Kuyosisiza ukuhlelela ingomuso namuhla
Ohulumeni bamazwe bangafunda kokwanamuhla ukulungiselela ikusasa
Kuvamile ukuthi uma kunezimpi noma izinhlekelele bese abantu abathintekayo begxila kulokho abakubona kuyinkinga ngaleso sikhathi. Okwenzeka ezweni namuhla nasemhlabeni jikelele kuveza isithombe sokuthi sonke sibheke lokhu okusikake namuhla. Kuwumbono wethu ukuthi yize lokho kumqoka kepha okumqoka kakhulu wukuhlelela ikusasa. Kuningi okwenzeka namuhla okusilunguzisa kuguquko oludingekayo kusasa. Uma sibuka kwezemfundo lapho abafundi kumele bagoyele ngasemakhaya ngenxa yokusabalala kokhuvethe.
Lapha inamuhla lisilunguzisa kusidingo sokuba sizibuze ukuthi hlobo luni lohlelo lwemfundo okumele siqhube ngalo. Ngabe kuseyikho ukuthi abafundi batheleke ngobuningi babo ezikhungweni zemfundo noma kungakuhle bafundele ngasemakhaya. Bahlinzekelwe ngobuchwepheshe besimanje ukuze konke kulunge futhi kusheshe.
Ikhona indaba nalapha ezinkampanini. Iningi lazo liphoqeleke ukuba lihlalise izisebenzi ekhaya kepha zibe ziqhubeka nomsebenzi. Lokhu kusebenzela ekhaya kutshale imibuzo kubaqashi ukuthi kambe amahhovisi lawa adla enkulu imali lena ayadingeka yini noma ubuchwepheshe bungahlinzekela kangcono? Iqiniso lithi izinkampani eziningi zingonga kakhulu uma ngahle zinqamule imali yamahhovisi. Zingonga futhi uma zingehlisa isibalo sezisebenzi.
Konke lokhu nokunye kunganomphumela omuhle noma omubi kuzisebenzi nomnotho ngokubanzi. Ngeshwa lezi yizinguquko esingeke sikwazi ukuzigwema ngoba isikhathi sazo sesifikile. Okwethu njengabantu, izinkampani nohulumeni wukuqinisekisa ukuthi siyafunda kabanzi ngesimo esibhekene naso, sithathisele nakwabanye uma kunesidingo ukuze sakhe impendulo yethu yesikhathi esizayo.
Akukho ukungabza ukuthi isimo esikuso size mawala nokuthi njengazo zonke izimo ezidinga uguquko, kuyesabeka esibhekene nakho nalokho okumele sihlangabezane nakho. Okuyosinqobisa lapha yisimomqondo esamukelayo kuzo zonke izakhamuzi nezimboni, amakhono adingekayo emnothweni wethu omusha nobuholi obunombono.
Ngalesi sikhathi iNingizimu Afrika isethubeni eliyingqayizivele kanti konke kusemahlombe ethu.