Kudalulwa obekungaziwa ngoNurkovic
Besibuye sibambe itoho endaweni kayise edayisa ukudla osekuphekiwe isilomo seKaizer Chiefs uNasmir Nurkovic uma singekho matasa nebhola.
Lokhu ngezinye zezinto ezimbalwa cishe abaningi abebengazazi ezivezwe ngophethe izindaba zalo mgadli waseSerbia osefike wazinameka ezinhliziyweni zabalandeli beChiefs ngokuhlohla amagoli amqoka.
La magoli ashoshelise iChiefs eduze nesicoco seligi osekunesikhathi sifunwa eNaturena.
Ekhuluma emsakazweni iPower FM ophethe izindaba zalo mdlali uDajan Simac waseCroatia, udalule ukuthi ikhono likaNurkovic libunjwe enkulisa yePartizan Belgrade engenye yamaqembu amakhulu eSerbia esidlale emqhudelwaneni emikhulu njenge-Uefa Champions League neFifa Club World Cup.
USimac uthi njengoba uNurkovic esedume cishe izwe lonke, ubenganakwe muntu njengoba ebezidlalela kuKFK Komarno egijima kuSecond Division eSlovania.
“Unesikhathi eside echusha emaqenjini lo mdlali wami. Kwesinye isikhathi ubelishiya iqembu abuye abuyele kulo. Usebuya kuMFK Košice‚ iZlaté Moravce‚ iDunajská Streda, iDuslo Šala, iVráblene Pohronie. Kodwa ngingathi ikuKormano lapho edlale khona kangconywana njengoba ehlohle amagoli angama-35 ngesizini edlule,” kuchaza uSimac.
Uthi wathintwa umlingani wakhe emtshela ukuthi umqeqeshi weChiefs u-Ernst Middendorp uthungatha umgadli ongalibheki ipali ngaphambi kokuqala kwesizini.
“Ngamtshela ukuthi kunomdlali omuhle engicabanga ukuthi angamenzela umsebenzi oncomekayo. Ngiyalincoma iqhaza elidlalwe u-Ernst ekukhuleni komdlali wami ngoba wakhombisa isibindi sokuthatha amashansi ngomdlali angamazi kahle wazomnika umsebenzi eqenjini elikhulu e-Afrika. Cabanga nje ukuthi lo mdlali ubevamise ukudlala ebukwa abantu abangafiki nasemakhulwini amathathu ngoba abantu baseSlovania abanendaba nebhola lakuSecond Division.”
Eqhuba echaza ngokuthi ungumuntu onjani uma engekho enkundleni uSimac uthe: “Njengoba umbona ekhwishiza enkundleni elifuna la lingakhona ibhola ukuze abhakuzise inethi, nangaphandle kwenkundla ungumuntu okukhonzile ukuba matasa. Akazwani nokuhlala engenzi lutho njengoba ubevamise ukuyocela itoho ebhizinisini likayise asebenze njengoweta. Kwesinye isikhathi, ikakhulukazi uma kusebusika, uvamise ukuthatha imbazo anikele ehlathini ayogawula izihlahla. Uthi ukugawula kuyamsebenzela ngokomqondo ngoba uchitha isikhathi eside ehlathini enakene ngqo nento eyodwa. Uthi futhi ngasekujimiseni umzimba ukugawula kuyamsiza ingakho enamandla kangaka enkundleni.”
Uveze nokuthi lo mdlali uhlela ukuthengela abazali bakhe umuzi ngemali yomholo wesizini yokuqala. Wasayinisiwa inkontileka yeminyaka emithathu kanti uSimac uthi ukholwa ukuthi uzokwenyuswa umholo kwazise kuzophela le sizini egile izimanga.
Okwamanje kusenguNurkovic umdlali waseSerbia osefike wadlala into ebonakalayo ebholeni lakuleli. Abanye abagijime emaqenjini anjengeMoroka Swallows neMaritzburg United neMpumalanga Black Aces bahlala isikhashana babuyela emakubo.
Phambilini bekuvamise ukuthi kufuduke abaqeqeshi bakuleliya zwe elitholakala maphakathi ne-Europe.
Kwaqala ngoKostadin Papic owafikela ku-Orlando Pirates, uVladmir “VV” Vermezovic osebenze kuChiefs nePirates, uMilutin “Micho” Srejodevic oqashwe kabili iPirates ngaphambi kokuthatha umsebenzi wokulolonga iqembu lesizwe laseZambia noVeselin Julesic olandwe iBloemfontein Celtic.
Omunye uHeric Vadislav osechushe emaqenjini anjengeMaritzburg United, i-African Warriors, i-Ajax Cape Town, iBay United, iBlack Leopards, iRoyal Eagles, iFree State Stars neTshakuma Tsha Madzivhandila.