Abemicimbi yokunandisa bazihlela ngenye indlela manje
Awaneme wonke amaciko ngohlelo olusha lokunandisa lwe-inthanethi oludalwe ukubhebhetheka kokhuvethe.
Selokhu safika lesi sifo uHulumeni wathatha isinqumo sokuthi izindawo ezifana namatheatre azivalwe ngoba kugwenywa ukuhlangana kwabantu.
Nokho abanye babona ithuba lokuqhuba ibhizinisi ngokuqhamuka nohlelo lokunandisa bebukwa ezinkundleni zokuxhumana nakuYouTube.
Emacikweni kufana nemvelo ukunandisa ebukwa abantu ngoba kuba nalokho kuxhumana ngokwemizwa.
UNks uZikhona Monaheng oyimeneja yabaculi abavamise ukunandisa kumafestiveli eJazz neNational Arts Festival (NAF) uvumile ukuthi akuwona wonke amaciko aneme ngesinqumo sokungaculi bebukwa abalandeli.
“Ihlukene imibono nemizwa ngale ndlela entsha okunandiswa ngayo muva nje. Amanye amaciko akhala ngokuthi abantu abavamise ukubadlalela kuzoba sengathi babalahlile ngoba abaseyona ingxenye yabo. Olunye uhlangothi lukhala ngokuthi imali eningi evamise ukungeniswa ebhizinisini angeke ifane nasekuqaleni,” kusho uZikhona osebuya ngisho ekuhambeleni amazwe eyocobelela ulwazi ngokuhlelwa kwemicimbi.
UNks uRucera Seethal ongumqondisi wobuciko uthi bake baba neshashalazi lapho idingidiwe indaba yokuthi amaciko kumele azifundise ukunandisa ngalolu hlelo lwe-inthanethi. Uthe phakathi kwezinye izinto okwagxilwa kuzo ukuthi amaciko kumele aqikelele ukuthi ababukeli noma abalandeli bazibone beyingxenye yomcimbi.
“Leliya shashalazi sasilenzele vele isikhathi esisificile ngoba kunokwesaba okukhona kumaciko ukuthi azowudlulisa kanjani umlayezo ecula engabukwa bukhoma,” kusho uSeethal.
Ngokusho kukaNks uMonica Newtown oyiSikhulu Esiphezulu kwaNational
Arts Festival konke kusahamba kahle. “Amalungiselelo okwenza ifestiveli yabukhoma aqalwe ngoMasingana. Kuthe sekujika izinto kwathi maphakathi noNdasa sahlanganisa amakhanda saqhamuka neqhingasu lokwenza ifestiveli ngeinthanethi. Ngasohlangothi lwebhizinisi, lolu hlelo ludale amanye amathuba emisebenzi embonini yobuciko. Kuyasijabulisa ukubona abantu beyithakasela futhi beyeseka. Sikhuluma nje lolu hlobo lwefestiveli luhamba phambili e-Afrika nasemhlabeni jikelele.
INAF, iqale mhla zingama-25 ngenyanga edlule kanti izosongwa mhla zinhlanu kule nyanga. Ingaphezulu kwama-250 imicimbi enhlobonhlobo eyenzekayo kule festiveli ebanjelwa eMakhanda ebiyaziwa ngeGrahamstown, e-Eastern Cape. Abantu bazitika ngemicimbi eqoshiwe, izinkondlo kanti kuba nezinkundla zokucobelelana.
Phakathi kwabaculi ababoshelwe kunoMadosini, uThandiswa Mazwai, uDumza Maswana, iMi Casa no-Ami Faku.
Nabagqugquzeli beStandard Bank Joy of Jazz bamatasa babhunga ukuyihlela ngohlelo lwe-inthanethi. Le nkunzimalanga yefestiveli esibe khona iminyaka engamashumi amabili, nayo ihlehle ngenxa yokugadla kokhuvethe. Yayibekelwe umhla zingama-24 kuya kumhla zingama-26 kuMandulo eSandton Convention Centre eGoli. Umsunguli wale festiveli uMnu uPeter Tladi weT-Musicman Promotions uthe basacubungula izicelo neziphakamiso zabantu abafuna ihlelwe ngale ndlela yobuchwepheshe.
Kule minyaka ikhona ibihanjelwa izinkumbi zabathandi bomculo bezitika ngomculo wamaciko anjengoHugh Masekela, uJonas Gwangwa, uSiphokazi, uNomfundo Xaluva, uTshepo Mngoma noRingo Madlingozi ukubala abambalwa.