Umshini wemali uzogaya yiphi uma ingasekho ezweni?
Iningi labantu limthatha uHulumeni njengomnikazi wemali engenakuphela, umthombo ongashi woqobo. Bamazi uHulumeni njengehhovisi elanelisa zonke izidingo zabo, elibakhokhela imali yempesheni, elibakhokhela imali ngokuthola izingane, elibakhokhela imali ngokuphila bekhubazekile, elikhokhela izingane zabo imali yokufunda, elibakhela izindlu zokuhlala nokunye engingenakukuqeda kulolu luhlu. Laba bantu kungenzeka ukuthi bambheka uHulumeni njengomthombo ongashi, umacaphuna kusale.
Abanye kabanandaba ukuthi uHulumeni uyithathaphi imali yokwenza zonke lezi zinto esengizibalile futhi kabalindele neze ukuthi kuyoke kunqamuke lokhu abakwenzelwayo. Kabanalwazi futhi alukho uhlelo lokubazisa ukuthi le mali iqoqwa kubantu nakumabhizinisi njengentela, kuthi uma seyihlangene yabiwe ngononina ikhokhela zonke lezi zidingo kanye namaholo ezisebenzi zikaHulumeni. Njengoba isimo somnotho sisibi manje abantu abaphelelwe wumsebenzi abasezukwazi ukukhokha intela. Ngokunjalo, amabhizinisi ayavala noma anciphisa izinhlelo zokusebenza, okukhomba ukwehla kwemali ezongena esikhwameni sikaHulumeni.
Indlela eyakhelwe ukusebenza ngayo imali wukuba izungeze ngendlela ethize okufana nokuyizalanisa. Lokhu kuyenza isabalale ifinyelele kwabaningi, kuthi ngokwanda kwabantu efinyelela ezandleni zabo kube nesidingo sokuthi labo abayakhayo banezele kuleyo ejikelezayo. Uma uchungechunge lokuzungeza kwayo luthikamezwa ngandlela thize, uyonakala umgudu wokujikeleza kugcine kungasalawuleki ukuzungeza kwayo.
Ngokubuka kwami uma izwe lifinyelela esimweni lapho izakhamuzi zalo zidla imbuya ngothi, amabhizinisi esesimweni esintengayo kungekho muntu obonakala kunguye oyisizathu sesimo abantu abazithola bekuso, lokho kungachaza izwe elingaphethwe, kumbe elingenamholi. Isimo abantu abazithola bekuso sokuhlupheka kungekho mpendulo yizimpawu zokwehluleka kwalabo abalawula ukusebenza kwemali ezweni. Noma yisiphi isivunguvungu esifikayo kulelo lizwe siyoliphephula kalula lelo lizwe, bese kuba sengathi inkinga yisiphepho kanti umonakalo kade wadaleka. Ukhuvethe akusilo olubulale umnotho waseNingizimu Afrika kodwa kade walimala ngenxa yokungalawulwa kokuzungeza okuqondile kwemali.
Enye yezinto ezithikameza ukuzungeza kwemali, wukukhwabanisa. Kuyawuthikameza umgudu oqondile wokuzungeza kwemali ukukhwabanisa ngoba ingena lapho ingabalwa futhi iphume emgudwini owaziwayo futhi ohlelekile, ihambe ingenzi msebenzi ingaphinde ibuye. Lokhu kuyenza ukuba izinto okumele zenziwe ngemali zingabe zisenzeka.
Imithetho elawula ukusebenza nokusetshenziswa kwemali lapha eNingizimu Afrika iphoqa wonke umuntu ophatha imali, noma ngayiphi indlela, ukuba yaziwe ukuthi iphumephi nokuthi ikubani ngesikhathi esithile. Lokhu kwenza kube nombuzo uma kutholakala ukuthi umuntu othile unemali kodwa awulandeleki umnyombo nomsuka wayo.
Kuwumthetho wokusebenza kwemali ukuthi ithi uma iphuma esikhwameni ekuso, kube nendlela okuzovaleka ngayo isikhala ephume kuso. Uma iphuma esikhwameni iya kokwakha indlu, kumele ekupheleni kwayo imali kuleso sikhwama ibe seyikhona indlu. Lokho kwenza indlu ibe ngenye yezinto ezivala isikhala semali ephumile futhi kwesinye isikhathi leyo ndlu eyakhiwe ibe nendlela yokubuyisa imali ephumile iphindele esikhwameni bese kwakhiwa esinye isakhiwo. Uma igcina ngokuphuma nje ibhubhudlwe akukho okugcina kulungele ukuvala isikhala esivulekile.
Kunemibiko eminingi ehlukahlukene eveza ukuthi imali isetshenziswa budedengu yizinhlelo ezehlukene zikaHulumeni. Ziphuma ziqonde ukwenza okuthile kugcine kungenziwanga kumbe kugcinwe icala nje okwenza leyo mali ifane nengawenzanga umsebenzi ebeyiwuphumele. Kumanje kubalwa izigidi zamarandi ezingene emakhukhwini abathile, obekufanele ngabe zikhokhela umphakathi nezidingo zawo.
Ngokushaya imithetho evumela ukungena kwemikhiqizo evela kwamanye amazwe, ibe ikhona eyakuleli zwe efana nayo kulimala umnotho wakuleli zwe. Esikhundleni sokukhulisa amabhizinisi akhiqizayo, awakuleli zwe agcina evalile ngenxa yengcindezi. Lokhu sikubonile embonini ekhiqiza izinkukhu kanye nakwezinye izimboni. Kunamabhizinisi amaningi asebenza kuleli zwe okungesiwo awakuleli.
Uma ngibala amanye awo ngawaseChina. Bavunyelwe wumthetho wezwe ukuba bafike nemikhiqizo yabo beze koyidayisa kuleli zwe. Imali eningi yakuleli zwe ithenga imikhiqizo etholakala ngamanani aphansi. Leyo mali yaseNingizimu Afrika okuthengwa ngayo kula mabhizinisi ayibuyeli kuleli lizwe ukuba ilithuthukise kodwa iya kothuthukisa iChina iphilise abantu bakhona.
Imali iyalawulwa ingena noma iphuma, kubhekwe ukuthi isebenza ngokuyikho yini. Uma kukwampunzi edla emini iyalahleka imali kugcine lelo lizwe linezinxibi ezithembele kwamanye amazwe.
Ngenkathi siphuma embusweni wengcindezelo kwaba nokujabula okukhulu kwaboHlanga, kwathi labo ababephethe izintambo zombuso benza izithembiso zokuqeda ububha nokuletha impilo engcono kubantu. Lezi zethembiso ziya ngokuya zishabalala ngoba emuva kokuma imigqa emide bevotela uHulumeni abawuthandayo nabawethembayo, bazithola namuhla bemi emigqeni emide belindele ukukhangezwa ukudla.
Kumele sazi ukuthi kumanje siphila ngesikweletu futhi kuzofika lapho umbuso wehluleka khona ukuthwala isizwe ibe ingekho imali engenayo. Izwe lethu liyodayiswa sikhona sibe sendalini siphila.