Umqeqeshi uzigqaja ngesisekelo asibeka
Uswele amazwi angawaphimisa ngendlela ajabule ngayo umqeqeshi weLindelani Cricket Club ngokubona umdlali ophuma ngaphansi kwesandla sakhe elokhu eqhubeka ngokudlondobala kulo mdlalo. Lo mqeqeshi nguSandile Caluza.
Umdlali ophuma ngaphansi kwesandla salo mqeqeshi nguNonkululeko Mlaba, odlalela iqembu elikhulu esifundazweni iKwaZulu-Natal kanye neqembu lesizwe.
UNonkululeko oneminyaka engama-20 izinto zakhe ziqale ukukhanya nyakenye ngoMandulo ngesikhathi ebizelwa eqenjini lesizwe elaliyodlala imidlalo yeWomen’s Twenty20 International (WT20I) ne-India. NgoMasingana walo nyaka uphinde wabizwa eqenjini lesizwe ngesikhathi liyobhekana emdlalweni yochunguchunge eWomen’s One Day International (WODI) neNew Zealand.
Ukwenza kahle kwale ntokazi yakwaMlaba kuyenze yanyelwa inyoni esandleni iphinde ibizwa ukuba iyomela iNingizimu Afrika emdlalweni we2020 ICC Women’s T20 World Cup ebingoMasingana e-Australia.
Ukwenza kahle kukaMaMlaba kumenze wavuna izitshalo ezinhle njengoba ngesonto eledlule enqobe indondo yeNewcomer of the Year lapha eNingizimu Afrika. Lokhu kuklonyeliswa kwabadlali bekwenziwe inhlangano ephethe lo mdlalo iCricket South Africa (CSA).
“Njengomqeqeshi uhlezi ufisa ukuba bonke abadlali bakho baphumelele.
Kodwa uNonkululeko ngangazi ukuthi noma kuthiwa abaphumeleli bonke kodwa yena uzophumelela. Okwakwenza ngisho njalo yingoba uma eshwiba ibhola, usebenzisa isandla sobunxele nokuyinto eyivelakancale kuleli futhi ushwiba kahle. Ngijabula kakhulu ukumbona elokhu eqhubekile nokwenza kahle. Iminyaka isamvumela, kuningi engisakubhekile kuyena,” kusho uCaluza.
UCaluza waqala ukuzibandakanya nekhilikithi ngonyaka wezi-2007 lapho ayesebenza ngaphansi kweTownship Development Program, eyasungulwa uLinda Zondi osesebenza eqenjini lesizwe iProteas.
Le nsizwa eneminyaka engama-30 akukhona ukuthi iyaziqeqeshela nje kodwa yakufundela njengoba ineziqu uLevel 1 eyazithola ngonyaka wezi-2010 kanye noLevel 2 eyawuthola ngonyaka wezi-2013.
“Ngimfisela impumelelo uNonkululeko. Ngifuna aqhubeke nokuthi abe isibonelo esihle kulaba abeza ngemumva. Izinga akulona yilo eliphezulu alikho elinye, akumele akwenze ukuqhubeka asebenze ngokuzimisela anqobe nezindondo eziningi kwazi bani mhlambe ngelinye ilanga engaba ukaputeni weProteas,” kusho uCaluza.
Akuyena yedwa uMaMlaba odlalela iqembu lesizwe ophume ngaphansi kwesandla sikaCaluza, omunye uNondumiso Shangase naye oqale ukudlalela iProteas nyakenye kanti naye ubeyingxenye yabadlali abadlala umqhudelwano we-2020 ICC Women’s T20 World Cup.
Abanye abadlali abenza kahle ngaphansi kukaCaluza u-Ayanda Hlubi, uNosipho Yaka, uNobuhle Ndlovu noAsamkele Kawu. Bobane laba badlali abaneminyaka engaphansi kweli-18 sebekwaze ukuthi bamele isifundazwe emqhudelwaneni emikhulu.
IBAYEDE ikhulume noMaMlaba kade ekhuluma ngendlela ayiyona emva kokumenyezelwa njengonqobe indondo.
“Ngijabule kakhulu. Ukuzimisela kwami ngaso sonke isikhathi ngiqhubeka ngiya phambili noma kunzima ngibona kungisebenzele kakhulu,” kusho uMaMlaba.
IBAYEDE imbuza ukuthi ukhuvethe ngabe alumphazamisanga yini uthe: “Lungiphazamise kakhulu ngoba lwenze kwama imidlalo. Kodwa ngiyakwazi ukuthi ngiziqeqeshe ekhaya ukwenzela umzimba wami uhlezi usesimweni sokudlala. Ngiyafisa ukuqhubeka nokuzinza eqenjini lesizwe, nginqobe nezindondo.”