Kuzoba uZibandlela ongajwayelekile KwaZulu-Natal
UZibandlela yisikhathi lapho imindeni ihlangana ibungaze ukusongwa konyaka, futhi yisikhathi lapho imicimbi emikhulu yokunandisa abantu iba mningi kepha kulo Zibandlela kuzoba ngohluke kunayo yonke engaphambi kwawo, kuzoba ngozohlala emlandweni yemindeni, abathandi bobumnandi kanye nezwe uqobo kuze kube phakade ngenxa yokhuvethe oluhlasele umhlaba. Kwabathanda ubumnandi lona kungaba uZibandlela abangawubiza ngonosizi ngenxa yokuthi imicimbi emikhulu ejwayele ukwenzeka ngawo ngeke ibe khona. Le micimbi kodwa kuzokhumbuleka ukuthi yiyo elekelela ukuthi abantu abathize besifundazwe iKwaZuluNatal bathole imisebenzi ngakho ukuvalwa kwayo kusho ukuthi kukhona abazolahlekelwa ngamathuba omsebenzi futhi nomnotho wesifundazwe kuyacaca ukuthi angeke ukhule ngendlela ojwayele ukukhula ngayo ngalesi sikhathi sonyaka. Kepha imiphefumulo ibalulekile ukudlula imali.
UMkhandlu Ophethe Isifundazwe iKwaZulu-Natal (Provincial Executive Council) ucubungule izicelo eziningi ezahlukahlukene ebezivela kubahleli bemicimbi maqondana nokusingatha imicimbi emikhulu ehambisana ngqo nesikhathi samaholide. Lo Mkhandlu ucubungula lezi zicelo nje ububheka nesimo sokhuvethe esihlasele isifundazwe kanye nezwe uqobo. Ube uMkhandlu usululekwa ngodokotela kanye nososayensi ukucubungula lezi zicelo okugcine kuphume isinqumo sokuthi ayingasingathwa imicimbi emikhulu kulesi sifundazwe njengoba kunesimo esibi sokhuvethe.
UMkhandlu uthe kufanele kukhunjulwe ukuthi izwe lisengaphansi kwesigaba sokuqala semvalelwekhaya futhi izwe lingaphansi kwesimo senhlekelele (State of Disaster). Futhi abantu bayagqugquzelwa ukuba bavakashele lesi sifundazwe, baphinde futhi babe nemicimbi emincane yemindeni ngaphandle kokuyekethisa imithetho elawulayo yesimo senhlekelele ezweni. Iqiniso lithi igagasi lesibili lokhuvethe lingaphinde lihlasele noma yinini isibonelo esilula yizibalo ezinyukayo zabanokhuvethe kwezinye izifundazwe njengamanje.
Ukugcizelela leli phuzu lokuthi kungabikhona imicimbi emikhulu kulesi sifundazwe, uMkhandlu omkhulu uphethe ngesinqumo esithi kungabi bikho mnyango kaHulumeni ozokweseka imicimbi emikhulu.