Akulula ukuqagela ngentengo kaphethroli
Kubukeka kungahambi kahle entengweni kawoyela ngoba kulezi zinsuku ilokhu idlalela phezulu, okwenza kube nzima ukugcina intengo kaphethroli nekadizili ingakhuphuki. Maningi amathuba okuba iphinde ikhuphuke intengo kaphethroli enyangeni ezayo. NgoMsombuluko intengo kawoyela beyikhuza phezulu kumadola ase-USA angama- 43,09, kwathi ngoLwesibili yehla yaba ngamadola ase-USA angama-42,89. Okwenza kungabi lula ukuqagela okuzokwenzeka entengweni kawoyela ngukuthi iSaudi Arabia izama ukuphoqa amanye amazwe ukuba ehlise ukukhiqiza uwoyela, okuyokwenza intengo yenyuke kunalokhu eyikho. Nokho-ke sinethemba lokuthi iCentral Energy Fund ingase ikwenze okuthile okungase kwehlise intengo kaphethroli ngenyanga ezayo.
NgoMsombuluko ziyisi-6 kuNtulikazi 2020
Zivule izimakethe ngoMsombuluko zaletha ithemba ngokusimama kwerandi. Siluqale usuku idola lase-USA lilingana namarandi ali-16,92.
Noma kukuncane ukusimama kwerandi kuyajabulisa ngoba kusho inqubekela phambili. Kuvulwe ngoMsombuluko uPondo waseBritain ulingana namarandi angama-21,15 okukhombisa ukuthi lisimame ngesenti elilodwa.
Kube nzima erandini ngempelasonto uma libhekene neYuro lalahlekelwa ngamasenti ayishumi nambili, kwavula izimakethe zemali ngoMsombuluko iYuro lilingana namarandi ali-19,12.
Igolide liyaqhubeka nokuphatha kahle labo abahweba ngalo. Kuvukwe ngoMsombuluko intengo yegolide ingamadola ase-USA ayi-1776 okuthokozisayo emnothweni wezwe.
NgoLwesibili ziyisi-7 kuNtulikazi 2020
Sivuke ngoLwesibili idola lithole amandla licindezela irandi, irandi lalahlekelwa ngamasenti ayisishiyagalolunye. Lokhu kuchaza ukuthi kuvukwe idola lase-USA lilingana namarandi ali-17,01.
Irandi lizithole licindezeleka uma liqhathaniswa noPondo waseBritain laze lalahlekelwa ngamasenti ayishumi nambili. Kuvule izimakethe zemali uPondo waseBritain ulingana namarandi angama-21,27.
Kujwayelekile ukuba zivunane izimali zamanye amazwe uma sezisemakethe yazo kube sengathi zihlangene ngerandi. Iyuro liqhubeke lapho ligcine khona ngoMsombuluko lenyuka lalingana namarandi ali-19, 24.
NgoLwesithathu ziyisi-8 kuNtulikazi 2020
Likhombise izimpawu zokwehlelwa ngamandla irandi uma liqhathaniswa nezimali ezintathu ezithathwa njengezisemqoka emnothweni waseNingizimu Afrika.
Kuvukwe ngoLwesithathu idola lase-USA liqhubeka lapho ligcine khona ngayizolo laphinde lenyuka lalingana namarandi ali-17,16.
NgoLwesithathu kuvukwe kubonakala ukuthi uPondo uvula igebe phakathi kwawo nerandi, okuyinto engehli kahle kubahwebi. Sivuke uPondo waseBritain ulingana namarandi angama-21,55. Lokhu kukhombisa igebe lamasenti angama-28 uma sibheka lapho belikhona ngayizolo.
Selokhu kuqale isonto irandi libonakala lingaphansi kwengcindezi uma liqhathaniswa neYuro lilokhu lehla esimweni ebesethembisa ngesonto eledlule. IYuro liphinde ladlondlobala ngamasenti angaphezu kweshumi lalingana namarandi ali-19,35.
NgoLwesine ziyisi-9 kuNtulikazi 2020
Ngokokuqala kuleli sonto sibona ezimakethe zemali isimo esimamathekisayo esivuna umnotho waseNingizimu Afrika. Kuyaye kushiye imimoya iphansi ukuba lize liphele isonto irandi lingaphansi kwengcindezi.
Kuvule izimakethe ngoLwesine ekuseni irandi likwazile ukubuyisa amasenti alo angamashumi amabili nambili. Kuvukwe idola lase-USA lilingana namarandi ali16,94.
Likwazile irandi ukubuyisa amasenti angamashumi amabili uma liqhathaniswa noPondo waseBritain. Kuvule izimakethe uPondo waseBritain ulingana namarandi angama-21,35.
Kuhamba kahle phakathi kwerandi neYuro. Kuvule izimakethe iYuro lilingana namarandi ali-19,19.
Igolide ligile izimanga ngoLwesine ekuseni kwavukwa intengo yalo ingamadola ase-USA ayi-1806.
Okuthande ukuphoxa isimo esibukeka sisihle ezimakethe kuleli sonto, wukuqhubeka kokwenyuka kwentengo kawoyela lapho umphongolo sivuke ngoLwesine wenyukile wabiza amadola ase-USA angama-43,29. Uma kuqhubeka kanje ngentengo kawoyela singase siphinde sibone kuphinda kwenyuka intengo kaphethroli nodizili, okuyinto ezoshiya kukhalwa ngoba kuyimanje isimo asisihle kwabezimoto.