Isililo koMkhulu
NgoLwesibili ebusuku iSilo SamaBandla, Ingonyama kaZulu, ingishayele ucingo ingibikela ngokuhlaselwa kugula eNdlunkulu. ISilo sangibikela ukuthi udadewabo uMntwana uThembi kaBhekuzulu owendele kwaNdlovu ulele esibhedlela ngenxa yobuhlungu. Kwake kwethukeka sengathi yilo leli gciwane lobhubhane ukhuvethe. Kanti cha odokotela bathi akuyiko. ISilo siqhubekile sangazisa ukuthi okwethusayo yikuthi nomunye futhi udadewabo uMntwana uNomusa ozalwa yiSilo esimzalayo uBhusha, eNdlovukazini okuyiyo yodwa esasele eNdlunkulwini eyayigane iSilo sakwaKhethomthandayo, iNdlunkulu uMaZungu, usengenwe yilo leli gciwane lwalolu khuvethe lwayo le mikhovu engu-19 (Covid-19). Kuthe emini ngoLwesithathu ngacosha umlayezo weNdlunkulu yakwaLinduzulu, INdlunkulu uMaNdlovu ithi kangisondele eSigodlweni kwaLinduzulu sekuvele okunzima osekudinga mina ngoba sekwedlule emhlabeni udadewabo weSilo uMntwana uNomusa kaBhekuzulu, obendele eSizweni saseXhoseni samaRharhabe, kunguyena obambele uMntwana wakhe esikhundleni sobuKumukani bamaRharhabe obaziwa eSizweni samaXhosa ngamagama kaKumkanikazi uNoloyiso. Nempela ngifikile eSigodlweni saqinisekisa iSilo ukuthi udadewabo njengoba besingibikele ngayizolo usedlulile emhlabeni, wathwathwa yilo ukhuvethe.
Kungukudabuka okukhulu ukwazisa iSizwe ngalelifu elimnyama eselengeme uBukhosi bukaZulu noBukhosi bamaRharhabe ngalesi sikhathi.
Sidlulele KwaDlamahlahla neSilo ukuyokhalela INdlovukazi uMaZungu ngenxa yesimo esikhona kukhulunywe ngeshwa lwale mithetho ekhona yalolu khuvethe. Ngahamba nami kungakacaci ukuthi ikhona yini into engenziwa ukuba kubekhona abathunywa yiSilo njengoba kukhona le migoqo ekhona ngemingcwabo efanele futhi yenzeke ezinsukwini ezintathu.
Isimemezelo sikhishwe uNdunankulu kaZulu uMntwana wakwaPhindangene