Kancane kancane iyawulahla umthwalo kuTrump
Mhleli
Inkani ihlukene kabili. Kukhona inkani enobuhlakani. Leyo nkani iba nomvuzo omuhle ekugcineni. Bese kuba nenkani ewubuduphunga nokungacabangi. Leyo nkani iphelela ezeni ngoba kayinamiphumela ejabulisayo ekugcineni. Ngichaza ukuthi okaTrump udaze eyenkunzi ingafuni ukungena ediphini. Wonke amehlo omhlaba abebona ukuthi uyayazi into ayenzayo.
Uyidaze inkani waze wagijimela ezinkantolo ngenxa yakho belu ukuthi ubenganelisekile ngemiphumela yokhetho. Nalapho kwaba nhlanga zimuka nomoya. Ubhodle umlilo kwaze kwaba ukuthi inhlangano yokhetho ithatha isinqumo sokuyobala futhi kwezinye izifunda ezintathu. Kube namathemba okuthi ucilo angathuke ezishaya endukwini emva kokubala. Kuphi la? Ngoba imiphumela iphinde yavuna uJoe Biden.
Sekuyacaca ivovekile inkani kaDonald Trump. Usebonile neKhabhinethi yakhe kanjalo nabalandeli ukuthi kabasale sebeyivuma induku ukuthi ilishaye ikhanda, qede lagqemeka enkulu ingozi. Lokhu kuyisifundo nakwabanye omengameli abasazolandela e-USA ukuthi ungabowaphatha noma ikanjani amandla ombuso ngoba abavoti bakubhekile.
Uma ungahambisi ngokwezimfuno zabo bakulahlisa okwenyongo yenyathi. Ngineqiniso okaTrump uhlukumezekile emoyeni wakhe ngokwehlulwa ngoba ubumuzwa ekhuluma ukuthi ubesafisa elinye ihlandla lobuMengameli ukuze afezekise izinhloso ebezisemqondweni wakhe. Okunye ukukhuluma kuthi nokuba yisifiki kwakhe kwezepolitiki kube nomthelela ekutheni umbuso wakhe ube namaphutha angabekezeleleki.
Uma lokho kuliqiniso, kusho ukuthi kubalulekile ukuthi uma uzongena kwezombusazwe uqale uyofundela isayensi yezepolitiki uphinde uzinike isikhathi eside sokuzihlanganisa neqembu elithile lezepolitiki ukuze ufunde okuningi. Uphinde uzihlanganise nezinjulabuchopho esezayihamba le ndlela yobuholi bezepolitiki ukuze zikucobelele, zikucije ngobuhlakani bokuphatha izwe.
- nguSipho Mbatha Mhleli
Bengiyithanda le ndoda enguTrump ngento eyodwa, ukubeka izwe layo phambili okunye kuyalandela. Umuntu osancoma idemokhrasi akakayiboni kahle ilibulele izwe ngoba iyambuluza kuvele kuthiwe siyalingana kube kudlalwa ngaboHlanga, ucabange nje uma kukhulunywa ngomnotho ukuthi ukephi wena njengowoHlanga, yikhona ngithi kusayothatha isikhathi uma kuthiwa sakha umnotho.
Ucabange ukuthi nawe ubaliwe kudemokhrasi umnotho owabelungu yikho singenandaba noma kuthiwa uyalimala ngoba vele akusiwo owethu kukhona abawuqhoqhobele. Siyoqala ukukhathazeka mzukwane sangena nathi kwezomnotho wabuya nomhlaba wethu.
- nguMthoko Mbonambi Mhleli
Akudlalwa e-USA izinhlaka zikaHulumeni zizimele ayikho indlela abengabambelela ngayo ekubeni imiphumela ibisibalwe okwesibili nayo isimuphika. Kuphinde kube ezobunhloli zaseUSA aziyidlali indaba yepolitiki, ngakho-ke ngaphandle kwazo ayikho into abengayenza.
- nguSphesihle Mnguni Mhleli
Abase-USA bazozisola ngokungamukhethi uTrump okwesibili. Ubezoqedela umsebenzi wakhe afeze izethembiso azithembisa abantu. Ubeza kahle kakhulu. Kodwake intando yeningi ikhulumile. Siyafisa namazwe ase-Afrika abukele e-USA ngokwenza ukhetho.
