Ulwa eyokhuvethe okaMiss SA
Ujabulela ukungena agamanxe empini yokulwa nokhuvethe owesifazane waseNingizimu Afrika ongenele umqhudelwano kaMiss South Africa.
Intokazi yaboHlanga engenele uMiss South Africa 2020, uThato Mosehle (25), ingomunye wodokotela abaseqhulwini lokulwa nokhuvethe oluvimbezele ezweni nasemhlabeni jikelele.
UThato ungudokotela esibhedlela eKlerksdorp Tshepong Hospital lapho efundela ukuzuza isipiliyoni.
Lesi simomondiya esidabuka eKlerksdorp, eNorth West, singene kuTop 16 kwabagaqele isicoco sikazime.
Sithi yize kunzima ukusiza iziguli ezihaqwe yilesi sifo kodwa ukubona zithola ukwelapheka kumnika umfutho wokwenza umsebenzi wakhe. “Umsebenzi wobudokotela usuwenezele eminye ebikhona njengoba kumele ngenze imikhankaso yokuthi ngivotelwe ngabantu ukuze ngikhale ngemuke nesicoco. Abanye ozakwethu abangodokotela basamisiwe ukusebenza okuchaza ukuthi thina esingakatheleleki kumele siyibambe ngezimpondo.”
Echaza ngokungena emkhakheni wobudokotela, uthe: “Uthando lwaqala ngisesekoleni ngenza iBanga 8 ngesikhathi kunomsebenzi esasiwunikeziwe wokuhlwaya ngamathuba emisebenzi esasingawenza uma sesiqedile isikole.
Okwangihlaba umxhwele umzimba womuntu, ngazihlupha ngokwazi ukuthi uma ungazizwa kahle yini okumele uyenze ukuze usizakale. Esengikufundile kulesi sikhashana ngingenile kulo mkhakha ukuthi kumqoka ukukhuluma kahle nesiguli noma omunye umuntu ukuze athole ukwelapheka emqondweni nasemzimbeni uqobo.”
Ebuzwa ukuthi ukusheba kanjani ukubhekana nemisebenzi yasesibhedlela nemikhankaso kaMiss SA Top 16, uthe: “Ithimba elihlela uMiss SA ave lisinakekela kamnandi. Okuhle futhi imisebenzi yawo liyihlela thina sesishayisile kweminye imisebenzi yethu. Nozakwethu bayasiseka ngendlela emangalisayo. Ngikhumbula ngesikhathi kuvela isimo esiphuthumayo, omunye wangitshela ukuthi angikhululeke uzongivalela isikhala sami. Nami-ke ngiyaqikelela ukuthi izikhathi zami azishayisani ukuze konke kuhambe kahle.
Nomndeni wami nawo uyangeseka kakhulu okungenza ngibe nethemba lokuthi kukho konke okubhekene nami ngizophumelela, okunye okungisizayo ukuthi ngiyazinika isikhathi sokuthandaza, ngikhulume nophezulu ukuthi aqhubeke nokungivikela kukho konke okubi okungangehlela.” Mayelana namathiphu okuthi umuntu ahlale engumqemane, uthe: “Kumqoka ukuphuza amalitha amanzi amabili ngosuku nokunyakazisa umzimba ngokuzivocavoca kathathu okungenani. Kumele ugweme ukudla izinto ezinamafutha nokudla okusemathinini kepha ugxile ekudleni okunjengenkukhu, inhlanzi nemifino. Nokuqikekela inhlanzeko kumqoka belu. Kuhle nokuzifundisa ukwenza izinto ezizokwenza ube matasa nokuxhumana nabantu enizoxoxa nabo izinto ezizokwakhana ngokomqondo.” Njengoba esephokophele ekuhlwitheni isicoco sikaMiss SA wayenephupho lokuba umdlali weProteas kuNetball kodwa waba nebhadi lokulimala edolweni. Uma ezihlalele ukhonze ukuthunga izikhafu nokuziphophotha abuye azifundise ngokuyenza kubangani.
Enye intokazi esemkhakheni wobudokotela uKarishma Ramdev, yena owenza unyaka wokuqala njengetoho eCharlotte Maxeke Johannesburg Academic Hospital. UMiss SA ubekelwe umhla zili-24 kuMfumfu kanti uzosakazwa bukhoma kuM-Net nakuMzansi Magic. Kulo nyaka kumenyezelwe ukuthi izintokazi ezintathu ezizokleliswa ekuqaleni zizomela iNingizimu Afrika emincintiswaneni emikhulu emhlabeni. Phambilini uzime obashaye bonke ezweni ubeyiswa kuMiss Universe nakuMiss World. Kulokhu bazohanjiswa nakuMiss Supranational. Uma ufisa ukuvotela labo abasohlwini lwabali-16 ababheke kowamanqamu ungangena esixhumanisini esithi https://misssa2020. computicket.com/ event/semi_finalist