Ukufulathelwa idlozi
Akekho okumele afise ukufulathelwa yidlozi ngoba lingumzali, liyanakekela, liyavikela kepha khona lapho liyajezisa. Umbhali uchaza ngokuthi ngonjani ofulathelwa idlozi.
Isinamoni isinongo esiphuma esihlahleni esibizwa ngeCinnamonum. Sekunesikhathi eside saqala ukusetshenziswa njengesinongo emlandweni. Ngezikhathi zasemandulo, kwakuyisinongo esingatholakali kalula, yingakho sasivame ukuba yisipho lapho kuphiwa aMakhosi izipho. Nokho, muva nje, sesitholakala kalula cishe kuwona wonke amasuphamakethe kanti asimbi eqolo.
Lesi sinongo sinconywa kakhulu njengesinongo esenza ukudla kuhlale isikhathi eside kungonakali (nokuwumsebenzi ovame ukwenziwa usawoti). Kanti futhi siqukethe ama-anti-oxidant nadingwa umzimba. Ucwaningo olwedlule luveza ukuthi isinamoni inomthelela omkhulu ekuvimbeleni nasekwehliseni izinga lokuhlaselwa yisifo senhliziyo kubantu (nakuba lokhu kungaqinisekisi ukuthi umuntu angeke samngena lesi sifo). ICinnamaldehyde etholakala kuyona isinamoni kubikwa ukuthi yelekelela
kakhulu ekulweni nezifo emzimbeni womuntu. Ngokocwaningo, isinamoni iyalekelela futhi ekwehliseni izinga lokunuka kabi komlomo nokubola kwamazinyo.
Ngaphandle kokusebenzisa lesi sithako ekubhakeni, singasetshenziswa nasekuphekeni. Kanti futhi siyadleka nabukhoma ngokufafazwa ekudleni okufana nephalishi nakumadizethi ahlukahlukene. Kwesanamuhla isiqephu sizocobelelana ngesinkwa esinongwe ngayo isinamoni nesehla esiphundu. Lesi sinkwa ungasidla bukhoma noma usiphelezele ngetiye. Enye indlela emnandi yilapho siphelezelwa ukhastadi ofudumele eceleni okanye u-Ice Cream.