Izizinda zokwazisa zisengcupheni yokuvala
Nakuba bezivele zikhona izimpawu zesiphepho esikhulu ebesibheke emkhakheni wabezindaba kodwa okuvela ngalesi sikhathi sokhuvethe kubukeka kube ngaphezu kobekulindelekile. Isimo somnotho waseNingizimu Afrika esintengayo, ukwanda kokusetshenziswa kwezinkundla zokuxhumana nokwehla kwezinga lobuntatheli bese kuvele sekuyizinkomba zokuthi ukhukho lubheke eweni kwabamaphephandaba namaphephabhuku kuleli.
Isimo senziwe saba sibi ukugasela kokhuvethe ngasekuqaleni konyaka okwashaya izinkampani eziningi ephaketheni. Sisuka nje, kusanda kumenyezelwa imvalelwakhaya ngoNdasa i-Independent Media Group ephethe amaphephandaba ahlukene yaveza ukuthi isinqume ukunciphisa amaholo ezisebenzi zayo ngenxa yokwehla kwenzuzo eyithola ngezikhangiso ngesikhathi semvalelwakhaya.
Kuleli sonto kwethuke abaningi kuvela ukuthi izinkampani ezinkulu kule mboni okuyiNews24 nePrimedia zihlela ukudiliza izisebenzi ngoba zehlelwa yinzuzo ngenxa yalo ukhuvethe.
IMedia24 ithe isiqale izingxoxo nezisebenzi zayo mayelana nokudiliza.
ISikhulu Esiphezulu kule nkampani ephethe amaphephandaba namaphephabhulu okubalwa iDrum neSunday Sun, uMnu u-Ishmet Davidson, sithe: “Kusukela ezinsukwini zokuqala zokuvela kokhuvethe eNingizimu Afrika konke esikwenzile bekugxile ezintweni ezimbili, eyokuqala impilo nokuphepha kwabantu bethu. Eyesibili kwakuwukhuqhubeka kwebhizinisi nokuvikela imisebenzi ngayo yonke indlela.”
UDavidson uthe ngeshwa ukhuvethe seluqhubezele phambili izimo ezikhona nezesikhathi eside zokungenzi kahle kwemboni yokushicilela okuholele esimweni esibi sokwehla kokudayiswa kwamaphephandaba nokufakwa kwezikhangiso kusukela ngoMbasa nonyaka.
Uveze ukuthi kubona ayisekho enye indlela yokuhlenga lesi simo futhi sebephelelwe ngamaqhinga.
Uthe: “Ngisho singabuyela emazingeni omnotho aphambilini lungakafiki ukhuvethe, umonakalo owenzekile kwezokushicilela ngeke walungiseka. Ngeshwa siphoqekile ukuthi sihlele kabusha indlela esisebenza ngayo ukunciphisa izindleko nokugcina amaphephandaba namaphephabhuku asele eqhubeka.”
Ngokusho kwale nkampani ukuhlela kabusha kwayo kulindeleke ukuthi kugadle ezisebenzini ezingama-510 kweziyizi-2
971 ikakhulukazi engxenyeni yokushicilela nokuhanjiswa kwamaphephandaba namaphephabhuku.
Kukhona amaphephabhuku namaphephandaba azovalwa, kuncishiswe izinsuku ashicilelwa ngazo, amanye ashicilelwe ngeinthanethi, eminye imisebenzi njengeyabahleli yenziwe ngabantu bangaphandle.
Kuzovalwa amaphephabhuku amahlanu, amaphephandaba amabili amakhulu nawomphakathi aKwaZulu-Natal okuyiAmanzimtoti Fever, i-East Griqualand Fever, iHillcrest Fever neMaritzburg Fever.
Kulo futhi leli sonto kuphinde kwavela ukuthi iPrimedia ephethe iziteshi zomsakazo i-702, iKFM, iCape Talk nenkundla yezindaba i-Eye Witness News (EWN) nayo ingase idilize ngenxa yengcindezi kwezezimali edalwe ukhuvethe. Nayo inenkinga yokwehlelwa imali engena ngezikhangiso.
Kuvela ukuthi yazise izisebenzi zayo ngoLwesithathu ukuthi imiphumela yokubuyekeza isimo okwenziwe ngaphakathi ikhomba ukuthi ukuze ikwazi ukuphumelela eqhingeni layo elisha lokusebenza kumele inciphise izisebenzi eminyangweni eyahlukene.
Le nkampani ayikuvezanga ukuthi zingaki izisebenzi ezizothinteka kulokhu.
“Ukuqinisekisa iPrimedia ezinzile nekwaziyo ukubhekana nezinselelo zangomuso, kubalulekile ukuthi sibe nesibindi sokuthatha nanoma yisiphi isinqumo esinzima esingasidinga manje. Kalula nje, lokhu kusho ukuthi njengebhizinisi eliziphethe kahle, iPremedia kumele iphenye amathuba okuhlela kabusha izisebenzi,” kusho isitatimende.
Umonakalo odalwe ukhuvethe kwezomnotho ube mukhulu kwaze kwaholela ekuvalweni kwe-Association Media Publishing ebinamaphephabhuku okubalwa kuwo iCosmopolitan kanti ekuqaleni kukaNhlaba iCoxton & CTP Publishers & Printers imemezele ukuthi isezinhlelweni zokuhosha imfe ekushicileleni amaphephabhuku.