Onke amaligi akuleli afuna kugezelwane
Maningi amathuba okuthi kuzothi kuphela uNtulikazi imidlalo engaphansi kwePremier Soccer League (PSL), i-Absa Premiership neyeGladAfrica Championship izobe isibuyile. Okwenza kubukeke kanjalo wukuthi imihlangano ingena ingenile kudingidwa ngokuqedelwa kwale midlalo, okuseqhulwini kakhulu kodwa manje ukuthi ngabe izoqedelwa kuphi njengoba kufuneka iqedelwe esifundazweni esisodwa. Umbango uphakathi kweKwaZulu-Natal kanye neGauteng.
Kuyinto ejabulisayo leyo ngoba wonke umuntu ufuna ukubona isiphetho, sokuthi ubani onqoba iligi, odliwa izembe, nosuka kuGladAfrica Championship enyukela ku-Absa Premeirship. Yize kunjalo kodwa baningi abazibuza beziphendula ukuthi ngabe kuzokwenzakalani ngemidlalo esegibaneni ezingaphansi kwalezi ezingenhla okuyi-ABC Motsepe League neSAB League.
IBAYEDE ibe nengxoxo ekhethekile noKwenzakwakhe Ngwenya onguSihlalo weSouth Africa Football (SAFA) esifundazweni iKwaZulu-Natal. Leli phephandaba belibuza lo Sihlalo, ngokuthi ngabe kukhona yini abazokwenza ngemidlalo ethinta i-ABC Motsepe League neSAB League. “Yebo kukhona esikwenzayo. Siyinhlangano iSAFA kusasa sihlele umhlangano, lapho sizobe sihlela umhlahlandlela ngala maligi esingasho sithi aphakela lawa amakhulu. Kulo mhlangano sizokwenza isiqiniseko sokuthi silandelela yonke imithetho yokuvalwa kwezwe, okubalwa khona ukuqhelelana. Ukuhlangana kwethu sizokwenza ngohlelo lweZoom lapho sizobe sihlangene kodwa sibonana kumaselula nakumalaptop. Okwenza lokho ingoba lapha esifundazweni siningi isibalo sabantu abatheleleke ngokhuvethe,” kusho uNgwenya.
Uthe emva kwalokho isinqumo esizophuma kulo mhlangano bazobe sebebiza izikhulu zamaqembu, ukuzozazisa ukuthi ithini indlela eya phambili. Le nhlangano kulesi sifundazwe izobe iqala ukuhlangana selokhu kwamenyezelwa ukuvalwa kwezwe uthaqa ngoNdasa nonyaka. Kulo mhlangano kulindeleke oMengameli bazo zonke izifunda zeSAFA ezili-11 namalungu esigungu sikazwelonke amahlanu aqhamuka kulesi sifundazwe.
Uma isinqumo esingaphuma sithi akuqhutshekwe nemidlalo, kungayinto enhle ikakhulukazi emaqenjini asembangweni wokuyodlala eyokuhlunga ku-ABC Motsepe League okunyukela kuGladAfrica Championship.
ElaboHlanga likhulume noBongani Msomi oyimenenja yeqembu eligijima ku-ABC Motsepe League KwaZulu-Natal, uMvoti Football Club okuyiwo ozihola phambili kulogi. “Uma kungathiwa ayiqalwe phansi iligi ngabe sibulewe kakhulu. Njengoba sihlezi phezulu kulogi, sisemathubeni okudlala eyokuhlunga. Okubuhlungu ukuthi iningi imali ekhishiwe, kusho ukuthi silahlekelwe imali kanye nethuba lokuyodlala eyokuhlunga okuya esigabeni esiphezulu. SinguMvoti FC siyafisa ukuthi kuqhutshekwe kudlalwe noma sinikelwe iligi.” kusho uMsomi.
Uthe kusukela kwabuyela imidlalo yaphesheya baqoma ukuthi babuyisele abadlali ezindlini zeqembu, babenethemba lokuthi kungenzeka nakuleli imidlalo isheshe ibuye. “Abaphathi beSAFA kulo mhlangano abazoba nawo siyafisa ngempela bephume nesinqumo esihle. Abadlali bethu bakulindele ukuqhubeka balwe. Ngesikhathi sibabuyisela ezindlini zeqembu, senza isiqiniseko sokuthi siyabahlolela ukhuvethe nezindlu zihlanzekile. Kabili noma kathathu siyabahlola abadlali sihlanze nezindlu,” kunaba uMsomi.
UMvoti FC onamaphuzu angama-60 yize uhlezi phezulu kodwa uhlezi lubhojozi njengoba ulandelwa iSummerfield Dynamos ngamaphuzu angama-57, kube iKwaDabeka Sporting FC enamaphuzu angama-54 kube iHappy Wanderers ngamaphuzu angama-53.
ElaboHlanga liphinde lakhuluma noSkhithi Cele weKwaDabeka FC.
Uthe akubuyelwe ensimini. “Kusele imidlalo eyisi-6 akubuyelwe ensimini, ngibiza oMsomi, yithina esizoya kodlala eyokuhlunga. Abadlali bethu bakulindele ukufela enkundleni. Sibahlole bonke, baqalile ukuziqeqesha ngandawonye, bebevele kodwa beziqeqesha ngabodwana,” kusho uCele ubesho ephindelela ukuthi akuqedelwe imidlalo.