Phezu kobuhlungu sihalalisela Omnyama noZulu wonkana
Ongangezwe Lakhe ugubha iminyaka engama-49 eseSihlalweni seLembe
Akukho ukungabaza ekutheni lona akubanga wunyaka omuhle kuNdlunkulu kaZulu. Ukwedlula kwamalungu ayo kuyo yonke imizi kube yizindaba ezibuhlungu. OkweSILO kuze kwaphindwaphindwa njengoba endlini kaBhusha kwedlule udadewaso nobeyiNdlovukazi yamaRharhabe, uNoloyiso. Kuthe kusenjalo kwase kwedlula uMntwana uLethukuthula waseNaleni. Lezi zigameko zibuhlungu noma ngabe uzibuka ngaliphi iso. Nokho kuleli sonto kube khona ukujabula kuZulu naseNdlunkulu ngesikhathi Omdala eba nemicimbi emibili emqoka. Owokuqala kube nguMkhosi WoSelwa noyinhliziyo yeSihlalo. Kuke kwaba nokwesaba ukuthi ungahle uphazamiseke nokho ngobuchule Omdala ukwazile ukuqinisekisa ukuthi ukhona. Nakulokhu ziyibambile inkunzi!
Omunye umcimbi obe mqoka yilowo wokubungaza iminyaka engama-49 iSILO siseSihlalweni sikaZulu. Lokhu kumqoka kuZulu nakuso iSILO uqobo. Esikubonayo yinqaba kutholwa uqobo, kwagcina ngezikhathi zeNgonyama uMpande eyaphila iminyaka eminingi nabantu bakayise.
Njengephephandaba laboHlanga siyayilandela imisebenzi yeSILO emihle. Izinkulumo zaso zihlale ziwumhlahlandlela yingakho nje sizishicilela ngeqholo. Sigqugquzela nabafundi belaboHlanga ukuba lezi zinkulumo bazetshise ngoba kuzo kukhona umlando ojulile wezolo nenamuhla.
Esikubonayo yinqaba kutholwa uqobo, kwagcina ngezikhathi zeNgonyama uMpande eyaphila iminyaka eminingi nabantu bakayise
OMdala ezikhathini eziguqukayo nezinezinselelo uyaqhubeka nokuba wuphawu lobunye nomvuseleli nomelusi wamasiko kaZulu. KoMnyama sithi mana njalo luHlanga lwaMakhosi, Mana njalo SILO esikhulu, mzukulu waMakhosi oHlanga. Akube kuhle kuZinyandezulu, uqhubeke usihole SILO soMhlaba.