- nguThami Duma Mhleli
Kuyomsiza impela lokho ubhede kakhulu uTrump akazi lutho ngepolitiki, ulwazi lwakhe lugcwele emabhizinisini hhayi kupolitiki. Ufike wahlukanisa i-USA abamnyama nabamhlophe wakha uqhekeko phakathi kwabo, isihluku samaphoyisa besibhekisa kwaboHlanga akangenza lutho ukubavikela. Asiyiphathi eyalo mkhuhlane wehluleke wancama.
- nguMbongeni Vilakazi Mhleli
UTrump into emakhele amazinyo abushelelezi ukuthi ubekholelwa kakhulu kuNkulunkulu indaba yososayensi engayingeni okumenze wamubi kubantu abafana noBill Gate okuyibona abalawula i-USA. Okunye impilo yobumnyama ubengayithandi efana nezitabane, ukuhushulwa kwezisu, ukushintshwa kobulili waphinde wazifakela isigcwagcwa ngokuthi kumele izingane ezikoleni zibuyele ekuthandazeni ekuseni.
- nguMuzie Bhekithemba Mvubu Mhleli
Sithandazela ukuthi nabantu baseNingizimu Afrika bangathola isifundo idamuke inkungu, ikakhulukazi aboHlanga bazi ukuthi iqembu uma selibheda njengoKhongolose uyalikhipha embusweni ukuze lifunde isifundo.
- nguLucky Mkhize Mhleli
Unzenzile kakhalelwa, ubenempakamo kakhulu, imigomo yakhe yezangaphandle ibiseya kakhulu, iChina namaRashiya ubewazonda engazenzisi, aboHlanga base-USA ubebabuka njengezilwane. Ayihambe imbhodla iyohlala ekhaya. Bakhulumile abantu.
- nguSmangaliso Bhungane Mzilangobe
Mhleli
UbenguMengameli engancengi, engadonswa ngekhala futhi engathembele kosomabhizinisi abawohlohla impi e-Afrika ukuze bazuze. Izintatheli bezingamuthandi vele.
- nguSyabekezela Gudluza Mhleli
Lo baba engqondweni yakhe igama elithi ukwehlulwa alisebenzi kuye, yikho okumgulisa kakhulu ebeselokhu ebeka izaba ezingenabo ubufakazi.
- nguRaphael Sangweni Mhleli
Impela akenze njalo okaTrump akukho okunye kuhlwa ngomnyama. Akayivume induku ngoba amaMelikana asekhulumile ngevoti!
- nguThulani Ngwenya Mhleli
Mina ngifunde lukhulu ngomthelela wabezindaba empumelelweni nangokwehlisa isithunzi, babika okubi bafihle okuhle.
- nguKholwani Dube Mhleli
Siphelile isikhathi nenkani iphelile kuleli bhoklolo lomhlaba. Wonke vele anjengoMugabe nalona ogolozela iKhomishini wayenjalo naye.
- nguChris Shabangu Mhleli
UTrump kumanje ulungisa amaphepha azowafaka eNkantolo Yokwedluliswa Kwamacala. Ngenxa yobufakazi obuqanda ikhanda anabo inkantolo izomvuna.
Ekgcineni uJoe Biden uzosuswa esikhundleni bese kufungiswa uTrump ihlandla lesibili mhla zingama-20 kuMasingana wezi-2021.
- nguSwelihle Toti Mhleli
Ayivume iphume le nsizwa ilitholile ithuba umdlalo wepolitiki njelona, uma unamaphaphu aphezulu umelwa inhliziyo.
- nguMthunzi NX Mhleli
Alukaqondakali ukhetho lwaseUSA ukuthi ngempela ubani olunqobile ngoba uTrump usaphenya ezikhungweni zokuvota nezinye izifunda ezikhwabanise amavoti.
- nguSipho Cyprial Mhleli
Sasingekho nesidingo sokuthi aye enkantolo, akagobe uphondo avumele inkululeko yabantu base-USA sebekhulumile, akayeke ukuma endleleni kaBiden.
- nguSbonelo Shezi Mhleli
Akadede uTrump uwenzile owakhe umsebenzi yize nezintatheli bezingekho naye kodwa ukwenzile ayekuthembise abantu bakhe.
- nguSandile Ngubelanga Mhleli
Ngingajabula uma zingase zizoyishukela eduze kwe-ANC namalungu ayo ukuze izobona ukuthi imbodla ishukwa kanjani uma isikhathazile.
- nguS Marustar Ndebele Mhleli
Kodwa vele le ndaba kaJoe Biden yokuthi aphiwe amavoti engakalunqobi ukhetho ngangivele ngibona ukuthi izoba nogcobho.
B Mdlalose
- nguSboniso