Abafundi baphawula ngoPatricia de Lille
Mhleli
Selokhu labunjwa leli qembu kakuzwakali ukuthi lenzani ukuze phela libonakale emehlweni omphakathi nakwabezindaba. Engikukhumbulayo ngoPatricia de Lille ukuthi walethula iqembu, wagcotshwa njengomholi. Emva kwalokho yameshela i-ANC ukuba abe idlelandawonye nayo. Yaze yamgixabeza ngesikhundla sobungqongqoshe.
Emva kwalokho kwathi nya. Ngiyasola lo mholi nakuba wayengeneme kuDA kepha noKhongolose wamgqugquzela ukuba akaphume kuleli qembu elithathwa njengelabadeshi. Nempela waphuma kuDA, akangajoyina qembu kepha wazisungulela elakhe. Wabe uKhongolose esemnunusela ngesikhundla. Lokhu yayikwenza ngoba izitshela ukuthi uma sebehlangene bazokwazi ukubhidliza udonga lweDA oluvimbe uKhongolose ukuba angabusi eKapa enomkhandlu obalwa nemikhulukazi futhi ofaka inkece eningi kuleli.
Kepha kakubonakali kwenzeka lokho, kuphela okubonakalayo ukugwinyeka kweqembu likaDe Lille ligwinywa yi-ANC. Nokho kakuqali lokhu nomama uKaMagwaza Msibi ongumholi weNFP kwaba yileso.
Wasekwa iqembu elibusayo ukuba aphume inxiwa. Abanye ukwesekwa kwakhe uKhongolose bakuhumusha njengokufuna ukuxegisa amatomu e-IFP ngoba ivimbe nezihlalo kwabanye omasipala KwaZulu-Natal.
Naye okaMagwaza wagixabezwa ngesikhundla njengaye okaDe Lille. Impela imali kayiluthezi olumanzi. Lokhu kuchaza ukuthi abaholi kabasenawo umgogodla oqinile wokuma entweni abayisungulela amaqembu ezepolitiki. Bamnunusela ngemali umholi avele alibale izinhloso zeqembu nabalandeli bakhe. Ngamafuphi ipolitiki yamanje ingeyokuphebeza indlala kuneyokusimamisa isizwe. Nalo mholi weGOOD ugaxele kulowo mkhuba wokuthanda imali nesikhundla.
Engikubonayo lizonele lifadabale leli qembu abalandeli babuyele emuva kuDA. Njengoba kwenzeka nakuNFP abalandeli bagcina bebuyele ekhaya ku-IFP.
- nguSipho Mbatha Mhleli
Akekho umnumzane nomama oqotho ongusopolitiki. Isiko likasopolitiki ubuxoki, ubuphixiphixi nokukhohlakala. Asikho sidingo sokukhomba omunye ofana nawe. Umbuso wepolitiki ungumbuso wegazi, ubunuku nobusathane nje.
- nguSbongiseni Meyiwa Mhleli
Lo mholi wayenesibindi kakhulu esazimele. Aze ampimpe indaba ye-Arms Deal. Wangena phansi kweDA wenza kahle kakhulu eCape Town. Inkiinga iqale esephume kuDA wagwinywa i-ANC kwamubhedela. Manje umnyango awuphethe usanda kwakha ucingo lwezigidi ezingama-R37 usethule ngenkohlakalo engathi akaze akhulume ngayo kanti simazi njengesishoshovu esilwisana nenkohlakalo.
- nguThami Duma Mhleli
Wanginakisa into engingakaze ngiyicabange, ngempela angikaze ngimuzwe ethi vu ngalolu khuvethe olukhungethe umhlaba wonke noma ephawula nje ngeqembu. Umbono wakhe asiwazi ngemithetho yesikhashana yemvalelwakhaya. Ngempela mhleli uyivusaphi indaba enkulu kangaka?
- nguM.A. Mbhele Mhleli
Lokhu kuveza inkinga yalokhu esingakubiza ngokuthi amaqembu mbumbulu ngoba uyedwa zwi umuntu owangamele, akukho nezinye izinhlaka zeqembu, kuyeke okwemihlangano yeqembu.
- nguThembinkosi Matthews Sibiya.
Mhleli
Inkinga inabaholi bethu. Thina aboHlanga kumele silandele okushiwoyo kodwa abamhlophe benza umathanda kodwa ekugcineni lesi sifo silethwe ezweni lonke. Abantu ababi abangalaleli yithina kodwa amandla endlu emnyama aseduze selidumela emansumpeni.
- nguSiphesihle Morgan Ngwenya
Mhleli
Lo mama ungusomathuba ngoba uma uhlehla nempilo yakhe kupolitiki uqhathanisa amanzi namafutha, uyazibuza ukuthi yini eyayimphose kuPAC ngoba impilo yakhe ayikaze ibe nezinkomba zokushisekela izwe lethu ubonakala eseka umqondo kaMandela wokuthi elikawonke wonke.
- nguThemba Khuzwayo Mhleli
Isiphaza sika-ANC lesi asiholayo lo mama. Akukho asazokukhuluma phela ayikhonkothi nethambo. Angithi bamgixabeza ngesikaNgqongqoshe. Uma sekukhulume i-ANC kufana nokuthi usekhulumile naye neqembu lakhe
- nguHonourable Thabani Khumalo
Mhleli
Umama wayevele kwasekuqaleni emveni kokuphalazwa yiDA walwela ukuba yilungu leSishayamthetho nje kuphela ukuze azihlomulele kuwo amaphuphu ezikhova naye axoshe ikati eziko. Okunye khohlwa uyoze umbone ngomkhankaso uhlakanyane lo okwasa ephandle.
- nguKwazi Gazu.