KWEZINYE IZINGXENYE
Kunzima ezikoleni, ziyavalwa
Siyaqhubeka siyanda isibalo sezikole ezivalwayo ngenxa yokhuvethe. Lokhu kutheleleka kwenzeka kubafundi kanye nakothisha uqobo.
NgoMsombuluko kuvalwe isikole saKwaMashu esigcemeni kwaD, Inhlakanipho High School. Kuphoqeleke abafundi baphindele emakhaya kuze kube bayalelwa ukuthi ababuye.
Abafundi bakulesi sikole bathe basathukile ukuzwa ukuthi kukhona uthisha ohaqwe ilolu bhubhane, bathemba nawukuthi uyena kuphela onalo futhi uzosheshe alulame.
Izikole ezisondelene neNhlakanipho High School ezivaliwe nazo iNqabakazulu Comprehensive High School okwatholakala ukuthi khona onaleli gciwane, iBarracuda Primary School neNewlands East Secondary School.
Njengoba kwandiswe amabanga avuliwe ezikoleni kubukeka sisazokwanda isibalo.
Ziyenyuka izibalo zokhuvethe
Kunokuthi sehle isibalo salabo abatheleleka ngokhuvethe lapha eNingizimu Afrika siyakhuphuka kunokuthi sehle.
NgoLwesithathu kuvele ukuthi bayizi-8 811 abantu abasha okuvela ukuthi bahaqwe ileli gciwane. Lokho kwenza ukuthi babe yizi-224 665 abahaqekile lapha eNingizimu Afrika.
Ngokwezibalo ezintsha kuvela ukuthi iGauteng iyona esihamba phambili ngabantu abanokhuvethe. Bayizi-3 527 abantu abasha abanaleli gciwane kulesiya sifundazwe nokwenze baba yizi-75 015 sebe bonke, kulandele iWestern Cape enabantu abayizi-73 292.
IWestern Cape iyona ehamba phambili ngabantu asebedlule emhlabeni, bayizi-2 192, kulandele i-Eastern Cape enabangama-582, kube iGauteng enabangama-478 bese kuba iKwaZulu-Natal enabangama-223.
Umdlalo oyingozi
Yize unobungozi obukhulu umdlalo obizwa nge“stabane” kodwa intsha ikakhulukazi eyaKwaMashu naseMlazi ilokhu iqhubekile ukuwudlala lo mdlalo okugitshelwa phezu kwezitimela.
Okhulumela iPassenger Rail Agency of South Africa (PRASA) esifundazweni iKwaZulu-Natal, uMu uZama Nomnganga, uthe sebekhulume kakhulu ngalolu daba.
“Sizama ngakho konke okusemandleni ukudlulisa umyalezo ngobungozi bale nto eyenziwa intsha nsuku zaphuma. Sihambela izikole siqwashisa kodwa kubukeka kufana nokuthi sidlala ngesikhathi ngoba bayaqhubeka.”
NgoLwesibili kutholalake umfanyana oneminyaka elinganiselwa eminyakeni eli-15 elimele kanzima eDuffs Road Train Station. Okhulumela abaKwaZulu-Natal Emergency Services, uRobert McKenzie uthe,
“Ushe kanzima kakhulu, impilo yakhe isesimeni esibucayi kakhulu. Kumele intsha iyekele ukwenza le nto yokugibela ezitimeleni. Yize umuntu esuke ezenzile kodwa kubuhlungu usumbona esekhala esezwela izinhlungu.
Kushaqwe inqwaba yezibhamu
Zingaphezulu kwezi-30 000 izibhamu ezishaqwe ngamaphoyisa eGoli ekuqaleni kwesonto.
Okhulumela amaphoyisa kazwelonke, uColonel Brenda Muridili, uthe ziyizi-52 000 izibhamu ezishaqwe esigabeni sokugcina nyakenye. “Ziyizi-33 000 izibhamu ezitholiwe zacekelwa phansi.
Lapho sibala izibhamu eziyizi-30 913 ezincane, izibhamu eziyi-1 452 ezinkulu nezibhamu ezingama-894 ezimaphakathi kanye nezingxenye zezibhamu ezingama-725,” kusho uMuridili.