Osomabhizinisi abangahlali dekle kwezokuvakasha
Ukhuvethe lulokhu luqhubekile nokusabalala kuwona wonke umhlaba. Lesi sifo asigcini nje ngokudlula nemiphefumulo yabantu kodwa sihlasela nomnotho emazweni amaningi. Sishiya kukhalwa lapho sike sabhubhisa khona.
Okwenza kunciphe umnotho ingoba kusukela ngoNdasa kwabakhona imvalelwakhaya kuleli lizwe, kwadingeka ukuthi amabhizinisi amaningi avalwe. Imboni yezokuvakasha kwadingeka ibuyekeze indlela ezokwenza ngayo izinto, kwacaca ukuthi akukho ukuqhubeka nokuvakasha uma sekunemvalelwakhaya.
Iqiniso lithi ukufika kokhuvethe kuguqise eziningi izinhlelo ebezisemgqeni kulo nyaka embonini yezokuvakasha. Ezinye zalezi zinhlelo yimihlangano nemibukiso eyenziwa minyaka yonke ihehe izivakashi ezivela emazweni aseAfrica naphesheya kwezilwandle.
Noma-ke sekonakele kunje embonini yezokuvakasha iSikhulu Esiphezulu seSouth Africa Tourism, uMnu uSisa Ntshona, uthi akumele kulahlwe ithemba. Kumele ikusasa lale mboni libukwe ngelinye ihlo.
“Ngempela ngempela akusona isikhathi sokukhombana ngeminwe. Asikho isidingo salokho. Ngisho neSA Tourism idinga ukuqala kabusha ukuze ikwazi ukuthola ikhambi lokuthi izosebenza kanjani ukuya phambili,” kusho uNtshona.
Ekhuluma ekhuthaza osomabhizinisi abasembonini yezokuvakasha, uthe kunezithangami ezixhaswe yiSouth African Tourism, azibize ngamawebinars lapho kuxoxwa ngezinhlelo ezehlukahlukene ezingasetshenziswa embonini yezomnotho. Ukugcizelele ukuthi le mboni ayilimele kuleli lizwe kuphela kodwa wonke umhlaba udinga izinhlelo ezintsha ezizoyisa le mboni phambili. Lezi zithangami akhuluma ngazo zibeka izinhlelo ezahlukene okungase kusetshenzwe phezu kwazo ngenkathi ivula ngokuphelele imboni yezokuvakasha. Zivulelwe noma ngubani othanda ukwethamela izingxoxo ngekusasa lale mboni.
Imboni yezokuvakasha kumele izihlole iguqule izindlela zokwenza ibhizinisi. Noma engazidaluli lezi zindlela, ukubeke kwacaca ukuthi izindlela zakudala nalezo zokubukela kosekwedlule azinakusebenza kulesi sikhathi. Kumele sifundisane kuboniswane kwenziwe izinhlelo zokubuyisela le mboni endaweni yayo lapho beyiphezulu ekuletheni umnotho kuleli lizwe.
Njengoba abamabhanoyi beqala bekhuluma eyokuqala ukuhamba njengoba uthaqa usesigabeni sesithathu, kubalulekile ukuba abahlela izinhlelo zokuhambisa abantu bazihlele kabusha.
Ukuhamba kwamabhanoyi kuchaza ukuthi abantu abaqhamuka kwamanye amazwe sebezokwazi ukuvakashela kuleli. Yize isibalo singeke sifane nesasekuqaleni kodwa bona laba abancane abazobe bevakasha kuzomele ukuba bayahloleleka ngalesi sifo futhi yonke imigomo kaHulumeni iyalandelwa.
Kuzo ezithinta amabhanoyi, ekuqaleni kwesonto kuvele ukuthi zifinyelele kwangqingetshe izingxoxo zokuzama ukuhlenga inkampani yamabhanoyi kaHulumeni iSouth Africa Airways (SAA) kwazise uMnyango Wamabhizinisi kaHulumeni uhoxile kulezi zingxoxo.
UNobhala Jikelele weNational Union of Metalworkers of South Africa (NUMSA), uMnu u-Irvin Jim, uthe kuyethusa ukuthi uMnyango Wamabhizinisi kaHulumeni uhoxe ezingxoweni emuva kokuzama ukuhlenga iSAA amasonto ayisithupha.
“Kade sisho ukuthi akufanele iwe iSAA. Siqale ukusebenza noMnyango Wamabhizinisi kaHulumeni ukuze kuhlengwe iSAA. Asihambisani neziphakamiso zokuthi kudilizwe izisebenzi bese kudayiswa impahla yakwaSAA,” kusho uJim.
Uthe okubathusile wukuthi uMnyango Wamabhizinisi kaHulumeni ubufuna ukudiliza izisebenzi eziyizi-3 700 kweziyi-4 700 ezisebenzela iSAA.