KWEZINYE IZINGXENYE
ERome:
UPapa uFrancis ngesonto eledlule ugcobe amaKhadinali ali-13 amasha okufaka phakathi nongowokuqala woHlanga wase-USA ukuba abambe lesi sikhundla. AmaKhadinali agcotshwa emcimbini obizwa ngokuthi yiConsistory, okuthe kulo nyaka kwancishiswa isibalo sabantu abawuhambele ngenxa yokhuvethe. Kuqala bekuba nezinkumbi zabantu kodwa kulokhu iKhadinali ngayinye ibikwazi ukuletha izihambeli eziyishumi eSt Peter’s Basilica lapho uPapa ebanike khona iringi kanye nesigqoko esibomvu esaziwa ngokuthi yiBiretta.
EParis:
Amaphoyisa asebenzise isisi esikhalisa unyembezi ngesikhathi kunemashi ebibhekiswe odlameni lwamaphoyisa ngesonto eledlule, ngemuva kokuthi ababhikishi abebefake izimfonyo beqhumise okhilikithi, bavimba imigwaqo baphinde bajikijela amatshe. Iningi lababhikishi libhikishe ngokuthula kepha kube namaqembu amancane abexabana namaphoyisa. Izimoto ezimbili, isithuthuthu kanye nezinto zamabhilidi kushisiwe okuholele efwini elimnyama ebelibonakala kule ndawo obekubhikishwa kuyona. Izinkulungwane zabantu zibhikishe emadolobheni iLille, iRennes, iStrasbourg kanye namanye amadolobha. Le mibhikisho iqhamuke ngemuva kokusabalala kwevidiyo eyimizuzu emibili lapho amaphoyisa amathathu eshaya umkhiqizi womculo wabohlanga uMichel Zecler. Lesi sigameko sokuhlaselwa kukaZecler sivuse intukuthelo ngomthetho osalungiswa othathwa njengokunciphisa ilungelo lezintatheli lokubika ngesihluku samaphoyisa. Lo mthetho uzokwenza ukuthi ukusabalalisa izithombe zamaphoyisa ezimweni ezithile ezingawabeki kahle kube yicala, kodwa abaphikisana nalo mthetho bathi uzobe ucindezela inkululeko yabezindaba.
Iran:
UMengameli waleli lizwe ngesonto eledlule usole i-Israel ngokubulala usosayensi oqavile wakuleli lizwe obesolwa ngamazwe asentshonalanga ngokuhola uhlelo oluyimfihlo lwebhomu yenuzi (nuclear bomb). Abezenkolo base-Iran kanye nombutho sebesonge ngokuphindisela ukubulawa kukaMohsen Fakhrizadeh ngeledlule. Abezindaba kuleli lizwe babike ukuthi uFakhrizadeh ushonele esibhedlela ngemuiva kokuthi izinkabi zimdubule emotweni yakhe eduze kwaseTehran. “Nakulokhu futhi, izandla ezimbi zokuhlukumeza zomhlaba zingcoliswe yigazi le-Usurper Zionist Regime” okuyitemu okubizwa ngalo i-Israel,” kusho uMengameli uHassan Rouhani (osesithombeni) esitatimendeni sakhe. “Lokhu kubulawa kweqhawe uFakhrizadeh kusibonisa ngokuphelele ukulahlekelwa yithemba kwezitha zethu kanye nenzondo yazo. Ukufela ukholo lwakhe ngeke neze kubambezele impumelelo yethu”