Afuna iComrades
Amawele aseMkhambathini angabasubathi azimisele ngokulandela ezinyathelweni zawaseRussia ngokukhonya emqhudelwaneni wokusubatha iComrades Marathon.
Abasubathi ababili besifazane baseRussia u-Elena no-Olesya Nurgalieva, bangabanye abangasoze bakhohlakala emlandweni njengoba bazakhela igama benqoba umqhudelwano iComrades Marathon izikhawu eziningi. U-Elena waba ngumpetha kayisi-8 kwathi u-Olesya yena waba ngumpetha kathathu.
Impumelelelo yala mawele akaNurgalieva ifiswa yizintokazi nazo ezingamawele zakwaMkhize uThobile noBathobile ezingabasubathi.
ElaboHlanga likhulume noBathobile ngeledlule ophume endaweni yesithathu emqhudelwaneni obizwa ngeJosiah Gumede Marathon.
“Kungijabulise kakhulu ukuphuma endaweni yesithathu. Indawo engcono kakhulu kimina ngoba umzimba wami ubungangivumeli kwazise ngilimale isikhathi eside nokwenze ngahlala iminyaka emibili ngingagijimi” kusho uBathobile.
Intokazi ebaqwaqwade emakhanda nguCacisile Sosibo, kwalandela uNtokozo Happiness Mkhize kwathi kweyesithathu kwaphuma yena uBathobile. Kwabesilisa odle umhlanganiso uToka Badboy, kwalandela uMbuleli Mathanga, endaweni yesithathu kwangena uSipho Mbanjwa.
UBathobile odabuka eMkhambathini esigodini sakwaNtweka uneminyaka engama-24. Ufunde eNtweka Primary School, iseTable Mountain Primary School wasonga eSt Julius Secondary School. Uqale ukuba umsubathi esafunda emabangeni aphansi.
Waqala ukugila izimanga eneminyaka yobudala eli-13 ngesikhathi emela iKwaZulu-Natal Athletics emqhudelwaneni wezifundazwe kuTrack and Field neCross Country. Wake wagijima iDurban City Marathon ebangeni lamakhilomitha ali-10 neMandela Marathon ebangeni le-10km.
Eminyakeni edlule uke wanqoba umqhudelwano owawuhlelwe i-Athletics South Africa (ASA) wabaneminyaka engaphansi kwengama-23 ebangeni lama3 000m owawubanjelwe eStellenboch.
ElaboHlanga limbuza ngezinye izifiso zakhe uBathobile uthe: “Okokuqala ukubeka izikhathi zami kumarekhodi. Okukhulu kakhulu ukuthi nginqobe imiqhudelwano emikhulu okungaba iSpar Woman Challenge, bese ngimela iNingizimu Afrika emiqhudelwaneni yeTrack and Field kanye neyeCross Country”.
Wenza izifundo zeSporting Coaching neCoaching Science eMajuba TVET College.
Uthe bayafisa ukuthi sifezeke isifiso sabo benodadewabo sokuthi bagijime umqhudelwano waminyanka yonke iComdrades Marathon baphume phambili ngokulandelana.
ElaboHlanga likhulume noAyanda Mncube ongumqeqeshi walezi zintokazi othe kumkhathazile ukulimala kukaBathobile isikhathi eside.
“Kumuphazamise kakhulu uBathobile ukulimala njengoba ehlale iminyaka emibili engalulami. Kulo nyaka besibona ukuthi uyalulama uzokwazi ukugijima kodwa ngenxa yokhuvethe yamiswa imiqhudelwano eminingi. Ikusasa ngilibona lilihle kakhulu kuyena kodwa kulele ekutheni azimisele bese eyabekezela. Nginesiqiniseko sokuthi siyofika isikhathi esifanele ukuthi aphakamise ifulegi lalapha eNingizimu Afrika,” kusho uMncube.
Ngakolunye uhlangothi noThobile akazibekile phansi njengoba eseke amela isifundazwe iKwaZulu-Natal emiqhudelwaneni eminingi. Uke wagijima iQhapheqholo Half Marathon ebangeni le-10km, uyena ophethe irekhodi lo mqhudelwano iJoshua Gumede Marathon.
Ngokwezikleliso ze-ASA ebangeni lezi5000m, uyena ohamba phambili kuleli. Yena wenza izifundo zeManagement Assistance Diploma.
elaboHlanga likhuluma noThobile uthe kumjabulisile ukuba agijime emva kwesikhathi eside.
“Kube umjaho omuhle kakhulu emva kwesikhathi eside ngagcina ukugijima. Ngaphambi kokugijima lo mjaho ngizilolonge amasonto amathathu. Indawo engiphume kuyona ngeke ngaqamba amanga bengingalindele ukuthi ngingaba kuyona, bengithi ngiyazigijimela nje. Kungingajabulisile ukugijima ngigqoke iminfaniswano yekilabhu entsha,” kusho uThobile.