Lube yimvulamehlo ukhuvethe ekomitini lezemidlalo
Nakuba ukhuvethe luphazamise yonke into kepha ikomiti loMnyango Wezemidlalo eSishayamthetho saKwaZuluNatal lisazibophezele ekusebenzeleni umphakathi ngokuqinisekisa ukuthi lo Mnyango uyahlangabezana nezidingo zomphakathi.
Lokhu kuvezwe uSihlalo waleli komiti, uNkk u-Ayanda MaBani Mapena, engxoxweni nelaboHlanga lapho ebecacisa ngokusebenza kwaleli komiti elakhiwe ngamalungu ali-10 aphuma emaqenjini epolitiki amelwe eSishayamthetho.
Uqale waveza ukuphazamiseka kwezinhlelo uMnyango obunazo ngenxa yokhuvethe wathi babe ngabokuqala abangakwazanga ukuqhubeka nezinhlelo zabo baze baqala esigabeni sesibili semvalelwakhaya. Uthe nakuba kunjalo bazamile ukwenza obekulindeleke kubo.
UNkk wakwaMapena uthe kuzwelonke ezemidlalo zibukeka kuyinto yokuzijabulisa kodwa babe nezingxongxo ukuqeda lokhu kwazise zinomthelela kwezomnotho njengoba abantu abaningi bezisebenzisa ukuziphilisa.
Uthe ikomiti like laba nenkinga njengoba uma amalungu omphakathi uma enesizungu avele adlale unobhutshuzwayo enze nemiqhdelwano.
“Besizama ukuxwayisa umphakathi ukuthi isikhathi asivumi noma bekusijabulisa ngaphambilini ukuthi intsha ibambe iqhaza kwezemidlalo ukuze ingagxili ezidakamizweni kodwa kulesi sikhathi bekusiphoqa ukuba sibazise ukuthi isikhathi asivumi,” usho kanje.
Uthe eminye yemidlalo ephazamisekile ngenxa yokhuvethe ileyo enesasasa esifundazweni yamaSouth African Local Government Association Games (SALGA) lapho kuncintisana zonke izifundazwe. Uveze ukuthi kunezingxoxo zokuthi ihlukaniswe nakuba kucaca ukuthi ayisezofana nendlela ebeyiyona entsheni ngokuzilungiselela nokuncintisana.
Uqhube wathi: “Nakuba ingabanga bikho imidlalo kodwa uMnyango siwubonile ulekelela, usebenzisa imali engafakwangwa esikhwameni sosizo sikaHulumeni. Noma bengadlalanga bathole imali abavame ukuyizuza kodwa uMnyango ubugwema ukuthi abadlali basale sebelahlekelwa kakhulu.”
Uthe ukhuvethe lubafundise ukukwazi ukucabanga bathole namasu ezindlela abangadlala ngazo njengokugqugquzela ukuthi kudlalwe imidlalo enjengeChess nge-inthanethi.
Kwezokuthuthukiswa komnotho, uNkk wakwaMapena uthe: “UMnyango ubulekelela iqembu noma abadlala imidlalo uqobo. Uma kufika abeza ngokwebhizinisi bebeyalelwa esikhwameni esavulwa kuqala samabhizinisi esingaphansi koMnyango Wezomnotho.”
Uthe okumthokozisile ukuthi bekulula ukuhlomula kulesi sikhwama. Uqhube wathi bekudingeka ukuthi umuntu akwazi ukuchaza ukuthi ulahlekelwe kangakanani ngokwemali. “Le nto yebhizinisi ilula ngoba uma uthola imali kumele uyise ebhange kuvele ukuthi ngempela ulahlekelwe imali kungabi ukusho ngomlomo kuphela. Ngesikhathi uMnyango ususazisa ukuthi sebezovala sabatshela ukuthi ngeke bakwazi ukusheshe bavale ngoba umuntu ohlala emakhaya kunzima ukuthi aye ebhange, athole incwadi yekhansela. Sabanxusa ukuthi bangasenzi isimemezelo kusizindalwebu sabo kuphela kepha basebenzise nemisakazo ukuthola bonke abantu abathintekayo,” kusho yena.
Uthe ikomiti lakhe lifuna ukuthi ingqalasizinda yezemidlalo ibe kubantu. “Isifundazwe iKwaZulu-Natal sakhiwe kakhulu izindawo zasemakhaya. Phambilini bekunzima ukuthi abantu basemakhaya bathole izinkundla nezinsiza zokudlala.”
Ngokusho kwakhe, ikomiti ligxile ekutheni kungani ingqalasizinda esemadolobeni ingabikhona ezindaweni zasemakhaya.
Uveze ukuthi besemhlanganweni womphakathi eNquthu kwaba nelungu lomphakathi elabatshela ukuthi izingane zalo ezingabasubathi zaba nenselelo zigijima eKings Park, eThekwini, kwazise zaziqala ukuba senkundleni yalolu hlobo lokho kwaphoqa ukuthi zinikwe izinsiza zokugijima.
“Kwabalimaza kakhulu laba bantwana ngoba noma baphuma isibili kodwa babengaphuma phambili. Baba nenkinga yokubhekana nalolu hlobo lwenkundla kwazise bajwayele inkundla ejwayelekile. UMnyango wabona ukuthi umsebenzi mkhulu ngoba sabona izingane zicindezelekile. Le nto yasithinta kakhulu sabona ukuthi okungenani isifunda kumele sibe nalolu hlobo lwenkundla,” usho kanje.
Uqhube wathi nakunobhutshuzwayo bake babone ukuthi amapali asezindaweni zasemakhaya awafani nawasedolobheni. Uthe ikomiti libuza uMnyango ukuthi wenzani ukugqugquzela aboHlanga ukuba bangene emdlalweni okugcwele kuyo abelungu.
“Kumele kube nezinkundla zekhilikithi emakhaya kuphinde kufukulwe lezi zingane ezingenalutho. Sifisa izingane zikwazi ukwakha imali ngezemidlalo,” kuphetha uNkk wakwaMapena.