UBiden uthi umbango wezohwebo neChina usazoqhubeka
UMengameli osanda kukhethwa e-USA uJoe Biden usekuqinisekisile ukuthi angeke athathe zinyathelo zokususa intela yempahla ebekwe uHulumeni kaDonald Trump empahleni evela eChina uma esethatha izintambo.
Engxoxweni abe nayo nephephandaba iNew York Time eshicilelwe kuleli sonto, uBiden uthe isu elifanele eliphathelene neChina elokuqinisekisa ukuthi wonke amazwe abambisene ne-USA e-Europe nase-Asia ahuba ihubo elilodwa, nokuyinto athi uzoyibeka phambili uma esethatha izintambo eWhite House.
UBiden uthe umgomo wakhe wezohwebo uzobhekana ngqo nezenzo ezingezinhle zeChina, okuhlanganisa ukwebiwa kwemicabango yabantu (Intellectual Property), ukulahlwa kwempahla, uxhaso lwezimali lukaHulumeni olungekho emthethweni nolunikwa izinkampani kanye nokuphoqa izinkampani ukuthi zidalule ubuchwepheshe ezinabo.
IChina ibinethemba lokuthi ukungena kukaHulumeni kaBiden kuzoletha ithuba lokuthi kube nezingxoxo ezintsha zohwebo. Nokho akumangazi ukuthi uBiden uzwakala sengathi uzolandela lapho kugcine khona uTrump.
La mazwe akwazile ukusayinda isigaba sokuqala sesivumelwano sezohwebo emva kombango osudonse cishe iminyaka emibili kunokugixabezana ngezintela zempahla. Lesi sivumelwano sishayelwe ihlombe uHulumeni kaTrump kodwa sengathi inqubekela phambili ayikazukubonakala maduze uma isazoba khona.
Isivumelwano sibophezele iChina ekuthengeni impahla yaseUSA elinganiselwa ezigidigidini ezingama-$200 ngaphezulu kwale ethengwayo manje esikhathini esiyiminyaka emibili. Izenzo zikaTrump zakamumva kanye namagama kaBiden kukuthela amanzi abandayo konke obekubonakala njengethemba.
Amagama akhe akuveza ngokusobala ukuthi yize kunokwehlukana ngemibono ezindabeni zangaphakathi e-USA, womabili amaqembu akhona okuyiRepublican Party neDemocratic Party awavamile ukuphikisana ngokumele kwenziwe ukubhekana neChina.
Ngesikhathi uMengameli uTrump ezabalaza ukuvuma ukwehlulwa okhethweni akekho osathe vu ngemigomo yakhe yangaphandle, ngisho nalo ithimba likaBiden okuzosala konke kube utaku lwakhe lithule.
Kuleli sonto i-USA ifake unswinyo iChina National Electronics Import and Export Corperation ngoba ithi ixhasa ubunhloli be-inthanethi eVenezuela. Lesi yisenzo sakamumva sokuzama ukunqinda amandla iChina kulo mbango wezohwebo, kanti okokuqala ukuthi ijeziselwe izinsolo ezithinta elinye izwe. Kubonakala sengathi lapha kushaywa izinyoni ezimbili ngetshe elilodwa ngenxa yobudlelwano obungebuhle noHulumeni abakhona kula mazwe.
IChina ibe isinxusa i-USA ukuthi ilususe lolu nswinyo olungekho emthethweni. Okhulumela uMnyango Wezangaphandle uHua Chunying uthe: “Siyaphikisana nokufakwa konswinyo kanye nezinye izindlela okuhloswe ngazo ukuphoqa abantu baseVenezuela ukuthi baguqule indlela yabo yentuthuko.”
EMiddle East nakhona isimo simazonzo emva kokuthi kusocongwe usosayensi wenuzi ophambili e-Iran, uMohsen Fakhrazideh, ngesonto eledlule. I-Iran isola abahambisana ne-USA i-Israel ngalesi senzo, nokho ibingakaphawuli ngalokhu kuhlasela. Abahlaziyi bathi ukubulawa kukasosayensi lo kungenzeka ukuthi kwenzelwe ukuhlokoloza i-Iran ukuze iziphindiselele, nokuzophoqa uBiden ukuthi angayibuyiseli esivumelwaneni sohlelo lwenuzi ne-Iran.
Kusele amasonto cishe ayisithupha ngaphambi kokuthi agcotshwe uBiden ngoMasingana wezi-2021. Lesi yisikhathi esiningi kabi sokuthi uTrump aqhubeke nemigilingwane ashiyele uBiden intaba yezinkinga okuzomele abhekane nazo.