Okhubazekile kwezokuntweza
Nakuba kusekhona abasangabaza amava akhe kodwa kulokhu ukhombisile ukuthi usengumqeqeshi ovuthiwe
Ugila izimanga emdlalweni wokuntweza emanzini owesifazane okhubazekile waseNingizimu Afrika owola izindodo ngenxa yamagalelo akhe kulo mdlalo.
Siyisizwe saseNingizimu Afrika sonke kumele siziqhenye ngokuba noPitso John Hamilton Mosimane.
Okwenza ngisho lokhu ukuthi lo mqeqeshi owazalelwa eKagiso, oneminyaka yobudala engama-56, usetshengisile ukuthi ungumqeqeshi osezingeni eliphezulu.
Ngiphatheke kabuhlungu ngeledlule ngesikhathi uMosimane ehola izikhondlakhondla zase-Egypt i-Al Ahly ekutheni inqobe umqhudelwano omkhulu lapha e-Afrika iCAF Champions League, kwakhona abathi vele ufice leli qembu selihambe isigaba eside kulo mqhudelwano.
Yize kunjalo kodwa kungani singambongeli empumelelweni yakhe? Sijabule siyizakhamuzi zakuleli ukuthi uphakamise ifulegi lalapha eNingizimu Afrika. Ubani omunye umqeqeshi kuleli oseke wakwenza lokhu ukuthi anqobe iCAF Champions League neqembu langaphandle, oseke waqeqesha iqembu engelihamba phambili ngokunqoba lo mqhudelwano?
Kungani lapha eNingizimu Afrika singakwazi ukudayisa abadlali bethu kuyona yonke iminxa yezemidlalo, kunalokho sihlezi sifisa ukugqamisa lokhu okubi ekutheni kudicileke phansi isithunzi sabadlali okanye abaqeqeshi? Sinomdlali kunobhutshuzwayo osimele okunguPercy Muzi Tau, angikholwa ukuthi indlela agila ngayo izimanga lapha eMzansi simhlonipha ngokufanele ngisho ababhali bezindaba imbala.
Isibonelo esilula nje uma ubheka amaphephandaba ase-England kuhlezi kugqanyiswa abadlali bakhona kuze kube ukuthi lowo mdlali uyaduma ngoba udayiswe emehlweni abantu ababhali bezindaba ngisho nabahlaziyi bezemidlalo imbala. Abanye balabo badlali uMarcus
Rashford weManchester United kwathi engakenzi lutho wabe egixabezwa ngejezi unombolo-10 owawugqokwa uWayne Rooney kwathiwa uzokwenza umsebenzi ofana nowakhe.
Ngibuyele odabeni okuyilo olwenze ngabhala le ngosi olukaMosimane oteketiswa ngokuthi uJingles. Lo mqeqeshi owaqala ukuqeqesha iSuperSport United ngonyaka wezi-2001 kuya kunyaka wezi2007, waba isekela mqeqeshi eqenjini lesizwe iBafana Bafana kusukela ngonyaka wezi-2006 kuya kuyanka wezi-2010, emva kwalokho wanikezwa ithuba lokuba ngumqeqeshi kuyo iBafana Bafana ngawo unyaka wezi-2010 kuya kunyaka wezi2012.
Kuthe ngonyaka wezi-2012 wabe esejoyina iMamelodi Sundowns okuyiyo engingasho ngithi ilenzile igama lakhe kwezokuqeqesha. Ngikusho lokho ngoba wanqoba nayo indebe ye-Absa Premiership ngaphansi kwePremier Soccer League (PSL) kayisihlanu ngesizini yangowezi-2013/13, ngowezi-2015/16, ngowezi-2017/18, ngowezi-2018/19 ngowezi-2019/20. Wanqoba iCAF Champions League ngonyaka wezi2016 neCAF Super Cup ngonyaka wezi2107. Phezu kwalokho wanqoba yonke imiqhudelwano yemikhumulajezi kuPSL, lapho kubalwa iNedbank Cup kabili neTelkom Knockout (TKO) kabili.
Waqokwa kahlanu ukuba ngumqeqeshi ovelele kuPSL, ngesizini yangowezi-2013/14, ngowezi-2015/16, ngowezi-2017/18, ngowezi-208/19 nangesizini edlule yangowezi-2020/2021. Kanti useke wanqoba umklomelo womqeqeshi wonyaka lapha e-Afrika ngonyaka wezi-2016.
Kuzona zonke izinto ezinqotshwe uJingles kukhona akade betshengisa ukungakuthokozeli lokho bethi okunguye oza namasu ekutheni iSundowns yenze kahle nguManqoba Mngqithi obe yisekela lakhe isikhathi eside.
Ngisho yena uMngqithi imbala le nto yamphatha kabi ethi uMosimane uyena ongumqeqeshi izinqumo zakhe izona ezinqobisa iqembu ngakho kumele kube nguye othola udumo.
Kuyimanje lo mqeqeshi ngokunqoba kwakhe ngoLwesihlanu owedlule uzifake emlandweni ebalwa nabaqeqeshi asebenqobe iCAF Champions League kabili nangaphezulu. Abanye balabo baqeqeshi nguManuel Jose wasePortugal owawunqoba kane ne-Al Ahly, uMahmoud Al Gohary wase-Egypt wawunqoba kabili ne-Al Ahly, u-Oscar Fullone wase-Argentina owawunqoba neASEC Abisjan neRaja Casablanca, uStefan Zywotko wasePoland owawunqoba ne-IJS Kayiblie, uCeleste Tabwe owawunqoba neTP Mazembe kube uBoubacar Fofana owawunqoba neHafia Conakry yaseGuniea.