Ingqwayimane iqembu lingenzi kahle okhethweni eFrance
Ngemuva kokuba iqembu elibusayo lingenzi kahle okhethweni lwasekhaya sekuvele izindaba zokuthi uNgqongqoshe Wezangaphakathi eFrance osanda kuqokwa, uMnu uGerald Darmanin, angase ahlangabezane nophenyo olusha mayelana nesigameko sokudlwengula asolwa ngaso ngemuva kwesinqumo senkantolo. INkantolo yaseParis Yokudluliswa Kwamacala inqume ukuthi noma imuphi umehluleli angakuvula kabusha ukuphenywa kwalesi sigameko sokudlwengula asolwa ngaso uDarmanin esenzeka ngowezi-2009. Kuleli sonto inqwaba yezishoshovu zibuthane ngaphandle kweHhovisi likaNgqongqoshe zimemeza zithi “UDarmanin ngumdlwenguli, uHulumeni uyahambisana naye”. Kodwa lezi zishoshovu zasuswa ngamaphoyisa. UNgqongqoshe usolwa nguNks uSophie Patterson ngokumdlwengula nangokumhlukumeza ngokocansi ngoMasingana wezi-2008. UNks uPatterson wathi uNgqongqoshe uDarmanin wasebenzisa isikhundla sakhe sokuba yilungu leKomiti Lezokwahlulela ngowezi-2009 ukumphoqa ukuya ocansini naye. Leli cala lavalwa inkantolo ngoNhlolanja wezi-2018 kanti iNkantolo Yokudluliswa Kwamacala isikhiphe isinqumo esisha iphinde yabeka isizathu sokuthi zazingazwakali izizathu zokuba leli cala noma lezi zinsolo zikaNks uPatterson zingaphenywa. Isinqumo sale nkantolo sichaza ukuthi leli cala selizophindela ezandleni zomehluleli ophenyayo ozobe esethatha isinqumo sokuthi uphenyo kufanele lwenziwe yini. Ummeli kaNks uPatterson uMarjolaine Vignola uthe: ”Ngithukile futhi ngiphoxekile ukuthi umuntu osolwa ngowesifazane ngokumdlwengula uqokwe njengoNgqongqoshe Wezangaphakathi. Kunoma umuphi umbuso wenkululeko kuneziqiniseko ezenziwayo ezinikwa abagilwa ukuba bakwazi ukukhuluma ngaphandle kokwesaba noma ngabe yini umsebenzi noma isimo senhlalo salaba ababasolayo, lokhu kuthumela isithombe esethusayo kukilayenti yami.”
Ohlangothini lukaNgqongqoshe, ummeli wakhe uMnu uPierre-Olivier Sur utshele abezindaba ukuthi wayenesiqiniseko sokuthi leli cala lichithwe ngenxa yokuthi “izinsolo azinasigqi”.
IHhovisi likaMengameli waseFrance, uMnu u-Emmanuel Macron, lona lithe alikwazi ukuphawula ezindabeni ezisezithebeni zenkantolo futhi uNgqongqoshe njengalo lonke ilungu lomphakathi unelungelo lokuthi akanacala aze atholwe enalo yizinkantolo. Lokhu kuvuka kwecala kubeke isithombe esithi icala kaliboli.