Uhlaka lwezobulungiswa iLASA luqinisa uzinzo ngezikhungo
Ukufika kwedemokhrasi nokwamukelwa koMqulu Wamalungelo eNingizimu Afrika akulethanga kuphela uguquko ngakwezepolitiki kodwa kwenza ukuthi abantu balindele impilo engcono elethwa uHulumeni abazikhethele bona.
UMthethosisekelo wezwe uqinisekisa ukulingana phambi komthetho, ukulalelwa kwecala lomuntu okungena kwenzelela nelungelo lokumelwa ngakwezomthetho enkantolo.
ILegal Aid South Africa (LASA) ingenye yezinhlaka ebekelwe umsebenzi wokuqinisekisa ukuthi konke lokhu kuyenzeka.
Ukuze uzuze izinjongo nemigomo yawo, uHulumeni waqala uhlelo lokuguqula zinhlaka nezikhungo ezazikhona wakha ezintsha. Nakuba usizo ngokwezomthetho kuyinto endala eNingizimu Afrika, uMthethosisekelo wenze ukuthi iguqule indlela obekwenzeka ngayo ukuze wonke umuntu okufanele athole lolu sizo aluthole.
ILASA ihlinzeka ngosizo nezeluleko zezomthetho kubantu abafanele isebenzisa imali kaHulumeni lokhu abaningi abathi abameli bamahhala. Lolu hlaka lunikwe igunya lokusebenza yiSigaba 35 soMthethosisekelo wezwe.
Kulindeleke ukuthi iqinisekise ukufinyelela kalula kwabantu kwezobulungiswa nokufezeka kwelungelo labo lokumeleleka ngakwezomthetho njengoba kuyalela uMthethosisekelo wezwe.
Ibeka phambili izingane, iziboshwa okubalwa nesezigwetshiwe, umsolwa ofisa ukuphonsela inselelo noma ukubuyekeza isinqumo seNkantolo Enkulu, abesifazane ikakhulukazi emacaleni esahlukaniso, esondlo nawodlame lwasekhaya, abangenazindawo zokuhlala ikakhulukazi emacaleni okukhishwa kwabantu ezindaweni zokuhlala.
Ngaphambi kokuthi umuntu anikwe usizo lwezomthetho kuyabhekwa kuqala ukuthi ngabe ukufanele yini ukuluthola. Okubhekwayo kwabasebenzayo ukuthi kumele bahole imali engaphansi kwezi-R5 500 ngenyanga sekuthathwe intela ukuze baluthole lolu sizo.
Indlela elandelwayo yokuthola lolu sizo oludingayo kufanele agcwalise ifomu lesicelo alithumele emahhovisi eLASA lihambisane nobufakazi bendlela aphila ngayo okungaba ikhophi yekhadi lesibonelelo sikaHulumeni, uma esebenza eyamaPay Slip amabili, eyesitatimende sasebhange sezinyanga ezimbili ezedlule.
Lolu hlaka amahhovisi alo atholakala kuzo zonke izifundazwe eNingizimu Afrika. Lunendima oluyiklamayo embonweni wohlelo lukazwelonke lwentuthutho, iNational Development Plan, othi bonke abantu baphephile emakhaya futhi bajabulela impilo ngaphandle kokwesaba.
Ukuzuza lo mbono kudinga uhlelo lwezobulungiswa olubhekelela wonke umuntu eNingizimu Afrika ngendlela elinganayo nengenakho ukwenzelela.
Kumanje iLASA ihlela ukusebenzisana nabezomthetho abazimele, abezinhlangano ezingayenzi inzuzo, amanyuvesi nokuba yaziwe kahle kuwona wonke amahhovisi angama-64 ahlinzeka ngosizo lwezomthetho kanye nangama-64 amancane asekwa amahhovisi ezifundazwe ayisi-6 nelikazwelonke.
Phakathi konyakamali wezi2018/2019 nowezi-2021/22 uHulumeni waseNingizimu Afrika usebenzise imali eyizigidigidi eziyisi-R6.4 kulolu hlelo. Ukuqinisekisa ukuthi lolu hlelo alufadabali kubhekwe ukuthi yenyuke imali esetshenziswa ukuholela izisebenzi zeLASA isuka esi-R1 500 000 000 (R1,5bn) ngonyaka wezimali wezi2018/19 iye esi-R1 800 000 000 (R1,8bn) kowezi-2021/22.
Lolu hlaka luthola imali yokusebenza kuwo uMnyango Wezobulungiswa Nokuthuthukiswa KoMthethosisekelo.
- nguSabelo Mbatha