Leli bekungelona isonto lethu
Isonto esikulo liqale kabi futhi kubukeka lizophetha kabi. Kuqale ngokuthi kuwe izinsika zethu oMama u-Esme Matshikiza nobengumfelokazi weciko ubaba uTodd Matshikiza. Sithe sisezwe lokho sezwa ngezindaba zokuwa kweciko, ingadlangadla uqobo uMama uMary uMaThwala Mhlongo. Uwa nje uMaThwala ngayizolo sabe sizwe ukwedlula kwensizwa endala yaseBlekes, eChesterville ubaba uWelcome Msomi. Kuthe kusenjalo izolo sezwa ukwedlula kukadawethu uPinky Mtshali umzwilili weTheku.
Sizwa lokho nje sisabindwe ngucwaningo okungathi uma luba yiqiniso kuguqule izinto eziningi ekwelusweni kokhuvethe. Inhlangano ebheke ezempilo umhlaba wonke iWorld Health Organisation (WHO) iveze ukuthi sekunocwaningo olusha noluveza ukuthi igciwane ukhuvethe seliyatholakala nasemoyeni. Yize kusaphenyisiswa kepha lokhu kukhuluma kusho ukuthi lokhu ebesiphunga ngakho lo mkhuhlane kungahle kungeneli. Lokhu kungabhidliza izinhlelo eziningi zoHulumeni ebezincike ekutheni abantu kumele baqhelelane nokuthi izimfonyo lezi ziwumalamulela. Nokho kusaphenywa kuyosisiza ukuthi siqhubeke nokwenza lokho uHulumeni nongoti abaseluleka ngakho.
Abepolitiki bona bebesazikhotha amanxeba bethulike. Kuqale kwadlula uMphathiswa uKegakilwe eNorth West elandwa wukhuvethe. Sezwa lapho ukuthi oNdunankulu ababili owaseNorth West uSolwazi uMokgoro kanye noWinde waseWestern Cape sebexinekile. Kepha okusishaqise sonke wukwedlula kwensizwa ebisenekusasa eliqhakazile uMnu uRicardo Mthembu obekhulumela uKhongolose KwaZulu-Natal.
Asicwayizanga kwabe sekwehla okukhulu. Izindaba zokwedlula kweNkosazane kaBhusha nengudadewabo weSILO kanye neNdlovukazi yamaRharhabe kwenze sadumala sazibuza ukuthi kuyophela nini lokhu okusizungezile kwasicindezela. Sikhuluma ngoMgqibelo, emsebenzini wesikhumbuzo sokubhujiswa kweSigodlo sasOndini, ISILO ngokujulile lapho sithi ezinye zezinto ezenzeka kithi ziwukusisondeza kuSimakade. Uma sizwa kukhulunywa ngokuseza ngenxa yesifo nokwedlula kwabantu la magama siyawakhumbula kanjalo nokusondela siyasibona isidingo sakho. Kubo bonke abeNkosi abadlulile njengephephandaba sithi dudu, kulabo esibaziyo nesingabaziyo. Khona lapho sigqugquzela ukunakekelana, ukubonelelelana nokuvikelana ngalesi sikhathi esinzima kithi.