Inqubo yokubuyekezwa kwamacala inemininingwane
Amaphepha esicelo sokubuyekezwa kwesinqumo senkantolo afakwa eNkantolo Yokubuyekezwa Kwamacala eseBloemfontein kumbhalisimacala. Lokhu kwenziwa ngummeli ngokuthi awathumele ngeposi eliqinisekisiwe (registered post) noma aziyele yena mathupha emuva kokuba esebanikile abanye abathintekayo kulelo cala.
Le Nkantolo inezikhathi ezine onyakeni okuwumhla zili-15 kuNhlolanja kuya zingama-31 kuNdasa, lulunye kuya zingama-31 kuNhlaba, zili-15 kuNcwaba kuya zingama-30 kuMandulo namhla lulunye kuya zingama-30 kuLwezi.
Ukubuyekezwa kwesinqumo kungalalelwa esikhathini esingaphandle kwalezi uma kuyalela umehluleli. Uma usuku olubekelwe ukuqala kokulalelwa kwesicelo lungaweli ngaphansi kwalezi zinsuku zenkantolo, kungaqalwa ngosuku olulandelayo ngokunjalo uma usuku lokugcina lwalesi sikhathi lungekho ngaphansi kwezinsuku zenkantolo nalapha kungasetshenziswa usuku olulandelayo. Ihhovisi lombhalisimacala livulwa ngezinsuku zenkantolo kusuka ligamenxe ihora lesi-8 ekuseni kuya kwelokuqala ntambama. Liphinde livulwe ngehora lesibili ntambama kuya kwelesithathu. Awekho amaphepha okuvumeleke ukuthi afakwe uma sekwedlule ihora lesithathu. Kodwa umbhalisimacala angawamukela amaphepha ezimweni ezithile nalapho kufanele ayalelwe ngumehluleli.
Amandla nomsebenzi wombhalisimacala
Phakathi kwemisebenzi yakhe ukugcina amaphepha noma imiqulu futhi angenqaba ukuwamukela uma ebona ukuthi awahambisani nemithetho ebekiwe. Uma amakhophi amaphepha afanele ephinde afakwa esikhathini esiyizinsuku ezili-10 emuva kokuba umbhalisimacala ewachithile, akufanele athathwe njengafakwe sekwedlule isikhathi. Umbhalisimacala wamukela okwesikhashana amaphepha athunyelwe ngesikhahlamezi noma nge-inthanethi esikhundleni somqulumsuka (original document) afakiwe kodwa umqulumsuka kumele ube usufakiwe esikhathini esiyizinsuku ezili-10 emuva kokuthunyelwa kwamakhophi. Umbhalisimacala unomsebenzi wokugcina imininingwano yesicelo futhi kufanele imiqulu ibhalwe unyaka isicelo esifakwe ngawo. Wonke amaphepha afakwe kamuva kufanele abhalwe unyaka yilowo ofake isicelo futhi akumele afike kumbhalisimacala kungenziwanga lokhu. Kuwumsebenzi wombhalisimacala ukuqikelela ukuthi amarekhodi enkantolo ahlala ekhona futhi kufanele angavumeli muntu ukuthi awakhiphele ngaphandle kwesakhiwo senkantolo ngaphandle uma lowo muntu egunyazwe ngumbhalisimacala.
Amaphepha afakwe kumbhalisimacala futhi aseyingxenye yamarekhodi enkantolo ngeke akhishwe ingunaphakde emafayeleni enkatolo.
Amakhophi amaphepha ayingxenye yamarekhodi enkantolo kufanele enziwe phambi kombhalisimacala futhi kumele awafake isigxivizo sokuqinisekisa ukuthi ayiwo. Uma kuba nomsindo ngesinqumo sikamsbhalisimacala, kufanele udaba alwedlulisele kumehluleli ukuze athathe isinqumo esiwujuqu.
Ukufakwa kwesicelo sokubuyekeza icala
Isicelo sokubuyekezwa kwecala sifakwa kumbhalisimacala esikhathini esibekwe umthetho. Lesi sicelo kufanele sihambisane namakhophi esinqumo senkantolo esibuyekezwayo, uma inkantolo yenqabile ukuthi icala lidluliswe ikhophi yaleso sinqumo nayo kufanele ihambisane nesicelo.
Incwadi efungelwe okumele iphendulwe ngummangalelwa kufanele ifakwe esikhathini esiyinyanga emuva kokuthi ummangalelwa azisiwe ngesicelo. Lowo ofake isicelo sokubuyekezwa kwecala esikhathini esiyizinsuku ezili-10 emuva kokuba ummangalelwa eseyitholile incwadi efungelwe, uba negunya lokufaka incwadi efungelwe kulokhu ekhuluma kuphela ngamaphuzu amasha avela encwadini efungelwe kammangalelwa.
Isicelo kufanele sicace futhi sihlale ngqo odabeni. Lonke ulwazi kufanele luvezwe ukuze kuzobalula ukuthi inkantolo ithathe isinqumo ngesicelo. Esicelweni kufanele kukhulunywe ngamaphuzu amqoka ecala ukucacisa nokweseka izizathu ezenza ummangali afake isicelo sokubuyekezwa kwecala noma zokuchitha isicelo.
Abehluleli uma sebecubungula isicelo bangafuna ukuthi osifakile alethe olunye ulwazi noma enze enye incwadi efungelwe, amarekhodi namanye amakhophi esicelo. Konke lokhu kufanele kwenzeke ngesikhathi esibekwe umsizi kamehluleli.
Uma ofaka isicelo ehluleka ukulandela imiyalelo umsizi kamehluleli udaba ulwedlulisela kumehluleli oqokwe ukubheka isicelo ongagcina esichitha Emacaleni lapho kumangalelana abantu, umsizi kamehluleli kufanele aziswe ngezinhloso zokufaka isicelo sokubuyekezwa kwesinqumo senkantolo singakapheli isikhathi esiyinyanga isinqumo esizobuyekezwa sakhishwa.
Isicelo kufanele sicacise ukuthi iyiphi ingxenye yesinqumo okumele ibuyekezwe.
Ukwelulwa kwesikhathi sokufaka izinhloso zesicelo sokubuyekezwa kwecala singelulwa ngokuthi kwenziwe isivumelwano esibhaliwe yizona zonke izinhlangothi ezithintekayo. Esikhathini esiyizinyanga ezintathu ummangali uphoqelekile ukuthi ahlinzeke ummangalelwa ngamunye ngamakhophi ayisithupha aqukethe ulwazi ngokwakuqhubeka enkantolo eyakhipha isinqumo. Isikhathi sokwenza lokhu singelulwa ngabathintekayo ngokuthi benze isivumelwano esibhaliwe. Kanti nomsizi kamehluleli angakwenza uma ethole isicelo esibhaliwe. Okubalulekile ukuthi umsizi kamehluleli ngeke aselule isikhathi kube ngaphezulu kwezinyanga ezimbili. Uma ofaka isicelo ehluleka ukuletha amarekhodi esinqumo esibuyekezwayo, leso sicelo ngeke siqhubeke.
Zonke izindleko ezidaleke ngesikhathi sokubuyekezwa kwesinqumo noma kusafakwa isicelo ziba nentela. -nguSabelo Mbatha