Uzishaya isifuba ngakwenza
Uyaziqhenya ngakwenzela iNingizimu Afrika uphromotha wezamankomane nakuba ahamba kukubi kuleli zimnetha.
Isansonsotha inhliziyo kaBranco Milenkovic owashiya iNingizimu Afrika isinyenyela waphindela kwelakubo eYugoslavia. Le ndoda eyayishaya ngezwi elikhulu yayinguphromotha wezimpi zenqindi ezweni inenkampani iBranco Sports Productions eyakhiqiza inqwaba yompetha bomhlaba ezweni.
Ukugcina ukuzwakala kuphathwa igama lakhe kwakungesikhathi egingqa phansi iBoxing South Africa (BSA), eyehlula ecaleni ngowezi-2005.
Inkantolo yamvuna ecaleni ayelivulele uMnu uMoffat Qithi, owayeyiSikhulu Esiphezulu kule nhlangano engamele isibhakela ezweni. Wayemmangelele ukumehlisa isithunzi.
IBSA yaphoqwa ukuthi ikhokhe izi-R500 000 njengoba udaba lwavalwa eSouth Gauteng High Court. Wayengaqali ukuyithela othulini iBSA njengoba wayehlula ecaleni lokungamniki izinsuku zokusakaza. Kwavela ukuthi kwakunesikhulu sakwaSABC nakwaBSA esasimnike igunya lokuthola izinsuku eziningi kunabanye ophromotha, okuyinto engehlanga kahle kwabanye ozakwabo.
Ngesikhathi kunalo mdonsiswano iSABC yanquma ukungayisakazi imiqhudelwano kwathi ekugcineni uMnu uFikile Mbalula, owayenguNgqongqoshe
Wezemidlalo ngaleso sikhathi noMnu uHlaudi Motsoeneng owayesikhulu sakwaSABC, baxoxisana noMilenkovic ngaphandle kwenkantolo.
Ngenxa yokuthi wayenyamanambana kubantu abaningi uMilenkovic uthi ingakho athatha isinqumo sokubuyela kwelakubo. Ekhuluma naleli phephandaba ngokuxhumana kuFacebook, udalule ukuthi inhliziyo yakhe ayikakutholi ukuphumula. “Ngabona kungcono ngiqoqe amasakana ami ngibuyele kwelakithi ngoba ngabona ukuthi ngasuka nganyathela izinzwane zabantu abangathintwa. Ngokwami anginaphutha ngoba nganginelungelo lokukhononda njengawo wonke umuntu uma ngingeneme,” usho kanje.
Uthe nokho kunezinto ezinhle azikhumbula ngeNingizimu Afrika. “Kungenza ngizishaye isifuba uma ngibuka inqwaba yamabhokisa engawasusa phansi ngawenza ompetha bomhlaba kwaguquka impilo yawo.”
Yiyo le ndoda eyakhiqizela i-Afrika umpetha womhlaba wesifazane wokuqala. Lowo uNoni “She Bee Stingin” Tenge, owaxebula uDaniella Smith empini ye-IBF Welterweight eBrakpan eGoli ngowezi-2011.
Nguye futhi owenza uZolani “Last Born” Tete waba ngumpetha we-IBF Junior Bantamweight ngowezi-2014.
Kukhiqizwe noNkosinathi “Mabere” Joyi owahlula uRaul Garcia waseMexico ukuze abe ingqwele ye-IBF Straweight e-ICC Hall e-East London ngowezi-2010.
Selokhu kwagcina ngaye uMilenkovic ukuqhatha impi ye-IBF ngesikhathi uJoyi evikela ibhande kuKatsunari Takayama waseJapan e-Orient Theatre e-East London.
Abanye osomankomane asebenze nabo kunoMoruti Mthalane, u-Ali “Rush Hour” Funeka, uMzonke Fana, uMalcolm Klassen, uCassius Baloyi, uTakalani “Panther” Ndlovu noJeffrey “Mongoose” Mathebula abanqoba amabhande e-IBF. Nokho abanye bamsola ngokwenza uJacob “Baby Jake” Matlala upopayi ngesikhathi kuvela ukuthi uyamsebenzisa ukuze athole uxhaso. UMatlala naye waphumela obala ngokuxhashazwa yile ndoda kwadumala abaningi kwazise isithombe esadwebeka ngesikhathi kumenyezelwa ukuthi bazoqhatha izimpi ndawonye, wukuthi kuzobanjiswana.