Ukusebenza kweNkantolo Yamacala Ezezimali
ISpecialised Commercial Court eyakhiwe ngokuhlanganyela neSAPS, iNPA, uMnyango Wezobulungiswa neBusiness Against Crime yasungulwa ngoLwezi we-1999. Le nkantolo ilalela amacala alethwe kuyona yiSpecialised Commercial Crime Unit (SCCU). Igxile ekulaleleni amacala athinta imali angeke alalelwa noma ashushiswa yizinkantolo zezifunda futhi angekho ezingeni lokusingathwa yiDirectorate of Special Operations (DSO).
Phakathi kwawo awokukhwabanisa angathinti amancane enziwe umuntu oyedwa ngaphandle uma kusolwa ukuthi lowo useke wabandakanyeka kwamanye njengokukhokha ngesheke ingekho imali eyanele ku-akhawunti yakhe yasebhange. Lowo ngeke ashushishwa yiSCCU kodwa uma imali inkulu noma umsolwa kukholakala ukuthi uyingxenye yeqembu lezigebengu elenza amacala noma useke wasebenzisa amasheke amaningi alolu hlobo. Lolu phiko aluwashushisi amacala amakhulu awela ngaphansi kweDSO ahlelwe amaqembu ezigebengu. Amacala afana nokukhwabanisa imali yempesheni yenkampani angena ngaphansi kwale nkantolo kanti isinqumo sokuthi uhlobo lwecala luya enkantolo yesifunda sincike ekutheni bubandakanyeka kangakanani ubugebengu obuhleliwe. Iyangena emacaleni okwephulwa kwemithetho yokuphathwa kwamabhizinisisi enjengeCompanies Act, iClosed Corporations Act, i-Insolvency Act. iBanks Act neminye. Amacala angena ngaphansi kwale nkantolo avulwa emaphoyiseni, kuyona uqobo okanye eCommercial Branch bese kuthi ophethe abaphenyi kuleso siteshi ahlonze ukuthi icala lingena ngaphansi kweCommercial Branch, idokodo alidlulise kukhomanda omkhulu obe eselinika umphenyi ozokwenza uphenyo lokuqala okufanele luphothulwe ezinsukwini ezili-14. Uphenyo luhlanganisa ukuqinisekisa ukuthi icala lingena ngaphansi kweCommercial Branch, ukuthola ubufakazi obukhona okungahlanganisa ukuthatha kabusha isitatimende sommangali. Umphenyi ube esephothula uhlelo lophenyo lokuqala acacise ukuthi yibuphi ubufakazi obudingekayo nesikhathi okufanele kube sekuphothuliwe ngaso.
Esikhathini esiyizinsuku ezili-14 umphathi wabaphenyi ucubungula kanye nomphenyi idokodo nohlelo lophenyo bese elidlulisela kohlela imisebeni yenkantolo ozobe eselinika umshushisi oqokiwe. Uma umshushisi eselitholile idokodo kulindeleke ukuthi ahlangane nomphenyi esikhathini esiyizinsuku ezili-14 ukuze babheke ulwazi oselukhona nohlelo lophenyo olucacisa ngezinto okufanele zenziwe nesikhathi esibekiwe ukuqoqa ubufakazi. Uma uhlelo lophenyo seluphothuliwe lufakwa kudokodo, umphenyi ube esephothula uphenyo abike kumphathi wakhe. Uma kunesidingo umphenyi nomshushisi bayahlangana ukubheka ukuthi uphenyo seluhambe kangakanani ikakhulukazi uma icala linezinto eziningi noma kuvela ulwazi olusha oludinga ukuthi izinsolo noma uhlelo lophenyo kubunjwe kabusha. Uma seluphothuliwe uphenyo, umphenyi ubopha umsolwa noma amthumelele amasamanisi ambizela enkantolo. Ngokujwayelekile kulandela imigudu yokuqulwa kwecala. Ngokomgomo weSCCU ngaphambi kokuqala kokuqulwa ithimba labaphenyi noma labashushisi kumele lihlangane nabameli bakamsolwa nabanye abathintekayo ukuqinisekisa ukuthi abameli bakamsolwa bazobe sebelungile ngosuku lokuqala ukuqulwa kwecala.
- nguSabelo Mbatha