Esikumemezela ngezwe kunomthelela ekuhloniphekeni kwalo
Siliqale isonto izinto zithanda ukutsheka ezimakethe zemali. Umnotho uyinto ebucayi enyakaziseka kalula ngezinkulumo ezizungezayo. Ukuqagela kwethu kusikhombisa isiphakamiso esenziwe ngelinye lamaqembu asePhalamende lokungamethembi uMengameli wezwe, uMnu uCyril Ramaphosa.
Lokhu kuholele ekutheni amalungu ePhalamende kuthi ngoLwesine avote phezu kwalesi siphakamiso. Silobe lapha kulindeleke umphumela wokuvota ePhalamende. Umhlaba ungalethemba kanjani izwe elitshela umhlaba wonke ukuthi alimethembi uMengameli walo. Lelo lizwe kusho okukhulu ngalo. Abantu abaningi abazukhumbula ukuthi umphumela utheni, kodwa ngeke bakhohlwe ukuthi kuke kwaba nalesi siphakamiso.
NgoMsombuluko zingama-30 kuLwezi 2020
Liyazabalaza idola lase-USA ukwehlela ngezansi, lincama ukushudulisana nerandi endaweni ecishe isondelane kulezi zinsuku. Zivule izimakethe ngoMsombuluko irandi lilahle amasenti ayisithupha kwagcina idola lase-USA lilingana namarandi ali-15,25 kuvukwa ekuseni.
Zidudulana ziya emuva naphambili phakathi kwerandi noPondo waseBritain laze lavuma ukwehlela ngezansi irandi ladedela amasenti amathathu nje kuphela ekuseni ngoMsombuluko. Kuthe kuvula izimakethe zemali irandi lakwazi ukuhlangana namanye angama-20,34 ngaleyo ndlela labe selilingana ngamandla noPondo waseBritain.
Irandi likhombise ukuthi uma lihlangana namanye ligcina lilingana neYuro, noma lokho kuliveza obala ukuthi amandla erandi ngalinye awalingani naweYuro elilodwa. Kuvukwe ngoMsombuluko iYuro lilingana namarandi ali-18,25 ekuseni kuvula izimakethe zemali.
Izinto zithanda ukutsheka uma sibuka intengo yegolide ebambe eyehlayo kulezi zinsuku. Kuvule izimakethe ngoMsombuluko intengo yegolide yehlile kulokho eyayiyikho kwehlukwanwa ngoLwesihlanu, kwavukwa ekuseni i-awunsi legolide libiza amadola ase-USA ayi-1 771. Lokhu kusikhumbuza lapho yayikhona intengo yegolide ezinyangeni eziyisihlanu ezedlule, yenyuka yafike yahlala phezulu.
Noma yehle kancane intengo kawoyela ongahluziwe kuyaye kuthokozise abaningi ngoba kuthinta izinhliziyo zeningi elinezimoto, elifisa ukuba noKhisimusi omnandi. Kuvule izimakethe ngoMsombuluko intengo kawoyela ongahluziwe ingamadola angama-47,56 ekuseni ngoMsombuluko.
NgoLwesibili lulunye kuZibandlela 2020
Kuphinde kwavukwa ekuseni ukhukho lumuka nomoya erandini, lehluleka ngisho ukubambelela lapho belikhona ngayizolo. Kuvule izimakethe idola lase-USA lilingana namarandi ali-15,40 ekuseni ngoLwesibili.
Liphinde laphunyukwa ngamasenti athile irandi ngenkathi libhekene noPondo waseBritain okugcine ngokuthi uPondo waseBritain ulingane namarandi angama-20,58 kuvukwa ngoLwesibili.
NeYuro liqhubeke lapho ligcine khona ngayizolo lidudula irandi, kwavula izimakethe zemali iYuro elilodwa lilingana namarandi ali-18,40 ekuseni ngoLwesibili.
NgoLwesithathu zimbili kuZibandlela 2020
Kuvukwe kumnandi ezimakethe zemali lapho idola lase-USA lidudulwe yirandi lagcina lilingana namarandi ali15,29 kuvula izimakethe zemali ekuseni ngoLwesithathu.
Kuyabonakala ukuthi belingazibekile phansi irandi ebusuku bangoLwesibili ngoba imiphumela ibonakale ekuseni ngoLwesithathu lapho kuvule izimakethe uPondo waseBritain ulingana namarandi angama-20,51.
Kuthande ukudida izinto ukuthi kuvukwe izimakethe zimamatheka kodwa iYuro liphinde lenyuke lalingana namarandi ali-18,46 ekuseni ngoLwesithathu.
NgoLwesine zintathu kuZibandlela 2020
Kuse lisabambelele irandi kulokho ebeliyikho ngayizolo, kodwa nokho kwavukwa ekuseni idola lase-USA lilingana namarandi ayi-15,30 ngenkathi kuvula izimakethe ekuseni ngoLwesine.
Liqhubekile lazimelela irandi labuyisa isithunzi salo ngoba kuthe kuvula izimakethe ekuseni ngoLwesine uPondo waseBritain wabe ulingana namarandi angama-20,46.
Likuphindile futhi elike lakwenza iYuro lavusa amandla libhekene nerandi, kwadingeka amarandi ahlangane abe li-18,54 ukuze akwazi ukumelana neYuro elilodwa.
Ikhombise ukuzabalaza ukwehla intengo yegolide ngoba kuthe kuvula izimakethe ngoLwesine i-awunsi legolide labe lingamadola ase-USA ayi-1 829, okuthokozisayo kunalokho ebeyiyikho kuqala isonto.
Intengo kawoyela ongahluziwe isalokhu igida phezulu ngoba noma kuvula izimakethe ekuseni ngoLwesine beyiphezulu ingamadola ase-USA angama-48,14.
Usuku lwangoLwesithathu luqale benethemba abasebenza ngezimoto zikaphethroli ukuthi kuzokuya ngawenkehli yehle intengo kodwa zehla izihlathi ngokuzwa ukuthi iziphathimandla zibuye zanquma ukukuhlehlisa ukwehliswa kwentengo kaphethroli ngamasonto amabili. Siyethemba ukuthi kuyokuba kuhle nakwabakadizili ngaleso sikhathi ngoba bezingezinhle ezabo izindaba.