba noma ungathi ukhande itekisi yena akahlangene, ntambama ufuna imali, kulesi sikhathi sisebenze ngaphansi kwengcindezi enkulu.”
Omunye uMshayeli wetekisi uMsawenkosi Mbambo uthe; “Mfowethu thina silinde umyalelo ozophuma kuNgqongqoshe ukuthi silayishe kanjani, asizimisele ukuqhuba ushuni wenkani ongeke usisize ngalutho, ubasi wami uthe asiqhubeke silayishe lesi sibalo esibekwe uHulumeni, le nto yokuhlohlana sayigcina esikoleni singakazazi ukuthi sifunani. Sizwile ukuthi kukhona ababoshiwe amakhumbi ake amiswa? Lutho awekho amisiwe, isikhathi sokuthi siphume esixukwini, sikhule sazi ukuthi lesi isinkwa semindeni yethu.”
Ongumsizimshayeli uLindani Sthole uthe; “Thina sijabulela ukuthi abanye ozakwethu babuyile emsebenzini, njengoba itekisi seligcwala nje, bekunzima kakhulu, mina ngaba nenhlanhla ngoba ubasi wethu abashayeli kanye nabasizi babashayeli ubaqasha ngokugcwele, sijabulela ukuthi abanye ozakwethu babuyile. Ukubuya kwethu sibona sekuzokwehla nengcindezi kubashayeli ngoba besebenza nomsebenzi wethu, njengokugeza itekisi baphinde babale imali.”